Ukraine mipi an intuarnak cungah Pope nih a ngaihchiatnak a langhter ṭhan

Kan hnu naite ah, Ukraine ram khuapi zeimawzat ah Russia tukdohnak a chuah ruang ah sual ngeilo mipi tampi an nunnak a liamnak kong he pehtlai in, Nizan (Zarpi ni Angelus thlacamnak) ah   Pope nih a ngaihchiatnak a langhter i hmaitonh biaruahnak in daihnak lam kawl dingah nawlnak a tuah ṭhan. Kan hnu ṭhal lio thawk in Russia nih Ukraine ram mipi le inn lo hna kha hmaithlak tein a kah hna. Ukriane nih Nitlak lei ram serchuah mi Patriot bantuk van ralvennak a herh lio ah, Russia nih van lei in a den chih caah Ukraine mipi an tuarnak a fak ngaingai. Kan hnu naite ah khan Russia nih drone le hriam ngan in a kah hna caah Ukraine mipi tampi an nunnak a liam. Russia nih cun Ukraine hriamnam umnak hmunhma kan i tinhmi le kan kahmi asi tiah an chim ko nain Ukraine mipi tampi an umnak khuapi le inn le lo a hrawh dih.

Kum caan saupi thinphang thlalau le ṭihnung ral lak ah khua asa mi Ukraine mipi hna caah Pope nih a ngaihchiatnak langhter i, raltuknak le i thahnawnnak vialte ngol dih in daihnak ser awk ah a thar in nawlnak a tuah ṭhan. Abik in kan hnu naite ah Russia le Ukraine tukdohnak he pehtlai in daihnak biaruahnak tuah ding in an i zuammi nih daihnak lam hruaitu si hram seh tiah Pope nih ruahchannak a ngeihnak kong a chim. United State in thlahmi palai Steve Witkoff le Jared Kushner hna cu Russia President Vladimir Putin ton awk ah Russia ah an kal. Putin cu 2022 thawk in Ukraine ram tuk a thawktu asi. United State nih thlahmi palai pahnih hna cu Putin he an ton khawh hnu ah Ukraine ah an kal lai i Kyiv ah Ukrainian President Volodymyr Zelensky he tonnak an ngei lai tiah theih asi.