Bawinu Mary cu kan biakmi a si lo, kan upat mi a si
Nihin caanṭha caan sunglawi a kan petu kan biakmi kan Pathian; a hmasabik ah a min thiang thangṭhat si ko seh! Nihin kan nu Bupi nih Bawinu Mary Siangpahrang nu a sinak puai caah rel ding a kan pekmi cu (Luke 1:26-38) a si. Elizabeth pum lawng loin a um thlaruknak ah Pathian nih Vancungmi Gabriel cu Galilee ram, khua pakhat Nazareth timi ahcun a thlah. Siangpahrang David hrinsor a simi pa Joseph an timi he kan i ṭhi lai tiah bia aa kammi ngaknu kha bia na va chimh lai tiah a fial. Cu ngaknu cu amin ah Mary a si.
Vancungmi kha a sinah cun a ra i, na cungah daihnak um ko seh! Bawipa cu na sinah a um i, thluachuahnak tampi in an pek tiah a ti. Vancungmi bia kha a theih tikah Mary cu a lau ngaingai i, a bia kha a sullam zeidah a si hnga tiah a khuaruah a har. Vancungmi nihcun aa thawh i, Mary na thin phang hlah, zeicahtiah Pathian nih nangmah cu veel an ngeih. Nau na pawi lai i, fa na hring lai i, a min ah Jesuh na sak lai, amah cu milian mingan a si lai i, cungnungbik Pathian Fapa ti a si lai. Amah a hringsortu Siangpahrang David bawiṭhutdan kha Pathian nih amah cu a pek i, Jacob tefa hna Siangpahrang zungzal in a si lai. A pennak cu zeitik hmanh ah a dong lai lo tiah a ti.
Mary nih Vancungmi cu a thawh i; ngaknuthiang ka si ṭung, zeitindah hihi cu a si khawh lai tiah a ti. Vancungmi nihcun a leh i, Thiang Thlarau kha na cungah a phan lai i, Pathian ṭhawnnak cu na cungah aa fu lai. Hi ruang ahhin a thiangmi fa cu Pathian Fa tiah ti a si lai. Hi hleiah na rualchan Elizabeth kha a tar leiah fa a pawi i, a cing ti i rak ti tawnmi kha atu hi a thlaruknak a si cang. Zeicahtiah Pathian nih a tuah khawh lomi thil zeihmanh a um lo tiah a ti. Mary nih a thawh i, kei cu Bawipa salnu ka si ko, na chim bangin ka cungah tling ko seh tiah a ti i Vancungmi nihcun a kaltaak. Bawipa Thawngṭhabia a si; Maw Bawi Khrih, na cungah thangṭhatnak um ko seh!
Thawngṭhabia chungin tlangtar ka duhmi; ‘Bawinu Mary cu kan biakmi a si lo, kan upat mi a si’ timi in thazaang la hna usih. Nihin Aug 22 cu kan nu Bupi nih Bawinu Mary Siangpahrang nu a sinak puai a kan tuahpiak. Bawinu Mary Siangpahrang nu a sinak cu Pope Pius nih 1954 ah hram a rak thawk. Bawinu Mary cu Siangpahrang nu a sinak cu; Johan nih Biathlam a ṭialmi; Biathlam 12:1-2; ‘Van ahkhin khuaruahharnak pakhat a lang. Minu pakhat a lang i aa thuammi cu Nika a si, Thlapa kha a ke in a lamh i, a lu ah Arfi hleihnih bawiluchin aa chinh.’ Pathian nih Bawinu Mary (အခွင့်အရေး) caanṭha a peknak cu Pathian nu a si caah a si. Nu Mary cu nihin zumtu hna nih kan biakmi a si lo, kan upatmi a si. Mary upatnak le thangṭhatnak, Mary cu Pathian nu a si caah a si. John 1:1-14; ‘Mary cu Fapa nu a si’. Matt 1:18-24, 2:11/ Luke 1:31; ‘Mary cu thiangthlarau innchungnu a si’. Luke 1:35; ‘Mary cu Thumkomh Pathian an i tonnak a si. Mary cu ngaknuthiang a si.’ Isaiah 7:14 ah; ‘Ngaknuthiang nih fa a pawi lai i, fa fa hrin lai. A min ah Immanuel sak a si lai.
Luke 1:27 ah; ‘ngaknuthiang a min cu Mary a si a ti.’ Lamkaltu 10:14-15 chungah; ‘Peter nih a thiang lomi cu ka ei lai lo a ti, Pathian nih a thiang a timi cu nangmah nih a thiang lo ah ruat hlah a ti.’ Bawinu Mary cu Pathian nih ngaknuthiang a timi a si. Cucaah nangmah nih a thiang lo ah ruat ti hlah! Pathian nih a thiang a timi cu a thiang ko. Nu Mary sinah thluachuahnak bia a chim hmasabik tu cu Vancungmi hna an si. Luke 1:28 ah; ‘Thiangthlarau in a khatmi Elizabeth nih aw thangpi in, nangmah cu nu vialte lakah thluachuak bik nu na si a ti. Ka Bawipa nu a ti.’ Luke 1:42-43 chungah kan hmuh. Mary cu Pathian nu, Fapa Jesuh Khrih i a nu a si tiah a chimtertu cu thiangthlarau a si.
Nihin ah mi cheukhat nih Bawinu Mary cu arti hawng he an tahchunh, vate bu he an tahchunh, a phunphun zawmhtaihnak bia an chim. Sihmanhsehlaw, nangmah cu cutin va chim hlah! Mi dawtnak na cham khawh lo zongah um ko seh; a lung fahnak cu va pe hlah! Siangpahrang Bawinu sinak le Siangpahrang Bawinu cu Vancung khua ah a um timi cu Biathlam 12:1-5 chungah hmuh khawh a si.
Mary cu mi cheukhat hna caah cun a thlum a al kho lo, caan donghnak ah zumtu hna cu Siangpahrang Bawinu a umnak Vancung khua ah kan i tong dih lai. Vancung khua ah Mary na hmuh tikah na mithmai a ṭha lai maw? Fak deuh in ruat hna usih! Bawinu Mary cu nihin zumtu hna nih kan biakmi a si lo, kan upat mi tu a si deuh! A ngaitu nan dihlak cungah Pathian nih thluachuah in pe ko hna seh! Kaa lawm.
Thazang petu /- Saya Francis Khua Pheng