Pathian Dawtnak chungah um

Nihin ah kan Nu Bupi nih a kan thimpiakmi thawngṭhabia (Jn. 15:9-11) chungah, “Ka Pa nih a ka dawt bantuk tein kei zong nih kan dawt ve hna. Kan dawt hnanak chungah hin um ko u, ka Pa nawlbia kha a ngaih i a dawtnak chungah ka um bantuk te hin ka nawlbia nan ngaih ahcun kan dawt hnanak chungah hin nan um ve lai. Ka lunglawmhnak nan chungah a um i nan i lawmhnak cu a tlinnak hnga, hi bia cu kan chimh hna” tiah a ti. Nihin ah tlangtar kan duhmi cu “Ka Pa nih a ka dawt bantuk tein kei zong nih kan dawt ve hna, kan dawt hnanak chungah hin um ko uh” timi dawtnak hi zeizong vialte nakin a sungbik mi a si timi hi tlangtar in tlawmpal ruah ṭi kan duh hna. 

Paul nih a hmun zungzalmi pathum a um a ti. Cu a hmun zungzalmi pathum cu zumhnak, ruahchannak le dawtnak a si i cu hna lakah a nganbikmi cu dawtnak a si e a ti. Zei ruangah dah cu dawtnak a hmun zungzal mi pathum chungah a nganbik mi a si, a sunglawi bikmi a si ti a si ahcun kan Bawipa Jesuh Khrih nih nang le kei a kan dawtnak hi nunnak pek tiangin a kan dawt caah misual mipalh nun tlaklomi ka si ko buin a nunnak dihlak in a kan pek i nang lei kei Satan rianṭuannak, Hell chung tlaknak in a kan khamh caah a nunnak dihlak in a kan pek caah Paul zong nih “zeizong vialte hna nakin, zumhnak ruahchannak hna nakin dawtnak hi a sunglawi deuh” tiah a rak phuanmi hi a si. 

Voikhat ah ralkap pahnih an um, annih cu aa komhtukmi an um i zaanglei ah voikhat cu ralkap pakhat pa cu raltuknak in a rak kir i a hawipa he kir loin a um ti a si. Ralram ah cun mi tampi an thi, a hawipa zong a thin phang, a thi ve sual hnga maw” tiah a hlat tikah mi pakhat nih “a thih le thih lo hi a fiang lo nain hmaa cu fakpi in a ing ko lai, cu ruangah atu tiang hi a rak kir kho lomi a si” tiah a rak ti. Cu tikah a hawipa nih cun “zaanlei a tlaituk cang, a mui zong a muituk cang. Cu tikah zeikhom a si hmanh ah a ka kawl lai” tiah a ti. A bawipa nih, “Kal hlah, hruh rian a si. Zeicahtiah ral an i den cuahmah lio a si caah hin a thi ve sual lai, mui zong a mui cang, zaan ṭim zong a si deng cang. Cucaah hin na kal lai lo” tiah a thlauh. Asinain cu a hawipa nih cun zeikhom a si hmanh ah ka va kal lai, a va kawl lai, ka hawipa hi” tiah a ti i aa thawh. Aa thawh tikah hin amah zong a hawipa cu a va hmuh i hliamhma fakpi in a tong ve i cu tikah a hawipa cu a va hmuh i zaahṭim pi ah khin a rak puak i inn ah a rak tlunpi ti a si. Inn ah a rak tlunpi tikah khin a bawipa nih khan a ra i “Mawl hlah kan ti lo maw, hihi man a ngei cang maw? Na hawipa hi a thi cang hi tah. Atu zong nangmah hi na thi deng cang hih” tiah a rak ti. Cun a hawipa nih cun zeitindah a rak ti a si ahcun, “man a ngei ko e, zeicahtiah khika ka va phak ah khan ka hawipa nih a ka zoh i a chimmi cu, “Na ral ti hi ka hngalh ko e,” a ti. “Keimah sinah hin na rak hrimhrim ko lai tihi ka hngalh ko e” tiah a ti. Ka chimduhmi cu zeidah a si ti a si ahcun hawile kom aa daw tukmi an si. Cu tikah hin a hawipa nih hin a dawtmi a hawipa caah nunnak hi pek a si ko tihi kan hmuh khawhmi a si. Zeitluk ral a hran hmanhah, an i ṭhuat lio hmanh ah a va kal i a hawipa nunnak a khamh dingah, va kawl dingah aa thawhmi hi a hawipa caah zeitluk in dah nunnak pek aa sian, zeitluk in dah a dawt tihi kan hmuh khawhmi a si. Hihi man a ngei ngaimi a si a ti. 

Cucaah nunnak kan timi hi dawtnak a um tik lawngah aa dawh i dawtnak hi nunnak nakin man a rak ngei deuh mi a si tihi nang le kei zong kan philh lo ding kha a si. Cuve bangtukin kan Bawipa Jeush Khrih nih a kan dawtnak hi nang le kei zeitluk in dah kan caah nunnak aa pek, kan caah, a kan dawtu caah, zeihmanh a tuah kho lomi kan si liote ah kan Bawipa Jesuh Khrih cu Kalvary tlangah a kan thih piak i cucu dawtnak sangbiknak vialte kan caah kan Bawipa Jesuh Khrih nih a langhtermi a si. Cucaah Paul nih zeitindah tehteh a khan kan ti a si ahcun (Rom. 8) chungah hin kan zoh tikah “Kan Bawipa Jeush Khrih chung i a ummi Pathian dawtnak” tiah a ti i zeitluk in dah kan Bawipa Jeush Khrih nih nang le kei a kan dawt tihi cu a kan dawtnak ruangah cun Khrih dawtnak he hin hi vawlei ah hin a kan ṭhen khotu ding a um hnga maw? tiah a ti. Harnak nih maw, temhinnak nih maw, hremnak nih maw, rawlṭamnak nih maw, pamnak nih maw, thil ṭihnung nih maw, thihnak nih maw, zeital nih a kan ṭhen kho hnga maw? tiah a ti. Zeihmanh nih a kan ṭhen kho lai lo e, tiah a ti. Zeicah tiah Khrih a kan dawtnak he cun zeihmanh nih a kan ṭhen kho lai lo e ti cu fiang tein ka hngalh cang e” tiah a ti. “Thihnak nih siseh, nunnak nih siseh, vancung i ummi vanmi hna nih siseh, uktu le ṭhawnnak nih siseh, atu caan ah siseh, hmailei caan ah siseh, cunglei vawlei nih hin siseh, tanglei vawlei nih hin siseh a kan ṭhen kho lai lo e” tiah a ti. Kan Bawipa Jesuh Khrih thawngin kan ta a simi Pathian dawtnak he hin cun a kan ṭhen khotu ding cu sermi thil dihlak ah hin zeihmanh a um lo e a ti. Nang le kei nihin kan ton cuahmah mi kan boruak ṭha lo lakah hin zeinih dah Khrih dawtnak he hin a kan ṭhen. A kan ṭhen khotu ding nang le kei sinah a um maw? Paul nih cun “hi vawlei cungah hin, hi vawlei ah hin, sermi thil vialte lakah hin Khrih dawtnak he hin a kan ṭhen khotu ding zeihmanh a um lai lo e a ti. 

Cucaah nihin kan Bawipa Jesuh Khrih zong nih, “ka Pa nih a ka dawt bantuk tein kei zong nih kan dawt ve hna” tiah a ti. Pa nih a fapa Jesuh Khrih a dawt bantukin kan Bawipa Jesuh Khrih zong nih nang le kei hi a kan dawt i cucaah kan dawt hna nak chungah hin um ko uh, kan Bawipa Jesuh Khrih a dawtnak chungah hin um ding a kan sawm. “Pa nawlbia kha ka ngai i a dawtnak chungah ka um bantuk tein ka nawlbia nan ngai ahcun kan dawt hnanak chungah hin nan um ve lai” tiah a ti. Kan Bawipa Jesuh Khrih a kan chimhmi kan Nu Bupi nih a kan hmuhsakmi kan Bawipa Jeush Khrih i a nawlbia hi kan ngai a si ko ahcun a dawtnak chungah hin a um ve mi kan si i kan Bawipa Jesuh Khrih aa lawmhnak a si i amah dawt dingah, a nawlbia zulh dingah kaa lawmhnak kha nan chungah a um i nan i lawmhnak cu a tlinnak hnga hi bia hi kan chimh hna” tiah a ti. Kan i lawmhnak a tlinnak hnga kan Bawipa Jesuh Khrih aa lawmhnak a si caah nang le kei kan Bawipa Jeush Khrih amah dawt dingah kan Bawipa Pathian cu na thinlung dihlak, na thazaang dihlak, na ruahnak dihlak in na dawt lai, cu ve bantukin na innpa zong nangmah naa dawt bantukin na dawt hna lai tiah nawlbia vialte lakah a nganbikmi a sunglawi bikmi kan Bawipa Jesuh Khrih nih a kan pek. A kan hmuhsak. 

Khrih ah dawtmi u le nau hna, kan Bawipa Jesuh kan nunnak dihlak, kan thazaang dihlak, kan ruahnak dihlak in a dawmi, amah dawtnak chungah a hmun zungzalmi hi vawlei cungah zeihmanh nih a ṭhen khawh lomi dawtnak he hmailei ah kar a hlangmi kan si cio nak lai Bawipa nih a thar in thluahcuah kan pe ko seh.