Zei bantuk laksawng dah kan hmuh lai?

Nihin hi May-26, cawn nihnih ni a si i, hi ni ah kan relmi Cathiang chungin khan thlarau nunnak kha i laak usih. Kan relmi chungah cun pakhatnak ah 1Pet 1:10-16 tiang a si. Cun thawngṭha chungah Mk 10:28-31 tiang a si. Mk 10:28-31 chung ummi hi kan ruah hmasa a si ahcun hika ah zeidah kan hmuh ti a si ahcun; Jesuh zulh man timi hi tlangtar ah kan i laak kho. Kan Bawipa Jesuh Khrih nih zungzal nunnak co dingah khan zeidah tuah awk a si timi kha a chimh hna hnu ah Lamkaltu Peter nih zei a ti ti si ahcun Bawipa kan zeizongte kaltak dih in; kan inn kan lo kaltak in; kan nupi le kan fale, kan nu kan pa le kan u kan nau kaltak in nangmah kan in zulh. Kan in zulh caah hin zeidah kan hmuh lai? Zeidah laksawng kan hmuh lai? tiah khan Peter nih a rak hal. 

Hika ah Jesuh hi amah caah nunnak kan i pek i a rian kan ṭuan a si ahcun zei hlawhman dah kan ngah lai? timi hi Peter i bia a rak lehnak in Bawipa Jesuh Khrih nih fiang tein a kan chimh. A tawi zong a tawi fawn. Cucu zeidah a si ti ahcun ‘Keimah caah a inn a lo siseh, a nu a pa siseh, a fale si hna seh, a u a nau si hna seh a kaltak hna a hlawt hna a si ahcun; vawlei cung ahhin siseh, a ra laimi chan ah siseh a let zakhat in khan an hmuh hrimhrim lai’ tiah a ti. Hika ah hi vawlei cungah kan nun lioah a let zakhat le zungzal nunnak co awkah bia a kan kamh. Hi lengah zeidah a um rih ti si ahcun amah hi kan zulh lengah amah caah kan i pekchanh lengah hin zeidah kan pek rih lai ti si ahcun; hremnak, nautatnak, congawihnak te hna kha kan ton rih lai. Hremnak zong kha kan ton lai timi hi Bawipa Jesuh Khrih nih bia a kan kamh. 

Hika ah hlawhman hi kan ruah a si ahcun; hi vawlei cungah cun (တန်ရာတန်ကြေး) timi kha a um. Nikhat kan ṭuan a si ahcun nikhat ṭuanman kha hmuh a si. Suimilam pakhat chung kan ṭuan ahcun suimilam pakhat, ri an khiah mi a man te kha hmuh a si. Sihmanhsehlaw kan Bawipa Jesuh Khrih caah nunnak kan pek le kan hloh a si ahcun hi vawlei cungah kan pekmi kan hloh mi zat nakin khan a let zakhat in hmuhṭhan dingah khan bia a kan kamh. A caan caan cu (တန်ရာတန်ကြေး), tahchunhnak, keimah Bawipa rian caah ka nunnak ni cuzat ka ṭuan cang, cucun Bawipa rianṭuannak caah ka lo ka zuar, Bawipa rianṭuannak caah ka cycle ka zuar, ka motor ka zuar ti si ahcun amah motor man cycle man kan nihlawh man kha pek hau kan si men lai. Hi vawlei cung ahcun thil man an i pek ning cu khakha a si. Sihmanhsehlaw kan Bawipa Jesuh Khrih nih amah rianthiang a ṭuanmi hna cu le amah caah nunnak aa siangmi, siangṭam tein a pemi hna cu hi vawlei cungah a let sawmthum si lo, a let sawmruk si lo, a let zakhat bak kha a si. Cucaah hika ah hi Pathian rian kan ṭuan tikah hin a let in kan ṭuanman, kan pekchanh man le kan (စွန့်စား) man kha vun tuak a si ahcun a let hnih i vun cham ding hmanh khi kan i tlak theng lai lo. 

Sihmanhsehlaw hi vawlei cungah kan i tlak, kan i tlak lo timi kha cu Bawipa Jesuh Khrih a siannak lungthin le amah dawtnak nih khan (အတိုင်းအတာ) kha a pek i cuticun cham kan si. Cucaah dawtmi u le nau hna hi Peter nih bia a halnak in Bawipa Jesuh Khrih nih a rak leh bantukin khan zungzal nunnak le kan ṭuanman let zakhat hmuhnak hnga ding caah khan zeidah kan pek a herh ve ti a si ahcun kan thinlung dihlak, cucun kan inn kan lo, kan nu le kan pa, kan chungkhar kan unau kha kaltak kha a herh timi kha a si. Cucaah Peter nih, 1Pet 1:10-16 chungah kan rel tikah hin Peter nih a biapi bik ah Bawipa rianṭuan tikah ‘Be holy as I am holy’ tiah Bawipa Pathian nih a ti bantukin khan zei nan tuah mi poah ah khan a thiangmi si kha i zuam uh tiah khan a kan ti. Cucaah hi Bawipa rianthiang ṭuan tikah hin vawlei thilri zong kha kan i bochan lai lo, nu le pa zong kan i bochan lai lo, u le nau zong kan i bochan lai lo i Bawipa Pathian nih Fapa Jesuh Khrih sinin a rak phuan hnga dingmi (ကျေးဇူးတော်) timi Thiangthlarau ṭhawnnak le laksawng lawng kha kan i bochan dingmi cu a si. Cutiin a rianthiang kan ṭuan i pek tikah hin biatak tein ṭuanman kan hmuhnak hnga ding caah cun amah bawmhnak veel kha tlamtling tein khan kan i bochan a hau timi kha () i laak fawn usih. 

Nihin ah Bupi nih Mithiang Philip Nerri timi puai hi a kan tuahpiak. Cucu 1551 kum ahhin Siangbawi a cangmi a si i, Siangbawi a can hlan ahhin Rome khua ah ca a cawng i, mirang ca kha a cawnpiak hna i, a bikin mino tampi hna; sifak zong mirum zong kha ṭha tein a cawnpiak hna. A cawnpiakmi hna le a thil tuahmi hna kha Bupi nih a ṭhatuk tiah tha a pek hna i, Bupi nih zei a ti-Hi na rian hna i Siangbawi vun ṭuan law Siangbawi ṭuan pah in hi rian hi ṭuan law na hlawhtling deuh hnga tiah an ti i, annih nih 1551 kum ah Siangbawi a cang i cu hnu in khan sianginn te hna le thlacamnak inn te hna kha a tuah i, hlawhtling ngaite in khan rian a rak ṭuan timi kha a si. Cucu zei ruangah dah a si ti ahcun vawlei pumsa duhnak kha kaltak in, nu le pa kha kaltak in, u le nau kaltak in, inn le lo le cun hmuh hngami thlahlawh vialte kha kaltak in Bawipa caah a nunnak kha pe taktak in khan rian a rak ṭuan tikah khan a hlawh kha a tling deuh i Bawipa Pathian sinin khan thluachuah a hmu i Mithiang timi boih zong a rak ngahnak kha a si. 

Cucaah dawtmi u le nau hna, Bawipa rian hi kan i thawk a si ahcun amah caah khan Peter nih a kan chimh bantukin thianghlim tein kan ṭuan khawhnak hnga le nawlngainak in kan ṭuan khawhnak hnga zong kha a biapi tuk fawn. Cucun rian kan ṭuan tikah vawlei pumsa duhnak le nu le pa, hawi le kom kha i bochan si lo in khan Bawipa Pathian a veel zaangfahnak tu kan i bochan a si ahcun kan rianṭuan mi ahkhan tampi kha hlawh kan tling lai i, thluachuah kha tampi a let zakhat in khan kan hmuh lai timi kha (သင်ခန်းစာ) i laak usih.