A sunglawi bik mi Dawtnak
Nihin ni i Bupi nih thawngṭha rel ding a kan timhpiakmi (Jn. 15:12-17) tiang a si. Cu chungah kan hmuh khawhmi cu kan Bawipa Jesuh Khrih nih, “Keimah nih kan dawt hna bantukte hin pakhat le pakhat i daw u. Mi nih a hawile caah dawtnak ngan bik a ngeih khawhmi cu an ca i a nunnak a pek hi a si” tiah kan Bawipa Jesuh Khrih nih a kan cawnpiakmi kha kan hmuh khawh.
Kan Bawipa Jesuh Khrih nih fianghlang tein nawlbia a kan cahmi cu, “Keimah nih kan dawt hna bantukte hin pakhat le pakhat i daw u” tiah a kan timi hi a si. Pumpak chungkhar funtomnak phu, Khrihfabu, ram le miphun, vawleipi a ngan a dam lonak cu kan Bawipa Jesuh Khrih i a kan fialmi a nawlbia kan zulh lo ruangah a si ko. Minung hi a hopaoh i rak dawtmi, rak sunhsakmi le hnak kar tenhmi si cu kan rak duh cio. Chungkhar ah nupi le nih pasal le kha na ka daw lem lo ti le vale zong nih nupi le kha na ka daw lem lo, keimah nih kan dawt deuh, nangah nih na ka dawt nakin keimah nih kan dawt deuh ti le chuahpi unau rual lak zongah kei cu ka u, ka nau rual lakah nan ka thleidan, nan ka daw lo tiah nu le pa cu dawtnak kha leiba bang cawh kan hmang tawn. Khuami le Khrihfabu chung zongah kei cu hmeinu hmeipa le misifak mi tangbung ka si caah an ka philh thlau, an ka hrelh tiin mi i rak dawt ding kha kan hlam tawn. Sihmanhsehlaw, Khrih nih a kan dawt zungzal ti kha philh hlah usih.
Khrih i a dawtnak chungah kan um ding kha a biapi tukmi a si. Khrihnak a kan dawtnak hi ruang ngei lo a si i vailam cung in ka tlanh hnga dingmi minung hna nih hin an ka dawte hnga maw dawte hnga lo tiah sipuazi thinlung he Jesuh nih a kan tlan lo. Minung hna i kan i dawtnak tampi kan hmuh khawhmi cu a ruang cungah aa hngat tawn. Sihmanhseh, Khrih nih a ngeihmi a kan dawtnak cu a ruang lo tein Jesuh Khrih nih a kan dawt, a ruang lo tein mi cungah dawtnak ngeih ding kha a kan fialmi a si. Mi sinin dawtnak hlamtuk hlah usih. A kan daw pengtu Khrih kan ngei peng ko caah kan hna ngam ko usih. Kanmah tu nih min cungah dawtnak va ngei ko usih. Cucu Khrih nih a kan fialmi dawtnak cu a si.
Voikhat cu unau pahnih hna an um i a nau pa cu thi aa nehmi le a vainam he a upa sinah a rak rat tikah “Ka u mi ka that cang” tiah a ti. A upa nih a naupa cu dawtnak thinlung he a vun zoh tikah “ka nau naa hrukmi thi aa nehmi na hnipuan kha a pe law i hruk lang. Thi aa nehmi na nam kha a pe law i put lang” tiah a ti i a naupa nih aa hrukmi thi aa nehmi hnipuah cu a phawih i a upa nih aa hruk i thi aa nahmi vainam cu a upa nih aa put. Amah tlaih dingah a rak dawitu police hna cu an sin an rak phak tikah tehte thatukmi kha a upa nih aa hrukmi le aa putmi nam ah an hmuh tikah a upa cu, “mithat na si” tiah taza zungah an chuahpi i a upa cu “thih awk naa tlak” tiah a sangbik mi biaceihnak kha a ing i a upa cu an thah. “Mi a hawile caah dawtnak ngan bik a ngeih khawhmi cu an ca i a nunnak hi a si” tiah a ti. Cucu kan Bawipa Jesuh Khrih nih kan caah a nunnak a pekmi hi a si. A sunglawi hringhranmi a kan dawtnak a si.
U le nau, nu le pa hna Khrih nih a kan dawtnak hi a muithlam meng lawng si loin, hmur le kaa lawngin si loin amah hrimhrim temhinnak he vailam cungah kan caah thihnak a tuar. (1Jn. 3:18) chungah “Ka fale hna kan i dawtnak hi hmur le kaa lawngin a si awk a si lo. dawtnak taktak thil tinak ah a langmi dawtnak a si awk a si” tiah Mithiang Johan nih bia a kan cah. Cucaah cun duhdawtmi nu le pa, u le nau hna kan Bawipa Jesuh Khrih “keimah nih kan dawt hna bantukin pakhat le pakhat i dawt u. A hawile caah a nganbik a ngeih khawhmi cu an ca i a nunnak pek a si” a ti bantukin a ruang umloin kan Bawipa Jesuh nih a kan dawtnak kha ruat in a ruang ngeimi si loin kan hawilei, kan innpa kan chakthlang, kan innchungkhar dawt khawh i zuam hna usih. Dawtnak a sunglawi bikmi a si. Kan biak kan Pathian nih thluachuah in pe ko hna seh.