THLAURAU THAZAANG HRAWMNAK

Nihin ni i kan Bupi nih thawngṭha rel dingin a kan timhpiakmi (Jn. 21:15-19) tiang a si i a tawinak kan chim a si ahcun Jesuh nih Peter kha “na ka daw maw” tiah voithum a hal i Peter nih a voithum ningin kan dawt Bawipa tiah a leh i Jesuh nih na ka dawt a si ahcun ka tuu kha zohkhenh hna, ka tuu kha cawm hna tiah voithum rian a fialnak kong kha kan hmuh khawh. (Mt. 16:18) chungah kan hmuh khawhmi cu “cucaah nang cu lungtum Peter na si kan ti, cun hi lungpi cungah hin ka Khrihfabu hram ka bunh lai i cucu thihnak hmanh nih a tei kho lai lo” tiah kan Bawipa Jesuh Khrih nih a tinak kha kan hmuh.

Khrih ah dawtmi nu le pa, u le nau hna Khrih nih Khrihfa bupi cu a dirh ko ti cu ahohmanh nih al awk a ṭha lo. Bawipa Jesuh Khrih nih ka nunzia i cawn uh tiah a kan fial nain Khrihfabu dirh le Khrihfabu ser cu a kan fial lo. Jesuh Khrih lawnglawng nih Khrihfabu cu dirhnak nawl a ngeih i minung hna nih Khrihfabu cu dirhnak le sernak nawl ahohmanh nih kan ngei lo. Minung nih Khrihfabu a dirh i a ser a si ahcun Khrihfabu ti si loin minungbu ti a si lai i ram party ceoceo lawng a si lai i khamhnak caah san a tlai lomi a si lai. (1Kor. 3:11) chungah kan hmuh khawhmi cu Pathian nih Jesuh Khrih lawnglawng a hram ah a chiah cang i a hram dang zeihmanh chiah awk a um ti lo tiah fiang tein a kan ti. Cucaah cun Khrihfabu i a hram cu Jesuh Khrih lawnglawng kha a si i (1Kor 3:10) chungah “Kannih hna cu Pathian nih pahrang a kan pek cio ning bangin innsak thiam bantukin inn kan sa hna i sihmanhsehlaw zeibantuk in dah kan sak ti cu ahohmanh kan i relrin awk a herh” tiah mithiang Paul nih fiang tein a kan ti.

Nihin kan relmi Gospel, Johan thawngṭha chung i kan hmuh khawhmi ah Khrih nih a dirhmi, a sermi Khrihfabu chung i a ummi asilole a tuu kawm chung i a ummi a tuu hna kha cawm ding le zohkhenh dingin Peter cu voithum tiang nawl a pek, a fial ti kha kan hmuh. Khrihfabu ṭhit hruai dingah Lamkaltu hna cu Khrih nih a thim hna nain cu hna lakah mithiang Peter cu hruaitu bik a lubik ah a chiah ti cu fiang tein hmuh khawh a si.

A pakhatnak ah Khrih nih a Khrihfabu cu Peter cungah a dirhmi timi cu (Mt. 16:18-19) chungah fiang tein khan kan hmuh khawh. Lamkaltu hleihnih cungah a dirh lo. Lamkaltu hleihnih lakah pakhat aa telmi Peter cungah Khrihfabu a dirh.

A pahnihnak ah a nungmi Pathian Fapa Messiah kha na si tiah a ti. A ruang cu “Bawipa nangmah cu Profet pakhatkhat na si, tiah mi nih an in ti” tiah an ti tikah asiahcun nanih nih ta aho a si tiah nan ka ti dah tiah a ti bia a hal hna tikah Lamkaltu hleihnih lakah hleikhat nih an let kho lo i cu chungah aa telmi mithiang Peter nih cun nang cu a nungmi Pathian Fapa Messiah kha na si tiah a leh tikah kan Bawipa Jesuh Khrih nih mah na hngalhmi hi minung sining in na hngalhmi si lo, vancung i ka Pa nih hngalhnak an pekmi in na chimmi a si tiah a ti.

A pathumnak ah mithiang Peter nih Jesuh Khrih cu bia a leh ṭhanmi kan hmuh khawhmi cu (Jn. 6:68-69) kar ah aho sinah kan kal hnga, zungzal nunnak bia a ngeitu cu nangmah pei na si cu, atu cu nangmah hi Pathian sinin a rami mithiang na si kha kan zumh i kan hngalh cang tiah a ti. Jesuh Khrih nih kei cu vancung in a rung ṭummi nunnak tiah a ti i ka sa hi i lak ulaw ei uh tiah mi vialte a ti hna tikah hi pa nih hin zeitindah a sa cu a lak i a kan pek hnga a si kho lo tiah Jeush Khrih cu an kir tak dih i Lamkaltu hleihnih lawng an tang tikah Lamkaltu hleihnih hna cu Jesuh Khrih nih nanih zong nan kir ve lai lo maw? tiah a ti hna tikah at unai i kan relmi bible cacaang khan Jeush Khrih cu Peter nih khan zungzal nunnak bia a ngeitu cu nangmah pei na si cu, khoika dah kan kal hnga tiah mithiang Peter nih khan a leh. Amah fimthiamnak si lo, vancung in Pa sinin hngalhternak a si.

A palinak ah Lamkaltu hleihnih lak i a bau cangmi Judas Isgariot hmunhma rawlhtu dingah khan Mathias kha an thim i cu hmunhma rawlhnak ding caah cun biatung a dirhtu tlang a tlatu kha mithiang Peter ṭhiamṭhiam kha a si.

A panganak ah Jeush nih vancung pennak hunnak le hrenhnak tawhfung cu Jesuh nih Peter cu a pek. Jeush Khrih nih a nawlngeihnak vialte cu Peter a pek. Hi thil kan zoh tikah hin Peter cu hruaitu bikah Jesuh Khrih a tuurun hna cawmtu ding hruaitu ding tlangtlatu bikah a chiah ko ti cu fiang tein hmuh khawh a si.

Peter cu Catholic Khrihfabu nih Pope kan ti i cucu mirang holh a si i Latin in Papa ti a si i cucu a kan hruaitu bik kan pabik timi a sullam a si i Peter thawkin Pope Leo XIV tiangah a chanchan in rian a aiawhtu hna (267) tiang an um cang. Cu (267) hna a chanchan in nihin ni tiangah Khrihfa bupi Jesuh Khrih ah atu cu a cawm i a zohkhenh.

A pakhatnak ah zeitindah tuu hna cu ti le rawl in Peter nih a zohkhenh i a cawm hna kan ti a si ahcun Pathian kan zumh i tipil a kan pek tikah Pathian rocotu ah a kan canter.

Pahnihnak ah Khrih nih a tlan ciami hna sualpalhnak in kan thlarau a zawt ṭhan tikah sualthlahnak in ngaihthiamnak Pathian sinah a kan tuah piak.

Pathumnak ah Khrih i a ralkap ṭha nutling patling kan si nakhnga thluachuah a kan pek i Thiang Thlarau ṭhawnnak kan hmuh nakhnga thluachuah a kan pek.

Palinak ah Israel pupa hna nih an eimi mana changreu si loin Thlarau khamhnak, Thlarau nunnak taktak ah Bawipa thi le sa taktak in a kan cawm.

Panganak ah a thiangmi Pathian innchungkhat kan si nakhnga caah lehthahnak in chungkhat thiang a kan ser piak.

 Paruhnak ah taksa thlarau a zawmi cu Pathian min sahriak an culh hna i an sualnak ngaihthiam an si.

Pasarihnak ah Tlangbawi a simi Khrih nih amah aiawhtu ah tlangbawi rian Peter le Lamkaltu hna cu pek a si i Peter i nawlngeihnak le hruainak in mi vialte nih khamhnak kan co khawh nakhnga caah a changchang in tlangbawi rian cu pek a si i cu vialte cu Sacrament tiah kan ti i Sacrament i a sullam cu kan thlarau caah a luangliammi khamhnak a vel kan conak ti kha a si.

Cucaah cun dudawtmi u le nau, nu le pa hna Peter cu na ka daw maw? na ka dawt a si ahcun ka tuufa tete kha zohkhenh hna ka tuu kha cawm hna tiah voithum tiang Jesuh Khrih nih rian a fialmi cu hi Sacrament vialte hi tuahnak nawl an ngeih i kan thlarau khamh nakhnga ding caah a tuu vialte caah a kan zohkhenh i a kan cawm timi kha nihin kan relmi Bible i a sullam le cu bible nih fianter a duhmi cu a si.