Dawtnak a umnak Hmun ah Thluachuahnak a um
Zarhkel (20) nak Zarhpi ni ah kan rel mi Thawngṭhabia cu (Mt 15:21-28) chungin a si i Jesuh Khrih Jentail mi hna umnak hmun a phanh tikah minu pakhat nih a fanu a damnak hnga ding caah a nawl nak kong a si. Minu nih Bawipa sin in a fanu caah damnak a hal tikah fawi tein a sungh a pe lo. Jesuh zultu hna nih cun mah minu a rannak in kalter an duh. Hna a kan hnawh tiin an hmuh caah a si kho mi a si. Jesuh zong nih fawi tein a hal mi a pe ve lo. Sihmahsehlaw, minu nih a fanu damnak caah cun tiin a si khawh chungin a Jesuh sinah damnak a hal ve.
Cu tikah minu cu a ra i a hmaiah khuk bil in a kun i, “Bawipa, ka bawm ko,” tiah a ti. Jesuh nih cun, “Ngakchia rawl cu i lak riangmang i uico pek cu a hmaan lo,” tiah a leh. Sihmahsehlaw, minu nih a leh mi cu, “ Cucu a si taktak ko, bawipa; sihmahsehlaw bawi cabuai cungin a tlami rawl ṭiltlawt cu uico nih an ei ve tawn ko hen pei,” tiah a leh. Cutikah Bawipa nih minu zumhnak cu a thangṭhat i minu nih a hal mi zong cu a pek timi kha kan hmuh khawh.
Mah minu hi kan zoh tikah Isarel mi hna zulh phung le tuah phung he aa ral mi dirhmun in a nung mi nu a si. Cun Jesuh zong cu mah minu nih a ton ngam dingmi a si lo nain a fanu ruangah Bawipa sinah a ningzah nak vialte chiah tak khawh dih in a panh ngam mi zong a si. Kan nunnak cio zongah harnak kan ton tikah mah minu bangin kan si cio tawn ve ko hna. Harnak kan ton tikah a kan bawm kho tak tu ding cu Jesuh lawng a si, Pathian lawng a si tiin thlacam in kan panh cio ve tawn hna.
Phundang in vun ruat hna u sih law, mah minu hi Jesuh nih aa ruah lo ning in bia a leh tikah a inn ah i khumh in thinhung ngai in Jesuh le a zultu hna kha chiatserh in a zai kho ding zong a si ko. Sihmahsehlaw, a dawtmi a fanu caah cun zeithil paoh kha tuah ngamnak a ngei kho i minung nih ruah khawh lomi tangdornak lungthin tiang a ngeih khawh mi hi a si.
Sihmahsehlaw, dawtnak taktak a si ahcun zeitik hmanh ah ‘ka duh lo’ tiin bia leh a si tawn lo. Jesuh nih a dawt mi minung hna hal nak kha zeitik hmanh ah ‘ka duh lo’ a ti bal lo. Minu nih a ngeih mi bantuk lungthin he Pathian kan panh cio hna a si ahcun, a kan daw zungzal tu Pathian nih a sin kan hal mi hna cungah “Ka duh lo” tiin a kan let lai lo. Minu nih hin Jesuh sin a panh bantukin, kan Bawipa Jesuh Khrih zong nih Gethsemane dum chungah Pa Pathian sinah a minung sinak in a panh ve kha kan hmuh khawh.
Ningzah nak in luat khawhnak ding lawng si loin, a dawtmi minung hna khamh kan sinak hnga ding caah, ningzah vialte lak ah ningzah nak fakbik a simi hmanh kha Jesuh nih a in ve taktak ko. Minu zong nih a dawtmi a fanu caah ningzah fahnak kha a tei khawh ve ko.
Dawtmi u le nau hna, nihin ni ah zeibantuk harnak dah na ton? Jesuh Khrih sinah na lungthin tak tein na herh taktak mi kha na hal ve cang maw? Asiloah, ningzah nak le mi nih an ka soi sual lai timi lungthin na ngei rih maw? Zumhnak taktak he Bawipa na hal a si ahcun, na hal mi kha an pek taktak ko lai. Pathian cungah zumhnak ngei hna u sih law teima tein Bawipa kha panh lengmang ko hna u sih. Minu nih a tuahser mi chungin in thazang i lak cio hna u sih tiin thazang pek kan duh hna.
Thazang petu /- Fr. Fidelis Maung Sein