Ramdang ah a peemmi hna le ralzaam hna kha kilven huhphenh awk ah le minung limhang (human dignity) kha upat awk Ethiopia Bishop hna nih  nawlnak an tuah

Ethiopia in ramdang ah a peem mi hna nih an herhmi bawmhchanhnak le huhphenhnak pek awk ah Catholic Bishops’ Conference of Ethiopia (CBCE) nih tuukhal rian dirhmun in nawlnak an tuah. Ethiopian tampi hna cu Africa, Middle East le Europe ah mipeem dirhmun an phan i ṭihnung ral le harnak tampi an tong. Mt 5:7 “Midang cungah zaangfahnak a ngeimi cu lunglawmmi nan va si dah! Pathian nih an zaangfah hna lai,” ti mi Bible cacaang hmang in, hi Ethiopian tampi nih ramdang i an peem le ralzaam dirhmun an phanhnak cu an mah duhthimnak si loin an nun himnak caah asi timi zong an langhter.

Mino tampi nih an inn le an lo, an khua an ram chuahtak in an innchungkhar pawcawmnak caah ramleng ah an chuak tiah CBCE nih a ti. Cu chinchap ah mi khua le mi ram an va phanh tik ah hlawhman hmuhlo, namneh le zawmhtaihnak, thahnawnnak tiang an i huah. Mipeem sinak le ralzaam dirhmun sinak nih minung limhang a zorter awk asi lo i, hi minung kan sinak limhang cu vawlei chawva le ramri nih a hlo kho lo tiah Ethiiopia Bishops nih nawlnak cathanh ah an telh chih.

Saudi Arabia ah tlaih a tongmi Ethiopian hna cu ṭihnung dirhmun ah an umnak le thah an si lai ti mi thawngpang ruang ah Ethiopia ram Bishop hna cu lungretheihnak an langhter i, cu bantuk thahnawnnak tuah lo ding in nawl ngeitu hna sin ah dengteo in zaangfahnawlnak an tuah. Dinfelnak cu zaangfahnak nih a zorter hlei lo pin ah lungrawhnak le khuaruahhar vansannak hmun ah ruahchannak a umter tiah an langhter.