Taksa dam lonak in Thlarau damnak tiang a hmumi pa

Bawi Khrih ah dawtmi u le nau hna, RVA Hakha Service a ngaitu nan dihlak cungah Bawipa thluachuahnak um ko seh. May 28, nihin kan Nu Bupi nih a kan thimpiak mi Mk 10:46-52 tiang kan rel lai. ‘Jesuh le a zultu hna le mi bupi cu Jeriko khua kha an phan. Jeriko khua cun an i thawh lio ahkhin lam pawngah mitcaw Bartimo; Timau fapa kha a ṭhu i thil a hal hna. Nazareth khuami Jesuh a si ti kha a theih tikah David Fapa Jesuh ka zaangfah tuah tiah a au. Mitampi nih an sik i dai tein um ko an ti. Sihmanhsehlaw thang chinchin in David Fapa ka zaangfah tuah tiah a au. Jesuh cu a dir i hei au uh tiah a ti. Cucaah mitcaw pa cu an heih auh i na tha nuam ko, an kawh cuh an ti. A puan kha a hlawnh duak i a pet i Jesuh sinah cun a ra. Jesuh nihcun zeidah in tuahpiak ninglaw na duh? tiah a hal. Mitcaw pa nihcun Saya, khua hmuhṭhan ka duh tiah a leh. Jesuh nih cun va kal kun, na zumhnak nih an damter cang tiah a ti. Chikkhatte ahkhin khua cu a hun hmuh i lam ahcun Jesuh cu a zulh’. Bawipa Thawngṭhabia a si; Maw Bawi Khrih nangmah cungah thangṭhatnak um ko seh!

Nihin thawngṭhabia chungah mitcaw pa Bartimo le kan Bawipa Jesuh Khrih an i tonnak, mitcaw pa Bartimo a damhnak kong kha kan hmuh. Mitcaw pa Baretimo hi Jeriko khua ah a ummi Timau fapa a si i, a chuahka in mitcawt dawh a si. Kan Bawipa Jesuh Khrih Jeriko khua i a kal ti thawng a theih i an chimh tikah hin damnak a duhtuk caah tlolh hrimhrim lo ding aa tim i, Jeriko khua in a lanh cuahmah lio ahkhan fakpi in a au i David Fapa ka zaangfah tuah tiah a au i damnak hmuh dingah thang chinchin in a au i damter khotu kan Bawipa Jesuh Khrih a lanh lioah caanṭha khi aa tlaih i cu caanṭha a hmuhmi te cu amah caah a sunglawi tukmi a si. Jeriko khua ah kan Bawipa Jesuh Khrih a lanh lio ahhin mitcaw pa Bartimo nihhin thei hlah sehlaw, au hlah sehlaw damnak hi a hmu lai lo. 

Nihin vawlei cungah zeizong vialte caan a ngei dih i a luan cia caan zong kha tlaih khawh a si lo i auhṭhan khawh a si lomi a si. Cucaah Bartimo mitcaw pa nihhin kan Bawipa Jesuh Khrih cuka a lanh lio ahhin a va phak tikah fakpi in a au i damnak hmuh duh ah heh! tiah caanṭha a hmuhmi te kha aa tlaihmi mitcaw pa Bartimo a si ti hi kan hmuh khawh mi a si. Asinain mi nih an thlauh; dai tein um ko an ti, hna kan hnawh hlah, dai tein um ko an ti nakin thang chinchin in thlauh khawh loin a au chinmi Bartimo a si. Cuve bantukin kan khua le kan ram ah cunglei le uktu bawi hna an tlun tikah hin mi tenau deuh te kan bia a tamtuk ahcun kan uktu bawi an ning a zak; dai tein um hna seh ti an kan duh phun khi a si ko. Asinain hi mitcaw pa Bartimo nihhin aa biatak i damnak hmuh duh ah hehchet! tiah a au tikah thang chinchin in a au tikah kan Bawipa Jesuh Khrih a dir; Hei au uh a ti, an hei auh tikah; tho, na tha nuam ko, an kawh cuh tiah an ti. Cu tikah mitcaw pa Bartimo nih cu awthawng te cu a theih tikah rianrang in a va pet i kan Bawipa Jesuh Khrih sinah a puan kha hlonhtak in a va kal. A puan a hlawnhtak i a va kal. Kan Bawipa Jesuh Khrih a va fuh timi hi kan hmuh khawh mi a si. 

Hika hmun ah thazaang lakṭi ka duh mi cu zeidah a si ti ahcun zumtu tampi zong nihhin kan khuasak le kan i hruk-aih mi kan hnipuan hi biapi tuk ah kan chiah i hihi kan Bawipa Jesuh Khrih sin phak a kan donhtu zong caan khatkhat cu a si tawn. A biapi maw? ti si ahcun a biapi ko; Nain kan Bawipa Jesuh Khrih sinah hin a caancaan ahcun kha kan i hruk-aih mi thilpuan hna nihhin a kan donh tawn ti zong hi ruah a phu ngaimi pakhat a si. Cuve bantukin kan sining, kan mihlun sualnak nihhin kan Bawipa Jesuh Khrih sin phak hi a kan donh tawn ve. Hihi hlonh ta hrimhrim a herh ti hi thazaang pek kan duh hna. Nihin ah kan Bawipa Jesuh Khrih sinah mitcaw pa Bartimo a va phak tikah hin zeidah in tuahpiak ninglaw na duh tiah a hal. Nang le kei kan hal ve sehlaw zeidah kan leh lai? Mitcaw pa Bartimo nihhin a cungah zeidah a herh ti hi a hngalh i cu a herhmi theng te cu a chim tikah kan Bawipa Jesuh Khrih nih a tuahpiak ti hi kan hmuh khawh mi a si. 

Biakam hlun ah Siangpahrang Solomon kan zoh tikah nikhat ah voikhat lengmang a thongthong in Raithawinak kan Bawipa sin a pemi a si. Cucaah kan Bawipa aa lawm i Solomon cu zeidah kan pek lai ka hal tuah a ti tikah Solomon Siangpahrang nihhin a miphun le a minung hna hruai thiamnak dingah hin fimnak le hngalhthiamnak ka pe law cucu ka herhmi a si a ti tikah kan Bawipa aa lawm i rumnak le upat nak nun khua saunak a pek chap timi hi kan hmuh khawh mi a si. Nihin ah kan Bawipa Jesuh Khrih sinah kan Pathian sinah hin kan herhmi thengte kha kan hal a si ahcun a kan pek ve ko lai ti hi i laak usih. Cucu kan hal tikah zei he dah kan hal lai ti a si ahcun zumhnak he kan hal lai. Zumhnak he thla nan cam tikah nan ka hal tikah kan tuahpiak hna lai a kan ti. Pa sunparnak a langh dingah kan tuahpiak hna lai a ti bantukin hi mitaw pa Bartimo nihhin zumhnak he a hal i kan Bawipa Jesuh Khrih hi a ka damter kho taktak tu ding a si ti kha a zumh tikah a hal tikah mitcaw pa Bartimo caah a herhmi a tuahpiak timi hi kan hmuh khawh mi a si. Zeidah in tuahpiak ninglaw na duh a ti tikah mitcaw pa Bartimo nih khua hmuhṭhan ka duh a ti. A cungah a herhmi thengte kha a chim i a hal tikah va kal kun; na zumhnak nih an damter cang e a ti. 

Dawtmi u le nau hna, nihin ah nang le kei kan hal tikah, thla kan cam tikah hin zumhnak he thla kan cam i kan Bawipa Jesuh Khrih kan Pathian kan hal a si ahcun nang le kei zong mitcaw pa Bartimo bantukin kan duh herhmi kha kan biakmi kan Bawipa kan Pathia nih a kan tuahpiak hrimhrim lai timi hi nihin ah thazaang laakṭi piak kan duh hna. A ngaitu nan dihlak cungah Bawipa nih thluachuah in pe ko hna seh!