Khamhnak cu Jesuh Khrih thawng lawngin hmuh khawh asi
Nihin ni caah kan nu Bupi nih a kan thimpiak mi (Mk 10:17-27) chungin thlarau thazang i lak hna u sih. “Jesuh cu khual tlawn ah aa thawh ṭhan i cu lio ahcun mipa pakhat a hung tli i a hmai ah a khuk aa bil i ‘Saya, nangmah cu miṭha na si. Zungzal nunnak hmuh awk ah zeidah ka tuah lai’ tiah a ti.
Mirum tlangval pakhat cu Jesuh Khrih sinah a va kal i ‘zungzal nunnak ka co khawh nak hnga zei dah ka tuah lai?’ tiah a ti. Hi biahalnak hi Khrihfa pakhat a simi nih cun hal awk tlak biahalnak a si tiah kan ti khawh. Zeicah tiah cun Jesuh nih “mi pakhat ni vawlei pi hi a ning pi in hei co hmanhsehlaw zungzal nunnak a sungh ṭung ah cun zeital a miak hnga maw?” a ti. Khrihfa kan si hnawh chanmi cu zungzal nunnak kan co khawhnak hnga ding caah a si. Cuasicaah, hi mirum tlangval pa biahalnak hi Khrihfa mi vialte hna aiawh in biahalnak a tuah tiah ti khawh a si.
Hi bialhal ning hi kan zoh tikah a ṭha ngaimi cu a si ko. Sihmahsehlaw bialhal ning caa aa palh tiah kan ti khawh ṭhan. Zeicah tiah cun “Zungzal nunnak ka co khawh nak hnga zei dah ka tuah lai”a ti. Hi mirum pa nih hin zungzal nunnak timi hi mah tuahsernak, mah zuamnak in hmuh khawh a si rua tuah ka ruah. Pathian bia nih fiang tein a kan cawnpiak mi cu “Zungzal nunnak hmuh khawhnak ding cu Jesuh Khrih zumh nak lawngin a si” timi kha kan Bible thiang chungah kan hmuh khawh mi cu a si. Johan 3:16 “Pathian nih vawlei hi a dawt tuk hringhran caah a Fapa ngeihchun te kha a pek. Cucaah Amah a zummi vialte cu zungzal nunnak an ngei lai” tiah a ti. Jesuh Khrih zumhnak thawngin zungzal nunnak ngeih khawh a si.
Pahnih nak ah Jn 6:29 chungah “Pathian nih tuah hna seh ti an duh mi hna cu a thlahmi zumh hi a si” tiah a ti. Rom 5:6 chungah “Zeihmanh a tuah kho lomi kan si ko lio ah khan cu caan theng te ah cun Khrih cu kan caah a thi” tiah a ti. Cucaah khamhnak kan timi cu kan mah nih kan tuah khawh mi a si lo. Jesuh Khrih zumhnak thawngin a si. Jesuh Khrih thisen thawngin co khawh mi a si timi kha kan cathiang nih fiang tein a kan cawnpiak mi cu a si.
Efesa 2:8-9 chungah “Khamhnak nan hmuh mi cu nanmah tuahnak thawngin asi lo” asi. Khamhnak kan hmuh mi cu Jesuh veel thawngin a si. Kanmah tuahser nak, zuamnak thawngin a si lo. Jesuh Khrih a thisen, amah nih a kan dawtnak thawngin a si. Hi hmun ah tuahsernak a hau lo tiin ka chim duh mi a si lo. Khamhnak kan timi cu minung nih kan tuah khawh mi a si lo.
Nihin kan relmi thawngṭhabia a donghnak ah “aho nih dah khamhnak cu a co khawh lai” tiah a ti. Jesuh nih a leh mi cu “Pathian nih a tuah khawh lomi a um lo” tiah a ti. Chim duhnak cu khamhnak kong he pehtlai in minung nih kan tuah khawh mi a si lo. Pathian nih a kan tuahpiak mi a si. Jesuh Khrih cu a ka khamh tu le ka Bawipa le ka Pathian a si tiah ka cohlaan, kan zumh i cuticun sacrament pakhat hnu pakhat kan co nak thawngin thlarau ah kan ṭhang chinchin, kan ṭhawng chinchin i cuticun kan nih hna zung zungzal nunnak a ngei mi kan si timi kha nihin ni caan ah thazang pek kan duh hna.