Columbia lihnin hartongmi hna caah Pope nih bawmhnak a kuat

Kan hnu Cawn ni khat ah Columbia ram nitlak lei ah 7.4 magnitude a ṭhawngmi lihnin ruangah harnak a tongmi an umnak Diocese hna ah avoi khatnak bawmhnak cu Pope nih a kuat hna. Cu lihnin nih minung nunnak tampi a lak pin ah inn le lo rawkmi a tam. Mipi an intuarnak cungah Pope nih a tuarpi hna i thla a campiakhna hna kong a chim i emergency response lei bawmchantu hna thazaang peknak zong a ngeih hna. Pope nih  bawmhnak a pekmi cu (Dicastery for the Charity) in kuat asi i cu phaisa cu Diocese hna cio ah lihnin hartong hna kha pek an si lai. Dicastery Prefect, Archbishop Luis Marín de San Martín, Apostolic Nunciature, le Columbia Bishops Conference hna nih hartongmi hna caah a rannak bawmhnak peknak ding meeting an tuah dih hnu ah hi bawmhnak hi kuat asi.

Hi lihnin ruangah in le lo tampi a rawk i cu a rawkmi tang ah a nung rihmi chanhchuah awk ah le a thi mi ruak chuah awk ah emergency service hna nih biatak tein ṭan a la i, nizan tiang ah a thi mi 200 leng an si cang tiah theih asi. Hliamhma a pu mi zong tampi an um. Hi thil a cangmi cung Pope nih a ngeihchiatnak le a tuarpi hna nak kong a langh ter i bawmchantu phu hna caah le mipi hna caah thla a campiak hna pin ah a thicia mi thlarau hna nih Pathian zaangfahnak in daihnak chung ah i din hram ko hna seh tiah thla a campiaknak kong ca a kuat hna. Kan hnu June thla lio ah Venezuela lihnin hartong hna caah bawmhnak a kuat bantukin Euro 100,000 a kaut hna i Columbia Caritas sin in Diocese Bishop hna nih tawlrel tlangtlak in emergency bawmhnak caah hman asi lai. Rianṭuantu hna le mibawmtu hna nih thil sining an zoh lai i a herh ning in bawmhnak pek ṭhan asi lai tiah theih asi.