Zumhnak in nunnak ah
Nihin voikhatnak Bible kan relmi (Lamkaltu 2:1-10 ;Jn 15:18-21) hna hi an si.
Jesuh ruangah na lung a dong maw? Na lung dong hlah; Vancung khua kalnak lam cu Vailamtah lam a si timi hin thazaang la hna usih. Kan Bawipa Jesuh nih hitihin a chim. Lk 9:23 ah ‘Zulh a ka duh mi poah nih nifa tein nan Vailam kha nan i put lai i, nan ka zulh lai’ a ti. 2Tim 2:12 ah ‘Kan in khawh peng ahcun a uk zong amah he kan ukṭi lai’. 2Corin 1:5 ah ‘Khrih a temhinnak kan hrawm ahcun a sunparnak zong kan hrawm ve lai’. Jesuh ruangah na lung a dong maw? Na zumhnak a rawk maw? Mithiang Paul nih hitihin a chim; ‘Jesuh ruangah zeinih dah a kan ṭhen khawh lai; harnak nih maw, temhinnak nih maw, hremnak nih maw, rawlṭamnak nih maw, thihnak nih maw; Zeital nih a kan ṭhen kho hnga maw; Zeihmanh nih a kan ṭhen kho lai lo. Hi thil vialte chung ahhin a kan dawtu thawngin kannih cu teitu hna lakah teitu kan si’ a ti.
Rome Siangpahrang nih Jesuh zumhnak ruangah a thahmi Pecamus khuami Bishop Capas a zumhnak kha tawi tein langhter ka duh. Jesuh ruangah Rome Siangpahrang nih Bishop Capas cu a tlaih i Vailam a tah, thir cikcin in a khih, a vun kha a hlai i cite a phulh, a tuk, a hrem, a phunphun in a cawhdeh, a sersat. Siangpahrang nih ‘Jesuh hi na hlaw lai maw, na hlawt a si ahcun na nunnak kan pek ṭhan lai a ti’. Bishop Capas nih ‘kei cu Jesuh ta ka si’ tiah a ti i Rome Siangpahrang nih a thah. Nihin nang le kei tah aho ta kan si, nihin na fiang cang maw? 1Cor 19 ah man in cawkmi Jesuh ta kan si. Jn 17:14 ah ‘Kei cu vawlei ta ka si lo bantukin annih zong hi vawlei ta an si ve lo. Cucaah vawlei nih a huat hna a ti’. Jesuh ruangah na lung dong hlah. Mithiang Francis cu mirum fa a si.
Nikhat cu Daniel Biakinn ah thla a cam lioah Jesuh he an i tong. Jesuh nih a rawk cangmi Bupi kha serṭhan law a ti. Mithiang Francis nih misifak a bawmh hna, ei awk din awk a ngei lomi kha ti le rawl a pek hna. A pa nih a hmuh tikah Francis cu ‘hi bantukin na um a si ahcun inn le lo siseh, chaw le va siseh zeihmanh kan pe ti lai lo. Nihin na hni le na puan vialte ka pe dih’ a ti i Francis nih a pa hmai ahkhan a hni le a puan vialte kha aa phoih dih i a pa kha a pek. Francis nih a pa sin a chimmi cu ‘hi vawlei ah ka pa na si, atu cu vancung khua ah a ummi ka pa kha ‘Ka Pa’ tiah ka auh cang lai a ti’. Nihin Jesuh zumhnak ruangah Jesuh biaknak ruangah nu le pa u le nau hawi le kom le uktu bawi hna nih huatmi hremmi tukmi soiselnak a phunphun a tongmi tampi ko lai. Sihmanhsehlaw na lung dong hlah. Zeicahtiah keimah ruangah a lung a dong lomi cu thluachuak mi a si a ti. Keimah mi nan si ruangah mi nih an in huat lai.
Nihin kan Thawngṭhabia James 1:2-4 chung zongah ‘nan cungah hneksaknak a phunphun a tlun tikah vanṭha ah i rel u; a dongh tiang ing ko u’ tiah Mithiang James nih a kan cawnpiak. Vancung kalnak lam cu Vailam tahnak lam a si. A ngaitu nan dihlak cungah Bawipa nih thluachuah in pe ko hna seh.