Jesuh Khrih lo cun zeihmanh kan si lo
Nihin ni i rel dingin Khrihfa Bupi nih a kan timhpiak mi; Matt 22:34-40 tiang a si i, “Jesuh nih Sadusi mi kha holh awk hngal loin a tuah hna ti kha Farasi mi nih an theih tikah hmunkhat ah an i pum i, annih lak i pakhat; phungbia cawnpiaktu Saya a simi nih khan bia in foih a timh. Aa thawh i, ‘Saya, phungbia chung ahhin zei nawlbia dah a nganbik mi a si’ tiah a hal. Jesuh nihcun ‘Bawipa na Pathian cu na lungthin dihlak le na rauhnak dihlak le na nunnak dihlak in na dawt lai ti hi a nganbik le a biapi bikmi nawlbia cu a si. A hun changtu biapibik nawlbia cu cu bantuk ṭhiamṭhiam cu a si i, na innpa cu nangmah naa dawt bantukin na dawt lai ti hi a si. Moses nawlbia vialte le Profet hna cawnpiaknak vialte cu hi nawlbia pahnih chung ahhin an i khumh dih’ tiah a ti.
Bible pakhatnak ah kan hmuh khawh mi Ezekial 37:1-14 chungah Pathian nih Ezekial cu ruhro nel lakah a kal i, ruhro in a khatmi hmun ah Bawipa nih a thlah i cuka ahcun hi ruh vialte hi an nungṭhan kho lai tiah na zum maw tiah Pathian nih bia a hal i, Ezekial nih Bawipa, cucu nangmah nih pei na hngalh cu tiah a ti i, an lak ahhin bia chim tuah tiah Pathian nawlpeknak bangin Ezekial nih bia a chim i, cu ruh pawl cu titsa in an vun i tuam i, nunnak thaw an kaa chungah a chemh hna i, a vun nung i an vun dir i, ralkapbu nganpi ah an hung cang timi kha Bible pakhat ah kan hmuh khawh. Hi nih langhter a duhmi cu; dawtmi nu le pa u le nau hna.
A pakhatnak ah Khrih tel lo in kan nunnak, nun ro kan sining, zeihmanh kan si lo ning kha Bible nih a rak langh chung cia i, zeihmanh lo kan sinak dirhmun in kan Bawipa Jesuh Khrih thawngin zungzal a nungṭhan mi thlan pin nunnak ruahchannak kan Bawipa Jesuh Khrih nih a kan pek ti kha a langhter i, amah a zumtu vialte cu nikhat ni ahcun thihnak in thlarau pum i hruk in kan thoṭhan lai timi kha Corin cakuat chungah fiang tein Pathian nih a kan chimh.
Duhdawt mi nu le pa u le nau hna; vawlei cung kan nunnak hi a donghnak si lo i, vawlei cung i kan nunnak a dongh hi zungzal nunnak kan i thawhnak, kan hramthawhnak tu lawng a si ti kha a zumtu vialte thlarau pum in kan thoṭhan lai timi kha nihin kan relmi Bible pakhatnak nihcun a langhter. Nihin kan relmi Salm hla 107 chungah kan hmuh khawh mi cu; anmah tein an kalnak ding lam kha an i hmuh kho lo e, tiah a ti. Khrih tel loin mitlau kan si i, Khrih tel loin pakpalawng kan si i, Khrih tel lo cun zeihmanh lo kan si kha kan i fian ding a herh ngaingai. Duhdawt mi u le nau nu le pa hna; nihin ni ah thihnak in thawhṭhan a zum lomi Sadusi mi hna nih Jesuh Khrih cu bia an hal tikah, Jesuh Khrih nih holh awk hngal loin bia a leh hna hnu ah Farasi mi pakhatpa nih ai thawh i, nawlbia chungah zeidah a nganbik tiah Jesuh Khrih kha a hal.
Jesuh Khrih nih a timi cu; na biak na Pathian kha na nunnak dihlak, na thazaang dihlak, na ruahnak dihlak in na dawt lai i, cu bantuk ṭhiamṭhiam in a hun changtu cu na innpa kha nangmah naa dawt bantukin na dawt lai ti kha a si ko. Duhdawt mi nu le pa u le nau hna; zeizong vialte hi kan Bawipa Jesuh Khrih thawngin Pa Pathian nih dawtnak in a ser i, kanmah hrimhrim zong hi Jesuh Khrih thawngin a dawtnak in a kan sermi kan si bantukin, a dawtnak in Fapa Jesuh Khrih a kan pek i, cucaah cun kannih i kan rian nganbik le kan nawlbia a nganbik mi cu; kan Bawipa Jesuh Khrih thawngin Pa Pathian kha sunparnak pek i, kan Pathian dawt kha a si ko.
1Corin 13:13-14 zawn ah; a hmun zungzal dingmi thil pathum an um; cu hna cu; zumhnak, ruahchannak le dawtnak an si; cu hna lak i a nganbik cu dawtnak a si tiah a ti. Cucaah dawtnak hi a biapibik ah chia ulaw tiah Cathiang nih a kan fial. Zeizong vialte, nawlbia vialte lakah a nganbik nawlbia cu dawtnak a si. Duhdawt mi nu le pa u le nau hna; kannih mi thar tein ser kan si i, kan Bawipa Jesuh Khrih thawngin Khrih thlarau a ngeimi kan si i, Khrih ta kan si cang bangin dawtnak hi kan thuam a si. Sertu Pathian kan dawt kan timi cu; a nawl kan zulh hi a si ko. Kan biak kan Pathian kan dawt a si ahcun vawlei taksa in kan innpa hna kha zawnruahnak, dawtnak thinlung put kan ngeih in kan kilven, kan zohkhenh hna ding kha a biapi ngaingai.
Nihin ni hi Pope a rak ṭuanmi Mithiang Pius (10) nak i puai ni a si bangin amah i a duhbik mi Bible cacaang, a thih tiang a nunnak a dongh tiang ai tlaih peng mi cu; 2Corin 5:17; mi zeimaw hi Khrih he an i pehtlaih tikah mithar an si ti kha si. Zeizong thil vialte hi kan Bawipa Jesuh Khrih he cun a tharte ah ser thar mi kha kan si i, zungzal a thi hngami dingmi kha zungzal a nung hnga dingmi ah thlen kan si kha i philh loin zeitik caan hmanh ah kan biak kan Pathian kha daw in, amah cu thangṭhat peng ko hna usih! Thawngṭha a rak ngaitu nan dihlak cungah Pathian nih thluachuah in pe ko hna seh! Amen
Thazang petu /- Saya Canute Bawi Kam