PATHIAN PAKHAT CUNG ZUMHNAK HMANNING
Pathian pakhat cungah zumhnak le dawtnak nih kan nunnak ah khuaruahhar thil lianngan a chuahpi. Cun Pathian i a lianngannak le cungnungbik a sinak kha hngalhnak a si. “Zohhmanh u, Pathian cu a lianngan tuk i kannih nih kan rak hngal lo” (Job. 36:26). Cucaah kannih nih Pathian rian kha kan ṭuan hmasa awk a si. (Joan of Arc).
Lawmhnak in a kan nun ter. Pathian hi pakhat lawngte a si caah kan sining vialte le kan ngeihmi vialte hi amah sinin kan hmuh dih. “Hmuh lo in na ngeihmi zeidah a um? (1Cor. 4:7)”. “Ka cung i a ṭhatnak vialte caah Bawipa kha zeidah ka pek lai?” (Ps. 116:12).
Minung vialte pumkhat kan sinak le kan minung si man cio a kan hngalh ter. Minung vialte cu Pathian muisam he aa lo in ser kan si (Gen. 1:26).
Sermi thil vialte kha ṭha tein hman awk a si. Pathian zumhnak nih Pathian he a kan naihter mi thil vialte kha ṭha tein hman awk le amah he a kan ṭhentertu thil vialte kha hrial awkah a kan hruai. (Mt. 5:29-30, 16:24-26). Zeizong vialte ah Pathian kha i bochan awk a si.
“PA LE FAPA LE THIANG THLARAU MIN IN”
Khrihfa mi hna cu Pa le Fapa le Thiang Thlarau min in tipil pek an si (Mt. 28:19). Tipil an in hlanah Pa le Fapa le Thiang Thlarau cungah an zumhnak an phuan hmasa. Khrihfa mi vialte zumhnak cu Thumkawmh Pathian cungah a si.
Khrihfa mi hna cu Pa le Fapa le Thiang Thlarau min in tipil pek an si. An min cio in pek an si lo. Zeicahtiah Pathian cu pakhat lawng a um i zeizong tuah kho, Pa, a Fapa ngeihchunh le Thiang Thlarau Thumkomh Pathian a si.
Thiang bik Thumkawmh biathuk hi Khrihfa zumhnak le nunnak laifang ah a um. Mah hi Pathian chungah a ummi Pathian biathuk a si. Cucaah mah hi zumhnak biathuk vialte an chuahnak a hrampi a si, ceunak a petu ceunak a si. Khamhnak tuanbia cu Pa le Thiang Thlarau nih minung sinah a phuannak le sualnak in a rak kirmi hna kha amah he aa rem ter hna i a kawmh ter hnanak kha a si.
Thumkawmh Pathian kong hi zumhnak biathuk taktak a si i, Pathian nih a phuan lo ahcun ahohmanh nih hngalh khawh awk a si lo. A ngaite ahcun sernak rianṭuannak le Biakam Hlun chung biaphuan chungah Pathian nih Thumkawmh a sinak kha a nehnang a chiah tak ko cang. Sihmanhsehlaw a thiangmi Thumkawmh Pathian kong hi Pathian Fapa minung a can hlan le Thiang Thlarau thlah a si hlan ahcun midang ruahnak cu chim lo Israel zumhnak hmanh nih a rak banh khawh lomi biathuk a si.