Pathian Ngaihthiamnak
Nihin kan Nu Bupi nih a kan timh piakmi (Lk. 7:36-50) chungah, “Cucaah hihi kan chimh hna; dawtnak nganpi a langtermi nih khan a sualnak tampi a simi cu ngaihthiam an si cang ti kha a langhter. An sualnak tlawmte lawng ngaihthiam a simi nih cun dawtnak tlawmte lawng an langhter ve,” tiah a ti.
Khrih ah dawtmi u le nau hna nifatin ten kan Nu Bupi nih mithiang hna puai a kan tuahpiak bantuk tein September (17) ni nihin ni cu Mithiang Robert Ballermine puaini a si. Mithiang Robert hi (1542) kum ah, Italy ram Montepulciano timi khuapi ah a chuakmi a si. Kum (18) a si ah a pa hnatlak pinak tel loin Jesuit phu ah a lut i, cuka ahcun siangbawi pakhat a rak cang i cuticun Bawipa nih a vun hman ciammam i cauk te hna, a ṭhaṭha a phunphun in a rak ṭialmi pakhat a rak si. Mah lio chan ah caṭial leiah minthang ngai pakhat a rak si i a ṭialmi ca zong an duh ngaingai. Mikip nih an i cawk i an manh bikmi, a ṭha bikmi, a lehbikmi cauk pakhat a rak si. Amah hi Bishop pakhat, Cardinal tiang siseh, cun doctor pakhat zong a rak si i caṭial a thiam ngaingai mi pakhat a rak si. (1620) kum ah hin a thi i, a thih hlan ah a chimmi chungin ka duh ngaimi pakhat cu zeidah a si tiah cun, “Khrih i sianginn cu dawtnak cawnnak sianginn pakhat a rak si” a ti.
Cuve bantukin nihin ah Salm chungah zeidah kan hmuh ti a si ahcun, “Bawipa cu a ṭha i a dawtnak cu zungzal in a hmunh caah lawm tuah uh” tiah a ti. “Israel mi hna nih a dawtnak cu zungzal in a hmun ti hna seh” a ti. Bawipa hi nang le kei kan caah a ṭhat, zeitluk in dah nang le kei kan caah khua a kan khaan piak i, kan duh kan herhmi vialte pakhat hnu pakhat a kan pek. “A ṭhat i a dawtnak cu zungzal in a hmunh caah lawm tuah u”. Kan Bawipa Jesuh Khrih nih zeitluk in dah a kan dawt. Nihin ni tiangah nunnak caan ṭha, caan sunglawi a kan pek. Kan sual kan palh bu tein a kan dawtu kan biakmi kan Pathian a si.
Cucaah dawtmi u le nau hna a kan dawtnak hi zungzal in a hmun ti hna seh; a kan ti bantukin Bawipa dawtnak hi a ṭha tuk, zungzal in a hmunmi dawtnak he a kan dawtu, zeitluk misual, mipalh kan si hmanh ah a kan daw zungzal tu kan Pathian a si, ti hi nang le kei kan nunnak ah cohlang ding kan si.
Nihin thawngṭhabia chung zongah zeidah kan hmuh ti a si ahcun, kan Bawipa Jesuh nih thinghmui zawtnak a ngeimi Simon Peter sin i rawl a va hrawn lioah Mary Madalin nih a ra i a man a sung tukmi zihmui, (300) hman Spinat zihmui, kha kan Bawipa caah a khuai i kha vialte kha mi tampi nih an hmuh tikah, “A pamhmai tuk an ti” tiah an ti nain kan Baiwpa Jesuh Khrih nih mawhchiat hlah uh, a tuahmi hi zeitindah a ti tiahcun, “thil ṭha a si e” tiah amah cu a lawmh. Nihin ah zihmui kan timi cu zeibantuk zihmui a si hmanh ah khuai loin a nam kho lomi a si. Spinat hi hi Mary Magdalin nih a khuai tikah zihmui rim cu inn vialte a khat dih, a ti. Nang le kei, dawtmi u le nau hna kan rimhmui hi a langh khawh nakhnga kan zihmui dur cu kan khuai a hau. Cucaah nang le kei zong hi, “Kannih cu a ti, Khrih caah a hmuimi zihmui kan si e” a ti.
(2Kor. 2:15) chungah khan, “Khrih caah a hmuimi zihmui kan si e” a ti. Hi minu nih hin zihmui a khuaimi cu zeidah a langhter? ti a si ahcun, “Kekkuai Nun” timi kha a langhtermi a si. Zei ruangah dah kekkuai nun a ngeih? A sualnak le a palhnak vialte caah a nunnnak a lungthin kumkhat ca’h a khonmi kan si ko lai / a khonmi vialte kha kan Bawipa Jesuh Khrih caah kekkuai nun a ngeihmi kha nang le kei kan hmuh khawhmi a si. Kha vialte a tuahsernak kha Simon nih a hmuh tikah; a pamhmaituk, tiah a ti. Kan Bawipa Jesuh Khrih nih a timi cu tahchunhnak hna kha a vun chim i, a tanglei bikah a tunai kan chimmi kha, “nihin hi tiangah nangmah na inn ah ka ra i zeihmanh ka ke ṭawlnak ah zeihmanh na ka pe lo e” a ti.
Cucaah hi bia hi kan chimh hna, “Dawtnak nganpi a langhter mi nih khan a sualnak tampi a simi cu ngaihthiam an si cang; ti kha a langhter. An sualnak tlawmte lawng ngaihthiam a simi nih cun dawtnak tlawmte lawng an langhter”. Cucaah minu a thawh i zeitin a ti tiah cun, “Nan sualnak ngaihthiam na si cang” a ti. An vun chim i cabuai i a ṭhumi hna nih khan; aho nih dah sualnak cu a ngaithiam khawh, sualnak hmanh a ngaihthiam khomi hi ahodah a si” an ti. Kan Bawipa Jesuh nih minu a thawh i, “Nan zumhnak nih khan an khamh cang, dai tein va kal ko cang” a ti.
Khrih ah dawtmi u le nau hna nihin kan sual, kan palhnak caah kan Bawipa Jesuh Khrih nih a kan dawtnak kha ruat ṭhan in kekkuai nun kan ngei maw? Kan sual, kan palhnak vialte caah nang le kei kan i ngaichih maw? Mah le mah aa bochanmi vialte hna caah, aa zummi vialte hna caah kan Bawipa Jesuh Khrih a thluachuahnak kha zeitik hmanh ah a kan pe bal lo. Mah le thazaang dernak, kan sualnak, kan palhnak kha kan i theih i kan Bawipa Pathian sinah zumhnak le bochannak he kan kir i, ngaithiamnak kan hal a si ahcun kan Bawipa Pathian nih kan sualnak, kan palhnak vialte kha dantatnak tu pek loin ngaihthiamnak tu he a kan cohlan i thluachuahnak a kan petu kan biakmi kan Pathian a si.
Cucaah dawtmi u le nau hna nihin ah zeitluk misual mi palh a si hmanh ah, a sual ngaimi nu a si hmanh ah a sualnak, a palhnak vialte caah a mitthli a tlak i kan Bawipa Jesuh Khrih a ke kha a sam in a hnawh i, zihmui kha a khuai i a thawih i, kha vialte a tuahsernak vialte kha a hmuh tikah, “Aww…dawtnak nganpi a langhter mi nih hin a sualnak tampi a simi kha ngaihthiam a si cang e” a ti. Dawtmi u le nau hna nang le kei kan sual, kan palhnak ah ngaihthiam kan sinak dingah hin nang le kei nih dawtnak Bawipa Jesuh sinah hin kan langhter cang.
Nang lei kei kan sual, kan palhnak vialte ngaihchih in hi Mary Magdalin bantukin kan Bawipa Pathian sinah kir ko usih, ngaihthiam hal usih, kekkuai nun ngei usih. Zeitik hmanh ah a kan thlau lai lo. Kan sual, kan palhnak vialte a kan ngaihthiam i, a kan cohlan i a dawtnak, a zaangfahnak he thluachuahnak tu a kan petu kan biakmi kan Pathian a si. A hmaanmi sual ngaihchihnak taktak he Bawipa sinah hin kir ko usih.
Thazaang petu /- Saya William