INNLO NGEI LO, I DAW TEIN A UMMI INNPA HNA
Inn le lo ngeihlonak cu vawlei cung ramkip khuapi, khuate hna le hmun tampi hna ah hmuhtonmi piahtana a si. Sifakmi hna lawng si loin, mitampi hna cu innlo hmuh dingah harnak tampi an tong. Inn le lo ngeihnak cu mi pakhat caah huham a ngei i innchungkhar chungtel a tammi hna caah a tlam a tlingmi a si. Hi kong hi minung he pehtlaihmi, kokek pawngkam caah a biapi ngaimi a si.
Misifak hna cu ngandamnak he a tlak lomi hmun hna, nunnak caah ṭihnungmi hmun hna ah a ummi hna kha harnak cungah harnak aa thap lonak ding caah ṭhialkam in hmun pek awk progarem a um a si ahcun annih kha hlankan theihter hmasa hnuah, a thianghlimmi inn hmun kha thimnak nawl pek lengah simanking suainak le ṭuanchuahnak hna ah hmun um minung hna zong telh ve in rianṭuan awk a si. Caan khatte ah lakhruak in rak sakmi innpa hna inn hmun hna zong mi vialte kha don le conglawmhmi khuapi sinak lei thlennak caah thilthar ser in le khuaruahnak in ṭuanak hna a herh.
Pakhat le pakhat zumh a um lomi thil sining kha lonh in, aa lo lomi minung hna k ha khomh-hmunkhat te umter hna in, hi bantuk khomh in umter khawhnak kha khuapi i ṭhanchonak simanking sinak in a tuah liomi khuapi hna cu zeitluk in a nuammi hmun hna dah an si te lai. Khuapi khuate saknak caah Engineer pungsan an suai thawkka tein innpa lopa hna i daw-tlaihchan tein an umnak, minung pakhat le pakhat pehtlaih khawhnak, bia i ruah khawhnak, midang hna kha theih hngalhpinak hna caah hmunhma hna kawl piak in, inn pungsan a suaimi khuapi hna cu zeitluk in dah mi a lemsoi khawh hna lai.
Khuapi hna le kuat phawrnak
Khualipi, khuapi hna ah a ummi hna i umtu ningcang cu kuat phawrhnak lei he tampi pehtlaihnak a ngei. Kuat phawrhnak cu atu le atu ti bantukin lungrawh awk a simi thil umtu ningcang hna he an ton tawn. Khuapi chung i an hmanmi mawtawka hna cu mawtaw lamthluan kharphihnak hna a siternak, thli thurhnawmhnak hna a canternak, aiawh thlen ṭhan khawh a si lomi datsi hna tam pipi in hmannak hna a chuahter. Hi thil umtu ningcang hna ruangah lampi hna cawhnak, khuapi aa dawhnak kha a rawhter dingmi mawtawka dinhnak hmun (sakhaan) hna tuah piaknak hna kha tuah a si. Thiamsang hna nih cun kuat phawrhnak a biapitnak kong kha an chim ṭheo.