Zumhnak
2026 September 11, nihin ni zongah RVA program hmangin thawngṭha hrawmṭinak caanṭha a kan zaangah ṭhan tu kan Pathian a min ka thangṭhat. Thawngṭha a rak ngai i thazaang a kan petu, pumpak chungkhar nan herh ning cio in kan biak kan Pathian nih thluachuah bongmal za in ṭhumhthlak ko hna seh tiah thlaza kan campiak hna.
Nihin ni ah Khrihfa Bupi nih rel dingin a kan timhpiak mi Cathiang 1Korin 9:16-19,22-27, Salm 84, Lk 6:39-42 tiang an si. Luke thawngṭha hi a tawinak in ka vun rel lai. ‘Na mit chung i a ummi thingtan cu hmu ṭung loin zeitindah na unau pa cu, ka nau, na mithnawm kha in cawihpiak ning na ti khawh? Mi depde, na mit chung i thingtan kha chuah hmasa law pei, na unau hna mit chung i a ummi mithnawm hmete cu na hmuh khawh lai i na cawih khawh lai cu tiah a ti.’ Khrih thawngṭhabia a si.
Nihin kan relmi Bible pakhatnak chungah relnak 26 ah, ‘kei cu ka tlik tikah tinhmi kawl fiang tein ka ngei, kaa thongh tikah a ping a pang ah a thongmi bantuk ka si lo’ tiah Mithiang Paul nih a kan ti. Cu aa tinhmi cu zeidah si kan ti ahcun, Hebrew 11:1; ‘zumhnak ngeih kan timi hi kan i ruahchan mi kan hmuh ṭheo lai ti kan zumh le, a taktak le a ngaingai kan mit i a hmuh khawh lomi thil hi a um ko ti kan zumh hi a si’ tiah a ti.
Duhdawt mi u le nau, nu le pa hna, Khrih a zum i a hnuzul kan si tikah tinhmi fiang tein kawl tung kan ngei maw? Mithiang Paul nihcun kaa thongh tikah a pingpang ah aa thongmi ka si lo a ti. Tinhnak fiang tein a ngeih. A biak a Pathian ṭha tein a hngalh. Tlik zuamnak ah ka tha dihumnak in ka chuak cang a ti. Cu tlik kaa zuamnak ahcun zumhnak kha fek tein kaa tlaih e a ti. Zumhnak i tlaih in kan i ruahchan mi kawl fiangte kan phak khawhnak hnga ding caah duhdawt mi u le nau, nu le pa hna, kan kalnak lamthluan ahhin kan rian biapi bik cu zeidah a si? Khrih a duhnak tuah kha a si i, Khrih nih a kan dawtnak kha kanmah lawng nih co siloin a co rih lomi vialte sinah khamhnak thawngṭha a phanh i, thawngṭha va phuan ding kha cucu kan biak kan Pathian nih a kan duhpiak mi a si.
Mithiang Paul nih thawngṭha ka phuan khawhnak hnga ding caah cun, Judah mi sinah Judah bantukin ka um i, Moses phungbia a zultu hna sinah cun Moses phungbia nawlbia tangah kaa umter i, zumhnak a dermi hna sinah cun zumhnak a dermi bantukin kaa umter a ti. Zei ruangah kan ti si ahcun cu vialte ka tuahnak a ruang cu thawngṭha ka phuan khawhnak hnga ding caah a si a ti. Mi vialte nih khamhnak hi co hna sehlaw thawngṭha biatak kha cohlang hna seh ti a duh tu ka Pathian nih hi thilṭha hi a duh ee tiah Mithiang Paul nih a ti ṭhan. Duhdawt mi u le nau nu le pa hna, Khrih nih a dawtnak a kan hngalhter i amah zumtu a kan siter hnu ah kan i tinhmi cu thlan pin nunnak a si i, nihin kan relmi Salm 84 nak ah; ‘Maw a lianngan bik Bawipa, na Biakinn thiang cu zeitlukindah ka duh!
Cuka i um cu ka duh hringhran’ tiah Psalm hla phuahtu nih a phuah. Duhdawt mi u le nau nu le pa hna, cucu ai tinhmi a si i, kan i tinhmi cu thlan pin nunnak a si i, kanmah lawng phak si loin mi vialte an phak khawhnak hnga ding caah thawngṭha cu mi zakip sinah aa rem caan zongah, aa rem lo caan zongah kan phuan ding hi kan rian nganbik a si. Cucaah cun kan rian cu mi va soisel i, mi va zawmhtaih kha kan rian a si lo i, kan rian cu Khrih thawngṭha kha kan nunnak dihlak in phuan, mi vialte khamhnak an conak hnga ding caah cu thawngṭha cu mi vialte sinah phakter kha a si i, zei dirhmun, kutdok hna sin zongah siseh, sifak hna sin zongah siseh, mirum hna sin zongah siseh kan phuan a herh i, pulpit lawngin kan dirpi mi thawngṭha hi sullam a ngei ko nain Pathian duhnak a kheng dih kho lo.
Cucaah cun zumhnak a dermi hna sin zongah zumhnak an ṭhawnnak hnga ding caah thawngṭha biatak kan theihter hna ding hi kan rian nganbik a si. Kan rian nganbik mi cu kanmah le kan si khawh tawk cio in kan nunzia in kan tuahsernak in siseh, kan chimrelnak in siseh, kan mit au kan hoiher vialte in Khrih tehte ṭha kan si khawhnak hnga ding, zohchunh awktlak kan sinak hnga dingah Pathian nih pumpak kan nunnak cio ah thluachuah kan pe sehlaw a thawngṭha a phuangtu ah Pathian nih kan nunnak cio kan hmang hram ko seh. Thawngṭha a rak ngaitu nan dihlak Pathian nih thluachuah in pe ko hna seh! Amen
Thazaang petu /- Saya Canute Bawi Kam