Library cu cauk chiahnak inn menmen asi lo, hawikomhnak le theih hngalhnak i hrawmnak hmun asi

Pope Leo XIV nih  Vatican Archives le Library rianṭuantu hna sinah bia a cah hna. A chimmi cu, Bupi le vawlei cungmi hna caah rianṭuannak ah hi Vatican Archives le Library hna an rianṭuannak an biapitnak a langhter i Library timi cu cauk in a khatmi inn le hmun menmen si loin pakhat le pakhat i pehtlaihnak le hawikomhnak, theih hngalhmi le ruahnak i hrawmnak hmun asi tiah a ti. Nizan (Cawn nikhatni) ah Pope nih Vatican i a ummi Apostolic Archives le Apostolic Library a tlawn hna i cu zung rianṭuantu hna he biaruahṭinak le thazaang peknak a ngeih hna pin ah, “AQVA. Catastrophe and Wonder” Exhibition zong a on piak hna. Pope dirhmun hi in a voikhatnak Vatican Library le Archives a lennak asi i, Bupi le mi vialte caah nunphung le ṭhanchonak ca i rianṭuantu hna cung ah a lunglawmhnak a langhter tiah theih asi.

Vatican Archives le Library cu vawleicung pumpaluk huap in Catholic Uknak he aa pehtlaimi rianṭuannak Cazin an si caah, cucu kilven zohkhenh awkah rian an ṭuan, tiah Apostolic Constitution Praedicate Evangelium No. 242 nih a ti. Cu pin ah,  zuksuai(arts) le fim cawnnak caah a herhmi thilri tampi a um caah fimthiamsang a cawng mi hna caah research tuah awk le dothlat awk tuanbia rosung hna an um caah ṭha tein kilven zohkhenh awk a herh tiah Apostolic Constitution Praedicate Evangelium (No. 243) nih a ti. Library cu daih tein umnak hmun, hmun king ah hmuh khawh asi ko nain cauk (ca kan relnak ) thawng in theih hngalh duhnak le thil sining hlathlai duhnak lung a thawhter i fimnak le theih hngalh duhnak thinlung a kan pek. Hippo khua i Bishop asi mi Mithiang Augustine cu Mithiang Paul cakuat a relnak thawngin, zumhnak lei i a lunghrinnak a tlau tiah Pope nih a ti.