ST. Theresa of the Child Jesus, Virgin (Bawhte Jesuh Mithiang Theresa)

Mission rianṭtuantu hna zohkhenhtu St. Theresa cu January 2, 1873 kum France ram, Alacon khua ah Louis le Zelie Martin nih an rak ngeihmi fanu hniangbik a si. Amah cu a ngakchiat lio tein midam lo ngai mi a si caah ṭha deuh in zohkhenh le conghhramh a rak hau mi a si. Kum 4 a si lioah a nu nih a rak thihtak hna i Theresa cu a pale a ule nih an rak zohkhenh. A ngakchiat tein zeizongte ngeihduhnak lungput a rak keng mi a si.

            Kum 14 a rak si lio, 1886 kum Christmas lai zaan ah Nunnemmi Bawhte Jesuh i a thuk ngai mi langhnak a hmuh hnuah nunthlennak a rak ngei i cuhnu in cun amah pakhat nuamhnak kha ruat loin a nunnak le a thazaang cu dawtnak in a hmaan. Kum 15 a si ah Lisieux khua ah a um mi Carmelite convent ah a hleice Pope nawlpeknak (Popal dispensation) in a lut i a nunnak dihlak cu Pathian sinah a pekchanh. Amin ah “Athianghlim mi Mithmai le Naute Jesuh i Sister Theresa” tiah aa sak. St. Theresa a tlaihtleng cu “Duhdawtnak lawnglawngin pum i pekṭhan khawh a si” timi a si.

            Sister Sianginn ah a rak um lioah a hleikhun in thil a tuah mi a um lem lo. Nifate a ṭuan ding (ṭuanvo) lawng kha a ṭhakhun le felfai tein a rak ṭuan. A thlithup in thilṭha tuahnak le thlacam nun ngeih in a caan cu a rak hman i Pathian he pehtlaihnak ṭha tein a rak ngei. Zawtfahnak, ṭih phannak, harsatnak vialte lakah Pathian cu fek tein aa tlaih i Pathian zaangfah dawtnak chungah fek tein a rak nung. Sister can a duhmi hna zohkhenhtu lubik ṭuanvo an khinh tik zongah Sister can a duh mi hna kha tangdornak le thianhlimnak ngeih dingin a kaa in siseh, umtu ziaza in siseh tehte langhter in a rak cawnpiak hna. Amah ṭial mi “The History of a (Soul)” timi cauk in vawleipi nih Theresa cu theihhngalh a hun si. Thlarau lei he aa pehtlai in, a rak ṭial mi catlang pakhat cu “Nunnak ah a biapi mi cu thil lianngan tuah khi a si lo, dawtnak nganpi ngeih tu khi a si” a ti i a dang pakhat cu “Keimah cu Pathian kha thil hmepacik tein a pechan kho mi zei santlai lo thlarau fate ka si” a ti rih.

            Biaknak caah thihnak a ingmi martyr pakhat dirhmun in thih duhnak lungthin fakpi a rak ngeih caah a nunnak kha thlarau hna khamh khawhnak in Bupi karhchin dingah aa pekchanh. A rakchim mi cu “Keimah cu St. Agnes i hmelchunhnak bangin ka si khawh chungin hmuh ka duh” tiah a ti. Cuthil cu khuaruahnak in a si kho lomi dawtnak in a siter lai ti a si. Theresa nih Thlarau lei ah a ṭhawnnak pakhat cu thil hmete thil sawhsawh kha dawtnak in tuah kha a si. Theresa cu Pangpar a duh tuk mi a si i amah le amah zong khi Pathian dumchung pangpar dang hna lakah Pathian sunparnak a langhtermi aa dawhmi pangpar fate ka si tiah aa hmuh.

            TB zawtnak in caan saupi nganfah a tuar hnu, September 30, 1897 kum 24 a si ah a thi. A thih hlanah a donghnak bia a chim mi cu “Ka Pathian, kan dawt” ti hi a si. Thawngṭhabia karhnak mission rianṭuannak ah Thlacamnak le tuahnak hna cu hmunkhat in khat le khat aa pehtlaihnak kong langhternak caah St. Francis Xavier bantukin ramdang lei mission rianṭuantu hna zohkhenhtu St. Theresa kha 1927 kum ah an fehter. Cun Minung tampi sinah Vancung ram in a ṭhawnnak le a rianṭuannak a langh tikah May 17, 1925 ah Pope Pius XI nih mithiang sinak a pek i 1997 ah Pope John Paul II nih Doctor of the Church a sinak a thanh.

            Mithiang Theresa nih a rak chimmi cu, “Bupi timi kan Pum hi ṭengnge phunphun in sakmi a si. Cu hna chungah Dawtnak mei in a kang thluahmahmi lungthin pakhat zong aa tel ve. Ka rak hngalhmi  dawtnak cu Bupi chungtel Khrihfa hna kha kuttongh ṭuannak muisam lei ah a hmaithlak ter. Cucaah, cu dawtnak mei a mih ahcun lamkaltu hna zongnih thawngṭha an phuang hnga lo. Cuve bangin martyr hna i an thisen kong zong chim awk sullam a ngei ti lai lo” ti a si.