2027 Vawleicung pumpaluk huap Mino Puaipi (World Youth Day) caah min cazin pek dingin Pope Leo 14 nih mino hna sin ah forhfialnak a tuah

Vawleicung Mino Ni a thawktu Pope St. John Paul II puai ni ah, Pope Leo 14 nih vawleicung pumpaluk i mino hna sinah ca a kuat hna. A ralai mi 2027 ah Thlanglei Korea ram, Seoul khualipi ah vawleicung pumpaluk caah Mino Puaipi (World Youth Day) ah i tel kho cio ding ah le min cazin pek cio ding ah forhfialnak le thazaang peknak a ngeih hna. “Hi mino puai ah, kan nih vialte hi Khrih pum pakhat ah chungtel kan sinak, lungrualnak le pumkhat sinak a fehtertu hmuntonnak caan ṭha asi lai tiah Pope nih a ti. Mino Puai (World Youth Day) cu Thanglei Korea ram ah 2027 kum August 3 in 8 tiang tuah asi lai caah cu puai ah a kal dingmi nih hlankan tein cazin peknak cu phungning tein on asi cang. Cawn nili ni ah khan, Pope Leo 14 nih Mino puai kal dingin min cazin pek cio ding ah a forh hna lio ah a chimmi cu, mino puai cu “ Khua ram hmuh duh men lawng ah si loin zumhnak fehternak, pakhat le pakhat i hawikomhnak he Pathian hi i ton awk ah khualtlawnṭinak tiang ruahchannak caan ṭha asinak kong a chim. Hi avoi 17nak vawleicung mino puai (World Youth Day) ah vawleicung ramkip mino hna nih hmunkhat ah an i tonnak thawng in holh phun phun le nunphung a phunphun i aa dawhnak le a rumnak hmuhtonnak caan ṭha asi lai. Nun phung le holh i dannak nih lungrualnak a nganter deuh lai, zeicah tiah Khrih ah pumkhat kan si tiah Pope nih a ti. Thlanglei Korea ah tuah dingmi (World Youth Day 2027) cu mino hna caah zumhnak a thuk a fehtertu le Khrih ah an unau hna he i tonnak caanṭha a si lai i nunchung philh kho lomi lunglawmh thanuamnak le a hmunmi hawikomhnak an ser lai” tiah Pope nih a saduhthahnak a langhter. Cu mino puai i tlangtaar cu, “Ralṭha tein um u!Vawlei cu ka tei cang” ti a si.