Zuamnak in teinak ah

Nihin May thla (5), thawhṭhan puai zarh (5) nak cawn nihnih ni ah hin thawngṭhabia le Lamkaltu cauk chungin khan thlarau thazaang hrawm kan duh hna. A hmasabik ah (Jn. 14:27) in kan rel tikah hin kan Bawipa Jesuh Khrih nih amah daihnak kha a laksawng nganbik ah khan a kan pek. Cu a kan pekmi daihnak cu vawlei nih an pek khawh lomi daihnak phun a si tiah a kan ti. Cucaah cun hi keimah daihnak kha kan pek hna, cucaah nan lungre theih hlah u, nan chung vang hlah u, vansang zong in um hlah u tiah khan Bawipa Jesuh Khrih nih khan a kan cah tak. Hika ah hin kan Bawipa Jeush Khrih nih “Vawlei nih a pek khawh lomi amah daihnak cu zeibantuk phun dah a si? kan ti a si ahcun vawlei cung mirum pawl zong nih an pek khawh lomi daihnak phun a si. Cucun vawlei rumnak le aana a ngei bikmi, power a ngei bikmi hmanh nih an pek khawhmi daihnak phun zong kha a si fawn lo. 

Cun Vawlei cungah miphun sang an um, minauta an um. Miphun sang hna nih nannih minauta hna cu” tiah an ti hna i an nautat tuk hna. Anmah miphun sang an sinak le an rumnak lawnglawng ah khan daihnak taktak kha a um lai tiah khan an ruah. Sihmanhsehlaw, Bawipa Jesuh Khrih nih amah pekmi daihnak cu kha bantuk pawl nih khan an pek kho lo” tiah khan a ti. Cucaaah hihi zeitindah a ti timi le atu vawlei cung i mirum mi nih, aana ngeimi nih an pek khawh lomi daihnak cu Bawipa Jesuh Khrih nih zeitindah a kan pek, cu daihnak chungah cun um awk ah le cucun lung retheih lo tein um dingah khan Bawipa Jesuh Khrih khan a kan cawnpiak tikah hin Lamkaltu hna nih zeitindah an rak zulh, zumtu hna nih zeitindah an pom, zeitindah an rak cohlan kan ti tikah hin hi kan relmi Lamkaltu 14:19-28 chungah khan Paul le Barnabas i an zumhnak le an tuahsernak an rianṭuannak nih hin an langhter timi kha kan hmuh. 

Cucaah Lamkaltu Peter le Johan nih Jesuh Khrih thawngṭhabia caah hremnak le tukvelhnak an rak in hnuah khan Khrihfa pawl kha zeitindah thazaang an pek hna, “Bawipa Pathian, hi nangmah min ruangah hi tuknak velhnak le serhsatnak in caanṭha kan ngeih caah Bawipa kan i lawm” tiah khan mi zapi hmai ah Pathian an thangṭhat. Cu bantukin nihin ah kan relmi chung zongah hin Lamkaltu 14:19 in kan rel tikah hin Mithiang Paul cu Ikonium khua ah hin Judah upa pawl nih an ṭhuat an valh i a thi cang tiah khan a ruak kha khua lengah an hlonh. Sihmanhsehlaw, kha a thi cang tiah an ruahmi a ruak kha khua lengah an hlonh tikah khan zumtu Khrihfa pawl nih khan an va kal hnawh i an va buk tik le an hum tikah khan Mithiang Paul kha aa hrim ṭhan i a hung ṭhan. Kha tikah khan a nun ṭhan tikah khan lungdong in Bawipa thawngṭha hi ka chim ti lai lo, um cang ko seh” tiin khan a lung dong maw, a lung dong lo. Kha tikah khua chungah a lut ṭhan i thawngṭhabia kha a chim ṭhan timi kha kan hmuh. Cucaah Mithiang Paul nih hi thawngṭhabia hi a nunnak ah aa lak i Jesuh Khrih caah hi thawngṭhabia kha a phuan tikah hremnak a tuar, thahnak zong a tuar, tuknak velhnak a tuar. 

Sihmanhsehlaw, Bawipa Jesuh Khrih nih bia a kan cah tak bantukin khan Jesuh Khrih daihnak kha a chungah a um caah le vawlei nih pek khawh lomi daihnak kha a chungah a um caah khan hi vawlei cung i hremnak le tuknak kha zeihmanhah a rel lo i thawngṭha kha thang chinchin le fak chinchin khan a rak chim timi kha kan hmuh. Cucaah mithiang Paul nih hin a thi cang tiah khan an rak ruah an rel ko nain khan anih cu zumtu Khrihfa pawl i thlacam piaknak thawngin le humhelnak thawngin khan aa hrim ṭhan i a rak nung ṭhan timi kha kan hmuh. Cucaah mithiang Paul nih zei a kan ti a si ahcun “Keimah ca zongah thawngṭhabia hi ralṭha chinchin in ka chim khawhnak hnga thla ka campiak uh,” tiah a rak ti hna nak kha a si. Cucaah amah zong nih hin Khrihfa pawl nih a pawngkam in khan an kulh i thla an campiaknak thawngin khan amah zong kha damnak a rak hmuh ṭhan i thawngṭhabia kha nunnak dihlak in khan, thazaang dihlak, ruahnak dihlak in khan a rak chim ṭhan tikah khan zumtu Khrihfa tampi a hmuh hna timi kha hi cathiang chungah khan kan hmuh khawh. 

Cucaah mithiang Paul nih hi amah phungchimnak thawngin khan a rak zummi zumtu Khrihfa pawl hna kha zei a ti hna ti a si ahcun, “Pathian Pennak chung i kan luhnak hnga ding caah hi vawlei cungah hin harnak hi kan tuar a herh” tiah khan a ti. Cucaah kannih vialte zong hi vawlei cungah kan zumhnak caah hin zeibantuk harnak dah kan ton lai, mi soiselnak kong kan tong kho, a tong lomi zong kan um. Cucun mithmuh kuttawngh in khan zawmhtaihnak le serhsatnak a tuarmi zong kha tampi kan um. A zei a va si hmanhah kha bantuk pawl kha ralṭha tein khan kan ton le kan kal chih, kan pah chih a si ahcun annih nih kha Bawipa Jesuh Khrih a kan pekmi nunnak le daihnak kha a taktak in a hmuh lai timi kha i ruahchan usih. 

Pakhatnak ah mithiang Paul kha a thi cang tiin an ruah i an rak hlonh. Khaha zumtu pawl nih kha ti khan an rak kulhnak thawngin khan amah kha a rak nung ṭhan, a rak kir ṭhan i thawngṭhabia kha biatak tein a rak chim ṭhan. Cu bantukin khan hi vawlei cungah hin zumtu Khrihfa vialte hna nih hin thawngṭhabia a kan chimtu hna caah fakpi in khan vawlei harnak satan pekmi harnak zong kha tan khawhnak, inkhawhnak, tuar khawhnak thazaang ngeih khawhnak caah khan Khrihfa pawl nih thla campiak kan herh ee…” timi zong kha chim ka duh. 

Cun, a pahnihnak ah mithiang Pual hi thawngṭhabia a chim ruangah hi tlukin khan an serhsat, an zawmhtaih i an tuk an velh i thi tiangin an tuk ko nain khan a lung a dong lo i a chim chin. Kha a chim chinchin, fak chinchin le thang chinchin a chim tikah khan zeidah a hmuh kan ti a si ahcun kha aa zuamnak le lung dong lo tein aa zuamnak kha a theipar a hmuhmi cu zumtu Khrihfa tampi a hmuh hna timi kha kan hmuh. 

Cucaah hi thawngṭhabia kan chim tikah, tehte kan khaan tikah hin kannih nih harnak tampi kan ton lai. Sihmanhsehlaw, hi vawlei cungah hin kan umnak inn taktak timi hi a um lo, hnangamnak taktak timi hi vawlei nih a pe kho lo. Sihmanhsehlaw, kan Bawipa Jesuh Khrih lawnglawng nih hin hnangamnak, lungdaihnak taktak kha a kan pek. Cucaah kannih vialte Bawipa Jesuh Khrih nih nan lungre theih hlah uh, an van sang hlah uh” tiah khan a kan ti bantukin khan Bawipa Jesuh Khrih tha peknak kha mithiang Paul bantukin khan i lak usih law a dongh hlan lo Bawipa Jesuh Khrih caah nunnak pek in khan thawngṭha kha a aupi chin khotu si kho ding kha i zuam cio hna usih tiah forh kan duh hna.