Bawipa nih lungsau tein a kan cawnpiak zungzal ko
Nihin August (24), Mithiang Bartholomew (Bawipa hnu zultu, Lamkaltu) puaini Bupi nih a kan tuahpiak. Mithiang Bartholomew min a ngeimi vialte nan dihlak in Bawipa nih thluachuah in pe hna seh. Damnak, ṭhawnnak, cahnak in pe ko hna seh tiin thla kan cam piak hna.
Mithiang Bartholomew puai caah kan rel hnga dingmi kan bible cathiang, a voikhat bible kan relmi cu (Bia. 21) chungin a si i, zultu (12) hna i an min kha kutka hna cungah khenh a si, timi kha kan hmuh. Bawipa Pathian nih a thar in a sermi a bu, a pennak ah zultu hna hrambunh in a ser, timi kha kan hmuh khawhmi a si. Cucaah hi zultu (12) chung i aa tel vemi Mithiang Bartholomew puai cu nihin ni ah kan tuah. Thawngṭhabia chungah Filip nih Barthlolomew kha a va kawhnak, kan Bible cathiang ahcun “Nathanael” tiah a ti.
(Jn. 1:45-51) chungah khan kan rel i, “Filip cu Nathanael sinah cun a va kal i, Filip nih cun Nathanael cu a va hmuh i, “phungbia cauk chungah a kong Moses nih a ṭialmi pa, Profet hna zong nih a kong an ṭialmi pa kha kan hmuh cang. Amah cu Joseph fapa Jesuh, Nazareth khuami kha a si” tiah a va chimh. Cu tikah Nathanael nih zeitindah a ti tiah kan ti ahcun, “Nazareth khua cun thilṭha zeital a chuak kho hnga maw?” tiah a ti. Chimduhnak cu a zum kho lo, lungaw ṭawmnak a um, lunghrinnak a ngei. Mah tikah Filip nih, “Ra law rak zoh” tiah a ti. Dawtmi u le nau hna, Bawipa Jesuh Khrih hnu kan zulhnak ah, Khrihfa kan sinak ah zeizong vialte hi kan theih dih hnu lawngah, Khrihfa cawnpiaknak kan theih dih hnu lawngah “Kan zumh lai, kan zulh lai” ti a si lo. Jesuh Khrih nih a hnuzul ah a thimmi Bartholomew (Nathanael) zong hi lungaw ṭawmnak lungthin a ngeimi a si i a zum kho dih lo. “Nazareth khua in zei thilṭha tal a chuah kho hnga maw” ti tuin, hmaizahnak pakhat hmanh ngei loin bia tu a rak chim. Sihmanhsehlaw nihin ni ah Vanthar, Jerusalem thar hmun ah amin bunh in luhnak innka pakhat a sinak kha, Bawipa nih a thimmi a sinak kha nihin kan bible cathiang a voikhatnak ah fiang tein kan hmuh khawhmi cu a si.
Dawtmi u le nau hna Bawipa a bia kan theih dih cikcek lawngah “Jesuh ka zumh lai” tiah ti duh hna hlah usih. Cawnpiaknak zongah “A cawnpiaknak ka theih dih lo ruangah ka zum kho lo” ti duh hna hlah usih. Kanmah nih kan theih dih lomi chungin khan Pathian kha zumhnak kha kan kawl ding a si. Bartholomew (Nathanael) nunnak te chung zong hin thazaang pakhat lak ṭi ṭhan ka duhmi cu, Jesuh Khrih nih kanmah le kanmah kan i theihnak nakin kan kong a theih deuh. Zeitindah a ti tiah cun Jesuh nih cun Nathanael kha amah lei i a rat kha a hmuh i, “Israel mi taktak khi zohhmanh uh. Amah khi hlenthawinak lungthin zeihmanh a ngei lomi a si” tiah a ti. Bawipa kha Nathanael nih a hmuh tikah, “zeitindah ka kong cu na theih” tiah a ti. Jesuh nih “Filip nih an kawh hlan ah khan theipi kung tangah ka rak in hmuh cang” tiah a leh. Bawipa nih Filip nih a kawh hlanpi khan khoika ah dah Nathanael cu a um, timi kha a theih diam cang, a hmuh diam cang mi a si.
Dawtmi u le nau hna Khrihfa kan si hlanah Bawipa nih a kan theih dih cangmi kan si ko. A hnu zulmi kan si hlan ah Bawipa nih a kan theih dih cangmi kan si ko. Nathanael nih zeitindah a leh, “Saya, nangmah cu Pathian Fapa na si, Israel mi Siangpahrang na si” tiah a ti. Bawipa he i tonnak in kan nunnak i thleng ve seh! Nathanel cu Bawipa he an ni ton hnu ah a nun aa thleng. Bawipa sinah kan va kal i, Bawipa kan va ton kha a herhmi a si. Filip nih a ti bantukin “ra law, ra zoh” tiah a ti.
A tu lioah Bawipa Jesuh Khrih kong he pehtlai in online te hna in tampi kan theihmi a um ko lai. Asiloah pakhat khat kan hawile sin zongin, cawnpiaktu saya hna, pastor hna sinin kan theihmi tampi a um ko lai. Va kal in Biakinn ah Bawipa he thla va cam, Bawipa sin thla va cam, Bawipa va ton ding kha kannih zong i zuam ve hna usih. Cuti lawngin cun Bawipa kan ton khawh lai. Bawipa kan ton khawh taktak lawngah kan nunnak ah biatak tein a tlingmi Khrihfa, Bawipa hnu zultu kan si kho lai. Nathanael ih a nunnak tein pakhat thazaang lak ṭi ka duh rihmi cu a caan caan ah thil sining tak hmuh loin kan theihnak in (asiloah) a par pavuan in midang kha biakhiah, midang cungah ruahnak chim kan hmang tawn. “Nazareth khua in zei thilṭha tal a chuah hnga maw” tiah Nathanael (Bartholomew) nih cun a ti. Sihmanhsehlaw Bawipa a va ton taktak tikah nunnak a hmuh tikah a nunnak zeizong vialte aa thleng.
Khrih Bawipa a ton tik lawngah aa thleng. Kan hawi, kan pawngkam ummi hna zong a leng parpa vuan zoh in, kan ruahnak kha an cungah bia chim sawhsawh hna hlah usih. Thil sining takte hmuh, theih hnu lawngah bia kan chim, kan ruahthiam a si ahcun khakha Bawipa zong nih a kan duh piakmi Khrihfa ṭha nunzia zong a si. Bawipa sin kal in fimnak thluachuah hal hna usih. A chia a ṭha thleidan khawhnak Bawipa sinah va hal hna usih. Mithiang zultu Bartholomew bantukin kannih hna zong Bawipa hnu a zul khotu kan si khawh cio nakhnga ding caah Bawipa nih pakhat cio thlua rak kan chuah hram ko seh. Amen
Thazang petu /- Fr. Fidelis Maung Sein