Bawipa Vancung Kai nak Zarhpi Ni
Bawipa vancung kainak puai kan tuah mi cu a sunglawi ngai mi puai a si. Jesuh cu van in a rungṭum, vawlei ah thawngṭhabia a chim i a thihnak a in, a tho ṭhan i vancung ah a kai ṭhan. Vancung a kai hnu ah bia a kamh tak mi Thiang Thlarau kha a zultu hna sinah a rak thlah ṭhan. Jesuh cu vancung a kai hnu ah ngahṭah bangin a kan chiah tak si loin Thiang Thlarau in zungzal in a kan um pi ko timi zong kha zumh ding a si.
Fr. Walker nunnak tein tlawm tein zoh hna u sih. Mah Father pa cu Russia ram ah thong a rak tla. Mosco khua thonginn pi chungah kum 5 chung a rak um. Cu hnu ah Siberia zongah thong kum 10 tiang a rak tla. 1963 kum ah Russia thonginn in a luat. USA nih Soviet thil ngia(spy) pahnih hna he amah cu an rak tlanh. 1984 kum, kum 84 a si ah ah amah cu a thi. A thih hlan te ah bia an hal mi cu: “Father, zeitin dah mah tluk in a har mi hi na in khawh ning a si” an ti. A leh mi hna cu “Zeitluk harnak ka ton hmanh ah Khrih cu ka sinah a um zungzal ko timi kha ka philh bal lo” tiah a ti hna. Mah ruangah thonginn chung zongah saupi in ka um khawhnak a si a ti. Pathian cungah ka zumhnak cu zeitik hmanh ah ka philh bal lo tiin tehte a rak khan.
Nihin ni zong kan kannih hna zong Pathian cu Thiang Thlarau in kan sin ah um zungzal ko timi kha philh hna hlah u sih. Eph 1:20 ah “Pa Pathian ṭhawnnak in Jesuh cu thihnak in a thawhter bantukin vancung a kai nak zong Pathian ṭhawnnak in a kai” a ti. Hi thil sining cu Pathian ṭhawnnak ruangah a si. Kan sinah Pathian ṭhawnnak, Pathian nunnak a um a si ahcun harnak phun zakip kan in khawh ko lai. Kan tei khawh ko lai timi kha philh hna hlah u sih.
Lamkaltu 1:8 “Thiang Thlarau nan cung i a tlun tikah cun, ṭhawnnak in nan khat lai i Jerusalem khua le Judea ram khuazakip ah ka tehte nan si lai” tiah a ti. Kannih hna zong tipilnak kan in lio le Confirmation, Thiang Thlarau thazang peknak kan hmuh lio ah hin Thiang Thlarau ṭhawnnak cu kan co ve hna. Jesuh Khrih nih bia a kan kamh tak mi “Nan sinah zungzal in ka um lai” a timi kha zum hna u sih.
Thiang Thlarau ṭhawnnak cu Pathian Bia thiang kan ruah-rel lio, kan duhnak kal tak in Pathian duhnak kan tuah, kan zulh lio caan, Amah Pathian caah harnak kan in lio ah khan Thiang Thlarau ṭhawnnak cu kan sinah a um taktak ko. Mithiang hna nunnak, Pathian duhnak a zultu hna nunnak ah hin Thiang Thlarau ṭhawnnak cu kan hmuh. Khrihfa hna nih kan nun ding nunzia zong asi.
Bawipa vancung a kai hnu ah zultu hna cu ni 9 chung inn kharkhumh in thla an cam. Thiang Thlarau Pathian an sin thlah a si lai ding kha an hngah. Bawipa vancung a kai nak cu kanmah hna Pathian fa kan sinak a langhter chinchin nak zong a si. Kan i ruahchanmi nikhat vancung Pennak chungah kan lut lai timi kha Khrih nih bia a kan kamh mi Thiang Thlarau thawngin Jesuh duhmi nunzia in nun khawh i zuam hna u sih. “Cun hihi philh hlah u: nan sinah a zungzal in, caan dongh tiangin ka um lai.”