Pathian Lawnglawng hi Zeizong Vialte Cungah Naw Ngeitu a si

Nihin ah thlarau tirawl ah hrawmh kan duhmi hna cu; Matt 19:23 chungah kan rel bantukin Bawipa Jesuh nih, ‘hi vawlei cung ahhin mirum pakhat Vancung ram a kai ding nakin kalauk pakhat nih ṭhim kaa chung i a lut ding khi a fawi deuh’ tiah a ti. Cucu Lamkaltu hna nih an theih tikah an lung a rawk ngaingai i, a si ahcun ahodah Vancung ram a kai kho kun lai tiah lungrethei ngaiin an um lioah Bawipa Jesuh nih, cu bantuk cu minung caah cun a si kho theng lo, sihmanhsehlaw Pathian caah cun zeizong vialte hi a si kho dih tiah a kan chimh. 

Cucu kan ruah tikah nihin kan theih mi ahcun Jesuh Khrih nih mirum caah hin Vancung ram kainak ding cu a si kho lo tiah a ti, a har e tiah a tinak a si. Cucaah cun Vancung ram kai hi mirum caah khan a fawi lo, a har lai tiah a ti. Sihmanhsehlaw hika ah, a har timi cu Pathian ai bochan mi hna, Pathian ah a nungmi hna caah cun a si kho dih mi lawngte kha a si timi kha Bupi tuanbia chungah le Bibel Cathiang hrimhrim ahkhan kan hmuh. Hmasabik ah kan zoh tikah cun Bawi Jesuh Vailam an tah hnu ah Vailam tung in a rak ṭhumtu le a thlan thar ah a rak vuitu hi hodah a si ti ahcun Arimatia khuami Joseph timi kha a si. 

Amah cu Judah mi hna nih an rak ṭihzah ngaimi, an upat ngaimi, Judah mirum pa kha a si. Amah cu mirum pa a si ko nain khan zeitindah Vancung ram kainak ding lam hi lam aa sial, zeidah a hman timi kan zoh tikah Bawi Jesuh he mizapi theih lo in dawtnak, Judah  mi hna nih an rak theih lomi Jesuh Khrih he an rak i komhnak te kha a rak um. Cu tikah hi mirum pa nihhin Bawi Jesuh a vun thih tikah a ruak kha a rak laak i amah vuinak dingah aa sermi thlan ahkhan a rak vui ti kha kan hmuh. Cu lengah zeidah kan hmuh rih ti a si ahcun Bupi tuanbia chung ahhin Arimatia khuami Joseph nihhin Lamkaltu hna thawngṭhabia an phuan tikah Peter le James zong an kal tikah nan thawngṭhabia phuannak a tlamtlin nak dingah hihi va hmang uh tiah a ngeihmi sui tlep pawl kha a pek hna i khatikhan Bupi karhchonak dingah a rumnak kha a hman timi kha kan hmuh. 

Cucaah Arimatia khua mi Joseph nihhin Vancung rak kainak dingah zeidah a hman; Bawipa Jesuh Khrih ruak kha a vui timi kha kan hmuh. Cu a vuinak cu a ho thlan a si; amah ca hrimhrim ah ai sermi thlan kha Bawipa Jesuh caah a hman ti kha kan hmuh. Bawipa Jesuh Khrih caah zeitluk in dah a rumnak le a ngeihchiah hna a hman ti kha kan hmuh lengah hi vawlei cungah hin amah a fimthiamnak, a ruahnak vialte zong kha Vancung ram conak caah Bawipa Jesuh Khrih a nunnak caah, Bawipa Jesuh Khrih i a pum a simi Catholic Bupi mission rianṭuannak ding caah a hman dih. Cucaah Arimatia khua mi Joseph bantukin kannih vialte zong nihhin vawlei cung chaw le va a kawlmi, rumnak a kawlmi kan si ko nain, kan ngeih mi tete, kan ngah mi tete hi Bawipa Jesuh caah, a Bupi caah tiin kan hman a si ahcun kanmah caah Vancung ram kainak ding a fawite timi kha a si, a har lo. Cucaah hi nakin a dang tehte lakah zohchunh awk kan hmuh mi cu zeidah a si ti ahcun Mithiang Ambrose timi hi a hlan ah lawki mi a rak si ko nain, Khrihfa pawl nih amah hi miṭha a si, Bishop kan ṭuanpiak sehlaw tiin an rak hauh tikah Siangpahrang nih, eeee, nangmah an in duh cu ta; ṭuanpiak ko hna tiah a rak ti tikah Mithiang Ambrose nihcun ka ṭuan ko lai ta tiah a ti. 

A thaizing ah tipil a ing, kiptuh ah Siangbawi cannak a ngah thiam ahcun Bishop a ngah cang. Bishop ṭuan aa timh bakin khan a ngeihmi a chawva vialte kha a zuar dih, a lo ram, a inn a lo vialte kha a zuar dih i Bupi rianṭuannak ah khan a hman. Cu lengah a si kho tawkin Pathian pekmi fimthiamnak vialte kha mizapi khamhnak caah a hman i, a thiam tawk, a theih tawk in mi kha a cawnpiak hna caah mi tampi cu thlarau nunnak lam ahkhan an kal. Dawtmi u le nau hna, nang le kei zong vawlei cung chaw le va kawlmi kan si ko nain, hi vawlei cung chawva nih Vancung ram kalnak lam a kan dawntu si loin, kanmah caah Vancung ram kainak hleihlak tu ah canter kha i zuam usih. Mithiang Ambrose bantukin kan ngeih kan chiah, kan thin kan lung, kan fimnak kan thiamnak hi Bupi caah, Jesuh Khrih caah tiin kan hman a si ahcun kannih vialte zong Mithiang Ambrose bantukin Vancung ram kainak caah kan zeizong vialte hi Vancung ram kainak hleihlak ah chiah tu kha i zuam cio hna usih. 

Cun Arimatia khua mi Joseph bantukin kannih vialte nih vawlei cungah kan ngeih mi kan chaw kan va le kan thinlung hi Bawipa a pum a simi Catholic Bupi caah mi vialte khamhnak caah tiin a hmang thiammi kan si ahcun kannih vialte zong hi vawlei cung chaw le va cu kan kawl pah lai, kan hmuh mi chaw le va chungin Bawipa ram kauhnak caah, Pathian rianṭuantu hna caah kannih vialte khamhnak caah tiin a hmang thiammi si ding ahkhan sawm kan duh hna.  

Thazang petu /- Fr. Abraham Hrang Hit