MITHLI HE BAWIPA CU SUNPARNAK PE USIH.

Nihin kan thawngṭhabia relmi le kan cathiang (Lamkaltu bible) kan relmi pawl kha cheuhbouh kha kan duh hna. Kan nitinte pumsa caah tirawl kan herh bantukin khan kan thlarau nunnak ca zongah khan thlarau nih a pekmi thazaang kha kan herh. Nihin ka relmi cathiang ah hin thawngṭhabia hi zoh hmasa usihlaw, (Jn. 17:1-11) chungah zeidah kan hmuh kan ti a si ahcun hi thawngṭhabia chungah hin Bawipa Jesuh Khrih nih Pa Pathian sinah khan thla a camnak kong kha kan theih. Thawngṭhabia ka relmi vialte ah hin kaa dang kaa dang ahcun Bawipa Jesuh Khrih nih Pa Pathian sinah thla a cam timi hi kan theih tuk lo. Sihmanhsehlaw (Jn. 17) thawkin a dongh tiang hi Bawipa Jesuh Khrih nih Pa Pathian sinah Pa Pathian a thangṭhatnak le cucun duhherhmi caah thla a camnak kong kha kan theih. Nihin ah hin kan relmi cathiang ahcun kan Bawipa Jeush Khrih nih “Sunparnak kan pek bantukin hi vawlei ser hlanah nangmah he ka rak ngeihmi sunparnak phun kha rak ka pe ṭhan law” tiah khan Pa Pathian sinah khan thla a cam hnuah “hi na ka pekmi hna hi nangmah sinin a rakmi an si i cu na ka pekmi hna cu nangmah nih cucu cawnpiak hna law” tiah na ka timi kha kan chimh hna i ka ruah hna i nunnak ka pek hna” tiah khan Bawipa Jesuh Khrih nih Pa Pathian sinah a chim. “Cucaah hi na ka pekmi hna hi nangmah ta an si bantukin khan keimah ta zong an si ve” tiah a ti tikah khan Bawi Jeush Khrih nih Pa Pathian he pumkhat an sinak kha a langhter bantukin khan hika ah amah ta a simi kannih vialte hi Pathian nih a ngeihmi kan si timi kha a kan hngalhter. Cucaah “Pa le Fapa le Thiang Thlarua in tipil va pe hna u” tiah khan a ti bantukin khan Pa le Fapa le Thiang Thlarau min in tipil a ingmi vialte hi Pa Pathian i a ta lawngte Pa Pathian nih fanu/pa a ngeih mi lawngte kan si. Cucaah hika ah thawngṭha kan vun pehrih a si ahcun “Maw… ka Pa, anmah hna caah thla ka cam” tiah a ti. “Anmah hna caah thla ka cam” a timi cu amah thawngṭha a cohlang i a zummi vialte kha a ti. “Sihmanhsehlaw, vawlei caah thla ka cam lo” tiah a ti tikah khan amah thawngṭha a co duhlomi hna caah cun thla ka cam ti kha fiang tein a chim. Cucaah kan Bawipa Jesuh Krih nih hin hi Pa Pathian nih a pekmi fanu/pa vialte hna hi zeitindah a ti, “Aww…na ka pekmi thawngṭhabia, hiti hin cawnpiak hna law” tiah na ka timi kha ka chim hna, cucun an theihthiam dih nak hnga ka cawnpiak dih hna” tiah a ti. Cun lam ka hruai hna” tiah a ti. Cucaah hika ah kan Bawipa Jesuh Khrih nih hin Pa Pathian sinah a ta a simi vialte kha a kalpi hna nak ding caah khan amah a nunnak pek in khan le a ngeihmi a thisen zong kha luanter in khan a mi na caah khan a nunnak kha a pek i cun a thawngṭhabia zong kha an theihthiamnak hnga dingin khan a rak cawnpiak hna timi kha kan theih.

Cucaah Jesuh Khrih nih Pa Pathian sunparnak a peknak ning hi a fawite a si lo, fawi tein Pa Pathian hi sunparnak a pe lo. Harsa le Kalvary tlang cung i thisen luang tiang le cucun thangchiat mihuat tiang khan Pa Pathian kha sunparnak a pek timi kha kan theih. Cu bantukin nihin ah kan relmi (Lamkaltu cauk) chungah hin (Lam. 20:17-27) tiang ka relnak ah hin Mithiang Paul nih Miletas khua khan a chuah i Efesa khua a phan. Efesa khua a phanh tikah khan Efesa khua i Khrihfa upa hna kha a kawh hna i Khrihfabu ca i rian a ṭuan ning, a nunnak aa pek ning, zeizong vialte kha Pathian duhnak ningin a ṭunnak vialte kha a chimh hna. Hika ah a chimmi cu “Nanmah caah mithli he, cun tangdornak he, harnak a phunphun tuarnak he kan cawnpiak hna, kan hruai hna i cuticun Khrih nih a kan khamhnak kong” kha tehte khan in Jesuh Khrih caah sunparnak a peknak kong kha kan theih. Cucaah Mithiang Paul nih hin Pathian hi sunparnak a pek tikah Halleluia Halleluiah tiah khan Pathian kha sunparnak a pe maw? a pe lo. Mithli he kan cawnpiak hna tiah a ti. Cun harnak tampi he kan cawnpiak hna. Cun hremnak tampi ton in khan kan canwpiak hna tiah khan a ti bantukin khan hi Pathian rian a ṭuan tikah Khrihfa hna caah khan hi thawngṭhabia a rak phuan tikah hin mithli he a rak phun, cucun tukvelhnak tampi voitampi tuar in khan thawngṭha kha a rak phuan. Cucaah Mithiang Paul zong nih Pathian sunparnak a pek tikah hin fawi tein, dam le lawm tein khan a pe lo, harnak tampi he mithli luan buin cucun tukvelhnak buin, thisen luan buin khan Pathian kha sunparnak a rak pek bantukin khan nang le kei zong nih hi Jesuh Khrih cawnpiaknak in khan, a lamhruainak in khan Pa Pathian ta le Jesuh Khrih caah kan i can hnuah khan mithiang Paul bantuk in Pathian kha hlasak in kan thangṭhat lawng si loin, phungchim in kan thangṭhat lawngin si loin khan harnak tampi tuar in mithli tak bu zongin khan Jesuh Khrih caah tehte khan in khan Bawipa kha sunparnak pek cio ding khan kan sawm hna.

Cucaah cun vawlei cungah ka kaa lawng le ka aw ka zai lawngin khan le Guiter he Pathian thangṭhat lawng si loin khan kan taksa he, cucun kan mitthli he harnak ton buin khan Bawipa Jesuh Khrih kha tehte kan khan a si ahcun Bawpa Jesuh Khrih nih kan nunnak a dongh tikah khan a ziam kho lomi sunparnak phun kha a kan pek ve lai timi kha ruat usihlaw kannih nih lung donglo tein khan harnak ton buin khan Bawipa kha sunparnak pek i zuam cio hna usih.