Archbishop Gallagher: Vawleicung ramkip nih nuclear hriamnaam an hlawt awk asi
Vatican i Ramdang Pehtlaihnak zung ah Secretary asi mi Archbishop Paul Richard Gallagher nih, September 15 ah tuahmi International Atomic Energy Agency i a voi 70nak General Conference ah vawlei cung ramkip le organization vialte hna nih Nuclear hriamnaam sernak le hmannak vialte ngol dih, hlawt dih a hau tiah a chim. Cupin ah nuclear thiamnak cu minung caah ṭhatnak a chuahpitu rianṭuannak ah hman ding ah sawmnak a tuah i hi thil a tawngthamtu hna nih ningcang te le ralring tein (commitment and responsibility) hi ṭhen awk a ṭha lo tiah a chim chap.
Nuclear thiamsannak hi dai tein hman khawh a si kho ve ko, abik in minung nunnak caah a herhmi electrict le setzung(စွမ်းအင်/energy) caah le scientific fimthiam ṭhanchonak caah a biapi mi asi tiah a ti. Cucaah nuclear thilri hna kha ṭha tein hman tik ah thil pakhat khat a can sual tik ah ṭuanvo lak awk ah biakamnak tuahmi kha philh lo ding a biapi. Ṭhanchonak caah ti in nuclear hmannak nih a donghnak ah nuclear hriamnaam serchuahnak lei a panhnak hnga lo, ram khat le ram khat tukdohnak a um lio ah hi hriamnaam hna le AI hmannak hna cung ah ralrin a herhnak kong zong aa tel. Hi International Atomic Energy Agency (IAEA) 70th General Conference cu Austria ram Vienna ah September 15 in 18 tiang tuah asi lai.
IAEA Conference caah Pope Leo XIV i siaherh biacahmi kha Archbishop Gallagher nih a langhter. Aliam cia kum 70 lio ah (IAEA) biakam min a thu hmasa bikmi hna lak i pakhat a sinak biakamnak kha Holy See(Vatican Zung) nih a hun hngalhter ṭhan. Cu biakam minthutmi ahcun, “nuclear thazaang bantuk thil ti khawhnak nganpi a ngeimi thiamsannak cu a ṭhami nunphung ziaza nih a hruai a hau i daihnak caah hman a si lai. Cun minung ṭhanchonak hmanh asi lai i zei kong hmanh ah rawhralnak a chuahpitu asi ahcun kham le cohlan lo asi lai,” ti asi. Vawleicung ramkhel ruahnak le thil sining le thiamnak cu aa thleng ko nain Vatican hmuhning cu aa thleng lo. Nuclear le AI hmannak cu minung caah ṭhatnak a chuahpitu dingah hman awk asi i ziaza le zulhphung tang ah a um a herh.