Thiang Thlarau in lawmhnak
Nihin cu Jesuh Khrih a thawhṭhannak zarh(6)nak kan phan ṭhan cang hna. Kan rel hnga ding mi cathiang hna cu (Lamkaltu 8:5-8,14-17; 1Pet 3:15-18; Jn 14:15-21) hna hi an si.
Philip nih Samaria mi hna sinah thawngṭhabia a phuan tikah annih hna zong nih lunglawm thanuam in an rak cohlaan ve. Peter cakuat zongah “Nan lungthin chungin Khrih kha upat u law nan Bawi ah ser u. Ruahchannak nan ngeihmi kong kha kan chim tuah u tiin mi nih an hal hna tikah, zeitik caan paoh ah chim dingin um u” tiah a cawnpiak hna. Mah nih a langhter mi cu “mi vialte sinah Thiang Thlarau ṭhawnnak in cawnpiak hna awk le Khrih nunnak kha ṭhenh hna awk ah” a kan sawm mi a si. Cun Khrih kong nan chim tik zongah ‘nem nak le hmaizahnak in chim u’ tiah a ti rih. Toidornak lungthin le dawtnak lungthin, hmaizah upat nak lungthin he Khrih kong kha midang sinah chimphaun ding kha a chim duhnak a si. Jesuh nih ‘bawmtu Thiang Thlarau ka rak thlah lai’ tiah bia a kan kamh. Chim duhnak cu ‘nanmah lawng nan si lo, nan sinah ka um zungzal lai, bawmtu Thiang Thlarau a ra lai’ tiah a chimmi kha a tlinternak hnga ding caah a si. Kanmah lawng kan si lo. Jesuh Khrih cu nihin kan sinah a um taktak ko. Lunglawm thanuam tein um zungzal hna u sih. Thiang Thlrau Pathian cu lunglawmhnak petu thlarau a si. Thiang Thlarau nih a kan pekmi lawmhnak cu chikhat ca lawngah a si lo. Zungzal caah a si. Jesuh nih ‘ka nawlbia a zul i a tuah mi paoh cu a ka daw mi an si’ tiah a ti. Jesuh nih a kan um pi, a kan bawmh zungzal caah i lawm u sih law i nuam hna u sih.
Khrih kan cohlan kan ti ṭung nain nihin kan vawlei pi ah Jesuh Khrih nunzia kha kan ngei kho taktak hna maw? Thiang Thlarau a ngei taktak mi hna cu Khrih cawnpiak mi le a nawl kha a zul mi an si, a tuah tu an si. “Pathian duhnak kha nan duhnak nganbik ah a chia mi le a tuahmi hna cu lunglawm mi nan si” tiah a timi kha nihin kan nih hna nih kan herh taktak mi cu asi. Kan duhnak si loin Pathian duhnak timi kha fiang tein kan theih a herh. Mah duhnak zul loin Pa Pathian duhnak a tuah kho taktak dih tu cu Jesuh Khrih lawnglawng asi. Amah sinah bawmh kan hal a si ahcun kannih hna zong kan duhnak kha kan chiah tak khawh ve lai i Pathian duhnak kah kan tuah khawh ve lai. Jesuh nih thil pakhat tuah a timh tikah Pa Pathian sinah thla a cam, bia a ruah. Kannih zong Pathian sin thlacam kan herh ve. Bia ruah kan herh ve. Cu bantuk si ning lawngin Pathian duhnak kha kan tuah khawh ve hna lai. Kanmah duhnak kanmah lungthinnak timi lawng thlacam kan timh a si ahcun kan thlacam zong a tling lai lo. Farasi pa le ngunkhuai khawltu pa thlacam ning kan zoh tikah ‘zeibantuk hi dah Pathian duhmi thlacam ning cu a si’ timi zong fiang tein hmuh khawh asi ko.
“Ka nawlbia kha a cohlang i a zulmi paoh paoh cu keimah a ka dawmi an si. A ka dawmi cu ka Pa zong nih a dawt ve hna i Keimah le Pa, amah sinah kan i phuang lai” tiah Jesuh nih a ti. Kan i phuang lai tiah a ti tikah, kan nunnak ah tukforhnak tam hmanhsehlaw, Jesuh bangin kan tei khawh ve lai tinak a si ko. A ka dawmi hna sinah “ka Pa he kan ra lai i a sinah kan um lai” tiah a timi nih hin amahkhaan nak fek taktak in a kan pek. Cucu kan himnak hnga ding caah a si.
Jesuh nih a si a timi cu a si taktak mi a si. Changreu le mitsur hang kha a lak i “mah hi ka pum, mah hi ka thi a si” tiah a timi cu a si taktak mi a si. Jesuh a dawtu hna nih Jesuh chimmi kha biatak tein an zumh. “Ka Pa he kan ra lai i kan um lai” tiah a timi bangin Jesuh a zumtu hna sinah a um taktak ko. Cun “Ka Pa nih a hnuh hna lomi paohpaoh cu ka sinah an ra kho lo” tiah a ti. Zeitluk hmanh in ka zumh kan ti ko hmanh ah “Pa Pathian nih a hnuh hna lo ah cun” Jesuh Khrih thisa sining ah an zum kho lai lo.
Dawtmi u le nau hna, Khrih kan dawt taktak a si ahcun Thiang Thlarau kan sinah a um ko lai. Jesuh cawnpiak mi vialte hna zong kan cohlan khawh hna lai i kan zumh, kan zulh khawh ko lai. Vawlei pekmi harsatnak hna zong nuam tein in-tuar khawhnak thazang zong kan ngei hna lai. Cuasicaah ‘I law hna u sih law i nuam hna u sih.’ Thiang Thlarau ah aa lawmmi hna cu Jesuh Khrih Thlarau ah a um, a nung mi an si.