Pathian a zummi kannih zumtu hna cu Khrih ah thei kan tlai zungzal ding a si

May 9, 2026 nihin ni i Bupi nih cathiang rel dingin a kan timhpiak mi hna cu 1Pet 4:7-13; Mk 11:11-26 tiang hna hi an si. 

Nihin kan relmi thawngṭhabia cu kan Bawipa Jesuh Khrih Betheny khua in Jerusalem lei a kal pah ah a paw a ṭam i theipi kung kha a fuh i a thei a tlai lo, a hnah lawng a si kha a hmuh tikah chiat a serh i theipi kung cu a car dihnak kong le Jesuralem biakinn ah a kal i cu Jerusalem biakinn cu chawlet-chawrawlnak tuahnak hmun ah an hman kha a hmuh i an tangka thlennak cabuai kha a leh dih i chaw a dawr mi le chaw a caw mi vialte hna zong kha biakinn in a ṭhawl dih hna nak kong kha kan hmuh khawhmi cu a si. 

Pakhatnak ah theipi tlai tik a si lo kha Jesuh nih a hngalh ko nain zei ruangah dah chiat a ser kun? Thingkung ram tlang hna cu anmah le an phun ning cio in tlai caan an ngei i tlai lo cang zong kha an ngei. A cheukhat thingkung hna cu sangphaw kung kan timi hoi hna cu a pa a simi hoi hna cu zeitik hmanh ah a tlai bal lo. Sihmanhsehlaw “Pathian a zummi kannih zumtu hna cu Khrih ah thei kan tlai peng ding a si” ti kha a kan cawnpiak i “tlai caan le tlai lo caan kha kan ngeih ding a si lo.” 

Hling lak i a tla mi thlaici zeitik hmanh ah a tlai lo bantuk kha kan si awk a si lo ti kha Jesuh Khrih nih a kan cawnpiak mi cu a si. 

Pope Francis nih a kan timi cu “Caan cheu lawng Khrihfa timi cu a um lo. Caan tling Khrihfa kan si ee” tiah a nun lio te ah bia a kan cah tak. Khrih zum i a rianṭuan tu kan si nak ah caan cheu lawng a ṭuan tu siloin caan tling rianṭuan tu kan si awk a si i kan luh pah ah siseh, kan chuah pah ah siseh, kan len caan ah siseh khawi ka hmun kan umnak ah siseh, zeitik caan hmanh ah amah Khrih aa bochanmi kan si ding kha kan i zuam awk a si i caan tling tein a rianṭuan tu kan si awk kha a si. 

Nihin kan relmi 1Pet 4:11ah “Zeizong kip ah Jesuh Khrih thawngin Pathian thawngṭhatnak a hmuh nak hnga phung a chimmi nih Pathian bia kha chim hna seh. Thazang in rian a ṭuanmi nih Pathian pekmi thazang khanṭuan hna seh” tiah a kan ti. Cun 1Pet 4:8-10 zong ah “Zeizong vialte nak in Pakhat le pakhat lung tak tein i daw u. Zeicah tiah dawtnak nih cun sualnak tampi kha a khuh khawh. Phunzai loin pakhat le pakhat tlun inn i onh u. Pathian laksawng kengtu ṭha bantukin Pathian sin in nan hmuh mi laksawng kha midang ṭhatnak caah hmang cio u” tiah a ti. A raung cu, theitlai kan timi cu Peter nih a chimmi, a kan fial mi hna tuah kha a si ko. 

Pahnih nak ah Jerusalem biakinn pi Biakam hlun ah cun Pathian thinlung kan ti khawhmi biakinn a si. A ruang cu Israel miphun hna nih Pathian sinah rai an thawinak, an pekchanhnak hmun, Pathian an tonnak hmun, Biakam kuang an chiahnak hmun a si i hmun thiang an timi hmunhma pi a si. Sihmahsehlaw cu hmun cu cu biakinn tual hmun ahcun nawl ngeitu mirum hna le tlangbawi hna nih chawlet-chawrawlnak tuah nak ah, siipuazi tuahnak ah an hman i hakkauhnak, enteihnak, nemneihnak le porhlawtnak hmun ah le ning cang loin an hman caah Jesuh Khrih a thin a hung i a ṭhawl dih hna nak hi a si. 

Asiahcun, Jesuh Khrih a thin a hun hi a sual maw? Sual naisai hlah. Cucu a thianghlimmi thinhunnak a si. A ruang cu amah Jesuh Khrih caah siloin anmah zawn a ruah hna caah khan a si. An thlarau caah a ṭha lo, anmah ca hrimhrim ah khan a ṭhat lo caah khan a si. 

Kannih nih Jerusalem biakinn kong ah kan cawn dingmi an um hna. Atu kan chan ah minung kut in sak mi biakinn ahcun Pathian kan tonnak hmun, Jesuh Khrih thi le sa in Pathian sin rai kan thawinak hmun, Jesuh Khrih thisa in Pa Pathian raithawi in kan pekchanhnak hmun, kan sual kan i thlah i Pa Pathian ngeihthiamnak kan hmuhnak hmun, Jerusalem biakinn nak in a let tamtuk in a sunglawi i a thian deuhnak hmun a si caah Pathian ṭihzah bu tein Pathian kan biaknak hmun, zoh dawh tein Pathian thangṭhatnak, lungtho tein Pathian thangṭhatnak hla kha sak in lungfim tein thlacamnak hmun a si caah biakinn cu hmun thiang a si i upat nak in kan hman awk a si. Hall khaan le inn sawhsawh bantukin kan hman awk a si lo timi kha a kan cawnpiak. 

1Cor 6:19  ah “Nan pum cu Thiang Thlarau biakinn a si kha nan hngal lo maw?” tiah mithiang Paul nih a kan ti bangin kan pum cu Pathian sunparnak caah hman ding a si. 1Pet 4:7b ah “Thla nan cam khawhnak hnga ding caah mah le mah aa uk kho mi le ralring tein a ummi nan si lai” tiah mithiang Peter nih a kan fial. Cucaah Thiang Thlarau biakinn a simi kan pum cung i a ummi thil ṭha lo te hna, dawhcah lo thil te hna, i porhlawtnak te hna kha hlawt khawh i zuam u sih law a thei a tlai peng mi zumtu kan si nak hnga kan nunnak in, kan pum hrimhrim in Pathian cu sunparnak pe ko u sih. Thei kan tlai mi cu Jesuh Khrih thawngin Pa Pathian nih sunparnak co hram ko seh.