Teitu lakah teitu kan si

Nihin ni caah kan nu bupi nih a kan timhpiakmi cathiang hna cu ( Lamkaltu 19:1-8, Jn 16:29-33) hna hi
an si.
Johan 16:33, Jesuh nih “Nannih nih keimah he nan i pehnak thawngin lungdaihnak nan hmuh nak
hnga hihi kan chimh hna. Vawlei nih hin harnak an pek hna lai. Sihmahsehlaw, ttih hlah u. Vawlei cu ka
tei cang” tiah a ti.
Nihin kan relmi thawngtthabia chungah Jesuh Khrih nih amah a zultu hna kha ‘ttih hlah u, vawlei cu ka
tei cang’ tiah thazang a pek hna nak kha kan hmuh. Khrihfa pakhat a simi nih harnak a tong lai lo timi
hi Bible cawnpiaknak a si lo. Ngeihchiatnak a tong lai lo timi zong hi Bible cawnpiaknak a si lo. Khrihfa
mi hna nih harnak zong kan ton ko lai. Ngeihchiatnak le ttih phan thla lohnak zong kan ton ko lai.
Sihmanhselaw, cu bantuk harsat, ttihphan, thlalauhnak nih cun kan nun a kan tei lo ding kha a biapi
mi cu a si. Kannih cu Jesuh Khrih teinak chungah a kal mi kan si i Jesuh Khrih teinak aa hrawmmi kan si
ahcun vawlei teitu cu nang le kei hi kan si hnga.
1John 5:5 chungah “Vawlei cu ahodah a tei kho? Jesuh cu Pathian Fapa a si tiah a zummi lawng nih
vawlei cu an tei khawh” tiah a ti. 1Jn 5:4 chung zongah “Pathian fa a simi paoh nih cun vawlei kha a tei
khawh” a ti. Vawlei kan tei khawhnak cu kan zumhnak hi a si. Vawlei kan tei khawhnak hi kanmah
tthawnnak in a si lo. Pathian kan zumhnak in a si. Jesuh Khrih he i pehtlaihnak thawngin vawlei cu tei
khawh a si. Cuasicaah, Jesuh Khrih loin kanmah tein zeihmanh kan tuah kho lo timi zong kha fiang tein
Jn 15:5 chungah a kan cawnpiak.
Ahohmanh ka chungah a um i kei zong a chungah ka um ahcun amah cu thei tampi a tlai kho mi cu a
si. Zeicah tiah cun keimah loin zei hmanh nan tuah khawh mi a um lo tiah a ti. Jesuh Khrih tel loin
zeihmanh kan tuah kho lo. Kannih cu Jesuh Khrih thawngin teitu kan si i, Jesuh Khrih thawngin a
luatmi, a nungmi kan si i, Jesuh Khrih thawngin Pathian Fa le kan si.
Jesuh Khrih teinak kan i hrawm khawhnak ding caah Paul nih Khrihfa bu sinah hitin ca a kuat. Filipi
1:18 chungah “Teinak petu cu Pathian a si” a ti. Teinak hi Pathian ta a si. Cuasicaah, Pathian tel loin
zeihmanh kan tuah kho lo. Zeihmanh kan si hna lo timi kha kan Bible cathiang nih fiang tein a kan
cawnpiak.
Kannih vialte hna zong nih vawlei pumsa duhnak kan tei i Setan ral kan tei khawhnak ding caah cun
Jesuh Khrih he i pehtlaihnak kan ngeih ding hi a biapi tuk mi asi. Jesuh Khrih loin zeihmanh kan tuah
kho lo. Kan cawlcang kho lo. Jesuh Khrih he kan i pehtlaihnak thawngin thei zong tampi kan tlai kho i
nu tling pa tling si khawhnak kan ngei. Jesuh Khrih he kan i pehtlaihnak thawngin Pathian Fa ka si i
teitu kan si. Cuasicaah, Jesuh Khrih sinah kan zeizong te ap u sihlaw nun kan i hrawm ve a si ahcun
teitu lak ah teitu kan si ko lai.
Isarael miphun hna hi ral tampi an rak do i a caan ahcun an sung, a caan ahcun ral tampi an rak tei. Zei
ruangah dah ral an sungh ti a si ahcun, anmah tthawnnak, anmah thil ti khawhnak an rak i bochan i
anmah hriamnam an rak i bochan i cuticun ral a rak doh tik paoh ah Israel miphun hna hi ral a rak sung
ti kha kan hmuh. Sihmahsehlaw, biakam kuang kha an i put i ral an tuk tikah an ral vialte kha an rak tei
hna.
Mah nih zeidah a langhter? Kanmah thil ti khawhnak in vawlei hi tei khawh a si lo. Pathian thawng
lawnglawng in vawlei cu tei khawh a si.
Nikhat ah St. Francis cu biakinn rawk cang mi chungah a lut i thla a cam. Cu biakinn chungah cun
vailam tah pakhat te kha a rak um. Cu vailam tah cu zoh buin thla a cam i cuticun vawlei pumsa
duhnak vialte kha a tei khawh dih. Cu hnu ah khuazakip kal in Pathian thawngtthabia a au pi i thlarau
tlau tampi kha Pathian sin ah a kir pi tthan hna ti a si.
Kannih vialte hna zong vawlei pumsa duhnak vialte kan tei khawhnak ding caah cun kan Bawipa Jesuh
Khirh kha kan vailam put buin kan zulh i Jesuh Khrih a teinak chungah kan kal ve lawngah kannih vialte
hna zong teitu lakah teitu kan si kho lai timi kha thazang pek kan duh hna.