Bawi Pathum Pathian pakhat puai Zarhpi Ni
Nihin Bawi Pathum Pathian pakhat (Holy Trinity) zarhpi ni caah bupi nih thlarau thazang lak ṭi dingin an kan thimpiak mi cathiang hna cu (Exo 34:4-6,8-9; 2 Cor 13:11-13; Jn 3:16-18) hna hi an si.
Nihin cu Thumkomh Pathian puai ni a si. Thumkomh Pathian kong he pehtlai in cheukhat nih cun an zum kho lo. Mirang nih “Call to live in Divine love” “Pathian nunnak ah tel dingin auhnak” tiah an ti. Thumkomh Pathian puai cu a sunglawi ngai mi puai ni zong a si.
Thawngṭhabia chungah a timi cu “Pathian nih vawlei pi cu a dawt tu hringhran caah Fapa ngeihchun te kha a rak thlah” tiah a ti. Nihin kan tuah mi puai zong hi dawtnak puai ni ti zongin kan ti khawh. Zeicah tiah cun Pathian dawtnak ruangah hi vawlei pi cu khamh a si caah asi. Fapa a zummi paoh cu zungzal nunnak a ngei lai, an hmu lai tiah a ti. A zum lomi paoh cu biaceihnak an huah lai tiah a ti.
Kan nunnak ah Pathian kha zum taktak hna u sih. Dawt taktak hna u sih. Kanmah vialte hna cu Pathian dawtnak chungah nun dingin auh mi kan si. Pathian rian kan ṭuan tikah, Khrih kong kan chim tikah, thawngṭhabia kan phuan tikah thlarau nunnak kha a um zungzal a herh.
Cheukhat nih Bawi pathum Pathian pakhat cu a herh lo an si. Minung ruah sawhsawhnak in cun a herh lo tiah an ti khawh men ko lai. Zeicah tiah cun Pathian kong cu kan theih dih khawh taktak lo caah a si. Sihmahsehlaw, Jesuh nih tehte a khan mi a zum mi kan nih Khrihfa mi hna nih cun Jesuh bia kha zumh in Thumkomh Pathian Pakhat sinak kha kan zumh mi cu a si.
Pa Pathian nih vawlei a dawt i a Fapa ngeihchun kha a pek, Jesuh nih a kan dawt i a nunnak pek in a kan khamh, a kan tlanh. Mat 28: 16-20 chungah “Zultu hleikhat hna cu Jesuh nih a chimh mi hna Galilee tlang ah khan an kai. An hmuh i an biak. Sihmahsehlaw, cheukhat cu lungawṭawm in an um” tiah a ti. Jesuh nih cun zultu hna kha “Vancung le vawlei cung i nawl ngeihnak vialte cu pek ka si cang. Cucaah khuazakip ah va kal u law miphun vialte kha ka zultu ah va ser hna u. Pa le Fapa le Thiang Thlarau min in tipil nak va pe hna u. Kan chimh mi hna vialte hi an zumh nak hnga va cawnpak hna u. Zungzal cat loin kan um pi hna lai” tiah a ti.
Jesuh Khrih nih ro a kan pek tak mi ‘nawl ngeihnak’ kha nihin ni ah tehte kan khaan mi cu a si. Cu nawl ngeihnak cu zultu hna kha a pek chin hna i “Pa le Fapa le Thiang Thlarau min in tipil nak va pe hna u” tiah a timi cu a si. Pa le Fapa le Thiang Thlarau cu ṭhen khawh an si lo. Cucu kannih Catholic hna nih thlacamnak kan tuah fatin ‘Pa le Fapa le Thiang Thlarau min in’ tehte kan khaan mi cu a si.
Nihin Holy Trinity kan timi puai kan tuah nak thawngin kan zumh nak a feh chinchin nak hnga ding caah le Pathian thluachuahnak, Thiang Thlarau rianṭuannak hi vawlei pi ah a ṭhan chinchin nak hnga thlacam hna u sih, i zuam hna u sih. Jesuh Khrih a zummi cu nunnak an ngei lai tiah a ti bangin Khrih nih a kan cawnpiak mi, a kan chimh tak mi Thumkomh Pathian kong kha fek tein zum ko hna u sih.