Lungthin Tak tein Ngaihthiam
Dawtmi u le nau hna nihin cu Zarhpi (24)nak Zarhpi ni kan phan ṭhan cang hna.
Ecclesiasticus 27:33-28:9;Psalm 102:1-4,9-12; Romans 14:7-9; Matthew 18:21-35
Nihin kan rel mi cathiang hna nih an langhter mi cu: Pathian nih kan sualnak a kan ngaihthiam bangin pakhat le pakhat kan sualnak i ngaihthiam ve dingin a kan sawm.
Voi(1) Bible relnak ah thin hunnak le lehrulhnak nih lung daihnak a kan pe kho lo tiah a ti. Pakhat khat nih fahnak a kan pek tikah kan thin a hung tawn. Thin hunnak kha kan chungah kan i chingchiah peng a si ahcun duhsah tein huatnak le lehrulh duhnak lei ah kan panh tawn. Cuasicaah, minung kan si hna caah, kannih hna zong palhnak a tuah kho ve mi kan si caah pakhat le pakhat kan sualnak kan i ngaihthiam a herh zungzal ko. Cun Pathain ngaihthiamnak kan herh zungzal ko timi kha kan theih ding a si.
Psalm hla chungah Pathian cu zangfahnak le dawtnak a ngeitu a si a ti. Kan sual kan palhnak tik zongah caan a kan pek i a kan zangfah tawn. Kan tuahser ning bangin chikhat te ah kan cungah a tlunter lo a ti. Pathian nih kan cungah a dawt nak a langhter a si ahcun, kan nih pakhat cio hna zong pakhat le pakhat cungah dawtnak kan langhter ve ding a si.
Voi(2) Bible relnak ah Paul nih: Kannih cu Pathian ngeih mi, Pathian ta kan si a ti. Cuasicaah, midang cungah thil kan tuahser ning paoh hi Jesuh nih minung hna cungah a rak tuah bang khan kan tuah ve ding a si. “A cungah ṭhatnak tuah ding aa tlak taktak maw; timi kha si loin Jesuh nih midang cungah zeidah tuah seh tiah a ka duh ve?” timi kha nifatin kan nunnak ah kanmah le kanmah biahalnak kan i tuah ding a si. Jesuh nih cun ngaihthiamnak lungthin ngaih dingin a kan sawm ko.
Thawngṭhabia chungah: Cun Peter cu Jesuh sinah khan a ra i, “Bawipa, ka unau pakhatkhat nih ka cungah sualnak tuah sehlaw voi zeizat dah ka ngaihthiam lai? Voi sarih tiang maw?” tiah a hal. Jesuh nih cun, “Sihlah, voi sarih si loin voi sawm sarih voi sarih” tiah a ti. Jesuh nih ngaihthiamnak kan ngeih tikah voi zeizat dah a si cang tiah kan i chingchiah lo ding kha a kan cawnpiak duh mi cu a si. Ngaihthiamnak ah rikhiah lo ding kha a chim duh mi cu a si.
Jesuh nih ngaihthiam nak a ngei lomi sal kong a kan cawnpiak rih. Sal pa nih cun a bawipa sinin leiba tampi a ngeih mi chung khan ngaihthiam nak a hmuh. Sihmanhsehlaw, a hawi sal dang, leiba tlawm te lawng a ngeimi pa cungah khan ngaihthiamnak a ngei kho lo. Pathian nih zeitin dah kan sual a kan ngaihthiam timi kan theih ding kha Jesuh nih a kan cawnpiak duh mi cu a si.
Ngaihthiamnak kan ngeih tikah midang hna nih an tuahsernak a dik hman ruangah a si hlei lo. Kan cungah fahnak a kan petu hna tuahsernak kha zei rel loin kan um zong a si lo. Ngaihthiamnak kan ti tikah, thinhun nak le huatnak, lehrulh duhnak hna nih kan lungthin a kan uk lo ding caah khan a si.
A caan ahcun ngaihthiamnak kan timi hi caan sau a la khomi a si. Cutin asi ahcun, “Bawipa, mah minu, mipa nih fahnak a ka pek. A tu tiang hi ngaihthiamnak ka ngei kho rih lo. Zangfahnak in ngaihthiam khawhnak lungthin ka pe hram ko. Amen” tiin thla kan cam ding zong a si.
Dawtmi u le nau hna, mi kan ngeihthiam hna tikah, tuah a si cangmi thil hna kha rak si lo dingin kan thleng kho lo. Sihmahsehlaw, kan lungthin chungah daihnak le luatnak a thar in kan um ter khawh ṭhan timi kha kan theih ding a si.
Pathian nih voi tampi kan sual a kan ngaihthiam bal cang timi zong kha thei ṭhan hna u sih. Cuasicaah, pakhat le pakhat cungah ngaihthiam nak lungthin ngei kho, chia kho hna u sih. Amen
Thazaang petu /- Fr. Fidelis Maung Sein