Bawinu Mary Chuah Ni, September 8
Happy Birthday Mather Mary
-Pathian nu Mary chuahni puai cu kumfatin September (8) ni ah tuah a si.
-Pope Paul VI nih 1972 kum i a cathluan ‘Marialis Cultus’ ah ‘Bawinu cu kan khamhnak i fingrei cah sinak in rak hrinmi a si i, van le vawlei mi hna caah lunglawmhnak hrampi a si.’
-Petrus, Paul, Augustine hna bantuk, a thiang bik mi Mithiang hna cu sualnak ngeimi an si cio i, sual hrampi thladem tangah hrinmi an rak si.
-Sihmanhsehlaw cu Mithiang hna cu Bawinu Mary he cun an i lo lo. Bawinu cu sualnak nehnang pakhat hmanh ngei loin hrinmi a si.
-Lamkaltu hna cu an nun lamthluan ah sualnak le palhnak an rak tuah, an rak buar nain Pathian veel thawngin ngaihthiamnak a hmu mi an si.
-Bawinu Mary cu khi bantukin ngaihthiamnak a hmu mi, ngaihthiamnak a ingmi sual ngeimi a si lo. Sualnak hna ngaihthiam piaktu ding Khrih, mi khamhtu kha a hringtu a si.
-A thianghlimmi Vanmi Lamkaltu hna nih Jesuh kha ‘ka Bawipa le ka Pathian’ tiah an auh nain, Mary nihcun Jesuh kha ‘Ka Fapa’ tiah a auh.
-‘Hi Pa hi ka dawtmi ka Fapa a si’ tiah Pa Pathian nih a rak ti bantukin, Mary pakhat lawng nih ‘Ka dawtmi ka Fapa’ tiah a rak auh ve.
-Cucaah Mary i hrinnak cu khamhnak rian kha ‘a hramthawknak’ timi hmelchunhnak a si.
-Bawinu Mary cu sualhram in a luatmi a si caah sualnak i thildang chuahnak a simi; duhfahnak paohpaoh le tarnak, fahnak hna zongin a thiangmi a si.
-Hi puai ah biapi bik in langhter duhmi konglam cu; sualnak le muihnak chungah a rak ummi vawleipi cu Mary a chuahnak he hmunkhat in ceunak leiah a panhnak kong kha hngalhter kan duh hna.
-Cucaah Bawinu Mary cu van le vawlei a pehtlaihter tu hleihlak sinak in kan chuankhannak a si.
-Mary i a thiangmi hrinnak he aa rup in a ra chuakmi ceunak cu Khrih a ratnak kha a si i, cucu ‘Vawlei Ceunak’ ti a si.
-Cucaah Bawinu Mary cu ‘Khamhtu Jesuh umnak hmun hmasabik Biakinn-Rumra ngeimi inn’ zong a si. (Lk 1:42).
-Bawinu Mary cu biakamnak biahren thar kuang zong a si.
-Nu Mary hrinnak cu a ṭha khun mi vawlei thar pakhat a hramthawknak a si.
-Mary cu Fapa Pathin i nu si dingah Pa Pathian nih a rak thim cang caah hleikhun mi thluachuah veel in sualhram ngei loin pawimi a rak si.
-Eve i ngaihchiat lungkuainak, thihnak hna kha Pathian nu hrinnak nih minung chuahkehnak dihlak kha a thar in zungzal lunglawmhnak ah a thlenṭhan.
-Cucaah Bawinu Mary cu vawlei cung mi hna kha Pathian sinah a kalpitu hmaisuang lam hmuhsaktu Arfi tiah an tinak cu a si.
– Eden dum ah sualnak a luh thawk tein Bawinu Mary hrin lainak kong kha sernak hramthawk tein Pathian hrimhrim nih Profet hna hmangin a rak chimchung.
-Cucaah Vancungmi Gabriel nih a rak chimh mi cu; ‘Veel he a khatmi Bawinu, na cungah thluachuah um ko seh! Nangmah cu Pathian nih veel an ngeih’ tiah a ti. (Lk 2:28-30).
-Sualhram ngei loin pawimi Bawinu, kannih caah thla kan campiak ko tuah! Amen.
A lettu; Norbert Ca Ling
Hakha RVA ca lettu
3 Sep 2026 (Thurs)