Zeitluk in harnak kan ton hmanh ah Pathian nih teinak a kan pek ko

RVA ah thawngṭha a ngeitu dawtmi u le nau vialte hna, nihin cu May thla 12, cun Paschal zarh(6) nak i cawn nihnihnak kha kan phanṭhan cang. Nihin i thawngṭha kan relmi siseh, cucun a dang Lamkaltu cauk chungin siseh thlarau tirawl ah cheuhbauh kan duh hna. 

Nihin ah kan relmi le kan ruah hnga dingmi hi kan hnu zarh i kan chimmi he khan tlawmpalte aa lo pah tawn. Zeicah kan ti si ahcun kan hnu zarh zong ahkhan Mithiang Paul nih hremnak a ton le tuknak, velhnak a ton hnu ah anih nih Pathian kha a thangṭhat i Pathian bia kha lungdong lo tein le Pathian thangṭhat pah in khan a chimnak le a awngminnak hna kha kan chim cang. Nihin kan cathiang zong ah hin a hmasabik ah Thawngṭhabia hi kan vun a si ahcun Jn 16:5-11 ahkhan kan rel i, cu chung ahcun a tawinak in ka vun chim a si ahcun; Bawipa Jesuh nih nan sin in khan ka kal lai i bawmtu thlarau kha nan sinah ka rak thlah lai tiah khan a ti. Bawmtu thlarau kha nan sinah a rak rat tik ahcun zeizong vialte kha an cawnpiak hna lai tiah khan a ti bantukin khan, hi bawmtu thiangthlarau nihhin a bikin Mithiang Paul siseh, cucun a dangdang Johan le Peter zong kha a bawmh hna i bawmtu thiangthlarau thapeknak thawng in khan hremnak lakah Pathian kha an thangṭhat. 

Bawipa Jesuh Khrih nih amah thawngṭhabia ruangah harnak kan ton, tonnak caanṭha kan hmuh caah Bawipa kan lawmh, Bawipa kan thangṭhat tiah an rak thangṭhat bantukin khan kan hnuzarh ah Mithiang Paul nih Bawipa caah a tuar mi a nganfahnak vialte kha, kha cahkhan Pathian kha lawmh buin mi vialte sinah zum lomi vialte hna sinah khan harnak a tonnak kong kha a chimh hna. Lunglawm thanuam tein khan a chimh hna tikah lunglawmhnak in khan Pathian a thangṭhat mi kha mi tampi nih an cohlan i minung zultu tampi kha a ngah hna timi kha kan hnuzarh ahkhan kan chim cang. Nihin zong ahhin Mithiang Paul le Silas nih Bawipa Jesuh Khrih ruangah hi Thawngṭhabia ruang ahhin tukvelhnak fakpi in khan an tuar hnu ah thongthlaknak kha an tuar timi kha kan hmuh. Paul le Silas nih tukvelhnak le thongthlaknak an tuar tik ahhin an lung a dong maw? An bei a dong maw? Hnulei an kir maw ti tikah an kir nemmam lo. Hnulei an kir lo lengah zei an tuah? Pathian sinah ṭhawnnak kan peṭhan ko, thazaang kan peṭhan ko, kan hmur kan kaa, kan lei kan dang thluachuah kan pe hram ko tiah thla an cam i cu lengah Bawipa Pathian caah hibantuk kan tuarmi a si caah khan Pathian thangṭhatnak kha Salm hla in khan an sak tikah khan mi tampi nih thongtla mi vialte zong nih khan an ngai hna e ti kha kan theih.

Dawtmi nu le pa u le nau hna, Paul le Silas nih bawmtu Thiangthlarau pekmi ṭhawnnak in khan Pathian kha an thangṭhat, an chimthiam hnu ah thonginn cawngtu pa nih ‘aw, thongtla mi pawl an chuak dih cang lai hi ta’ tiah a ti. Cu hlan deuh ah vun chimṭhan ka duh mi cu Mithiang Paul le Silas nih Pathian thangṭhatnak hla kha an rak sak i Pathian kha an lawmh tikah zeidah a cang? Bawmtu thlarau nih a umpi hna tikah khan an thlacamnak le Pathian an thangṭhatnak kha a sawhsawh ahkhan aa cang ti lo i hmual ngei ngaiin khan rian a ṭuan timi kha kan hmuh. Cucaah thonginn kha aa bauh dih, aa ong dih, tawh an hrenh mi zong aa ong dih, aa bauh dih. Cun Paul le Silas zong, cun a dang thongtla mi vialte hna zong kha an hrennak cikcin vialte kha anmah tein khan aa phoih dih timi kha khuaruahhar tuk in khan a hmuh tikah thonginn cawngtu pa zong kha a ṭihtuk tikah khan keimah tu hi an ka tlaih lai i, na daithlang tiin khan an ka ti lai i an ka tlaih sual lai ti kha a phan tuk tikah khan amah le mah kha nam in khan i sat le mah le mah kha thah kha aa tim. 

Hika ahhin Mithiang Paul nih hi thonginn cawngtu pa hiti i aa tuah ning hi a hmuh tikah a lung a tling maw ti tikah, aaa si lo, si lo, tuah hlah, khoi hmanh ah kan kal lo, hika ah kan um ko hih, nangmah le nangmah zeihmanh ah i tuah hlah tiin khan hi thonginn cawngtu pa i amah le mah aa thahnak ding khan a khamh. Cu tikah dawtmi u le nau hna, Mithiang Paul nih Silas nih hi thonginn cawngtu pa hi an lungawi in khan amah le mah kha i that seh tiin khan an lungawi hnga maw? an lungawi nemmam lo. 

Cucaah bawmtu thiangthlarau rianṭuannak thawngin khan annih nih hi amah le mah aa tuahhmuahnak hnga lo tiin khan a nunnak kha an rak khamh. Amah le amah aa thahnak ding khan an rak khamh i a nunnak kha an rak zuah. Khatikhan thonginn cawngtu pa nihkhan a lung a tling tuk i a hnangam tuk i khatikhan Paul le Silas kha thonginn lengah a hruai hna i an hma kha a buahpiak hna i ka saya le hna ka bawile hna, khamhnak co awkah zeidah ka tuah lai tiah a ti hna tikah khan annih nih zumtu ah i cang law tipi ling tuah tiah an ti i an cawnpiak i, khakhan amah le a innchungkhar dihlak kha Khrihfa ah an lut dih timi kha kan hmuh. Dawtmi u le nau hna, hika ah Paul le Silas cu thawngṭhabia caah, Jesuh Khrih caah khan fakpi in an tuar, tukvelhnak ṭhalo te kha an tuar ko nain khan khakha Pathian sinah an lawmh i Pathian an thangṭhat i inkhawhnak tuar khawhnak tu kha Pathian sinah an hal tikah khan an thlacamnak le Pathian sin an thangṭhatnak kha Pathian nih zeitindah a cohlan ti kha an rianṭuannak kha a theipar tampi kha a chuahter timi kha kan hmuh. Cucaah thonginn cawngtu pa le amah le a chungkhar unau vialte hna zong kha Khrihfa ah an cang dih i an piantharnak, an lungthlennak puai zong kha an tuah timi kha kan hmuh. 

Dawtmi u le nau hna, kannih vialte zong nih Mithiang Paul le Silas bantukin khan kan zumhnak caah Pathian caah Jesuh Khrih caah kan tuarmi vialte hi lungsau thinfual tein khan kan tuar khawh le Pathian kha kan thangṭhat khawh a si ahcun hi kan in kan tuar mi vialte caah hin Bawipa nih a hlei in khan a let tampi in khan thluachuah a kan pek lai. Kha thluachuah a kan pekmi kha kanmah thlarau khamhnak caah a si lengah khan kan pawngkam ummi hna caah i thlarau caah khan a si fawn lai timi kha kannih nih i laak usihlaw kannih nih Jesuh Khrih caah kan tuarmi kan temhmi vialte zong kha Mithiang Paul le Silas bantukin khan lungsau thinfual le Pathian thangṭhat buin khan cohlan i zuam usih timi kha forh kan duh hna. Kaa lawm.