Pathian Nawl Zulh

September 7, ni caah kan Nu Bupi nih a kan timhpiak mi Cathiang hna in thazaang laṭi ṭhan hna usih! 1Cor 5:1-8, Lk 6:6-11 chungin an si. 

Nihin ni ah kan Cathiang hna nih a kan cawnpiak duhmi cu; Khrihfa hna nih kan i ngeih dingmi lungthin cu; Bawipa leiah thlennak ngeih ding, kan lungthin ṭhing, ṭhatlonak ahkhan um peng loin a thianghlimmi Bawipa cawnpiak ning phunglam leiah kan nunzia thlen ding, cun kan zumhnak kha dawtnak in kan tuahsernak ah langhter ding timi kha a si. 

Voikhat Bible kan relmi ah; Corin khua Khrihfa hna sinah nunzia, ziaza ningcang loin an nun tikah i ṭhitumhnak in siseh, sual tuahnak in siseh, Khrihfa cawnpiak ning le Bawipa nih a kan duhpiak mi ningin an nun lo tikah Paul nih a chimhhrin hna. 1Cor 5:6 ah; ‘Thilnu tlawmte nih chang nawnmi cu a ningpi in a thawhter timi bia cu nan hngalh’ a ti. Thilnu tlawmte nih chang nawnmi cu a ningpi in a thawhter e a ti. Sualnak pelpawi te tiah kan ruahmi, a poi lo cuh tiah kan ruahmi te palhnak nihhin, thilṭha kan tuah mi, kan rak i zuammi vialte, har le fe tein kan rak sermi ṭhatnak vialte kha a hrawh khawh dih cikcek timi kha a langhter duhmi a si. 

Cun a 1Cor 5:8 ah; ‘Cucaah kan puai cu thilnu hlun, sualnak le ṭhatlonak thilnu hlun he cawhmi changreu he khan cawhmi si loin, thilnu aa tel lomi changreu, thiannak le biatak changreu he khan tuah usih’ tiah a ti. Zei puai tuah dingah? Bawipa nih a kan kawhmi nunzia dawh, Khrihfa nun puai ah nun ding caah hin Lawki nunzia le vawlei mi hna taksa nunzia in nun ding a si lo e timi kha a cawnpiakmi cu a si. Lawki nunzia kan ti tikah, taksa nunzia kan ti tikah mah zawn, mah nuamhnak, mah diriamnak lawng kawlnak leiah a panhtertu a si. 

Thawngṭhabia chungah Bawipa nih Sabbath ni i a cawnpiaknak ah mipa, a kut a zengmi pa a damter tikah Farasi mi hna le phungbia cawnpiaktu hna nih a sualnak an kawl. Bawipa cungah zeitindah kan thah kan nawn khawh lai? kan hloh khawh lai? tiin lam an kawl e timi kha kan hmuh. Cawnpiaktu a simi, hruaitu a simi Pathian bia a phuangtu hna nih Jesuh Khrih Pathian kha sual an kawl. A caan caan ah minung kan si ve tikah thazaang dernak kan ngei. Dawtnak, zaangfahnak, (စာနာနားလည်ပေးတတ်ခြင်း) timi kan ngeih hi a herh ngaimi cu a si. Khrihfa hna nih kan ngeih dingmi lungthin zong a si. Jesuh Khrih nih nihin ni ah a kan cawnpiakmi, a kan hmuhsak mi lungthin, nunzia zong cu kha te kha a si. Farasi mi hna nih Bawipa nih Sabbath ni ah a kut a zengmi pa a damter tikah rianṭuan a si tiah an ti i, sual an phawt. Bawipa nih (စည်းမျဉ်းစည်းကမ်း) pawl nakin zaangfah lungthin, ngaihthiamnak, dawtnak lungthin kan ngeih ding kha a kan duhpiak mi a si. Zarhpini ah khual tlawn lo ding a si, Zarhpini ahcun lo kal ding a si lo, Zarhpini ahcun zei rian hmanh ṭuan ding a si lo, Bawipa ni a si tiah mah ni i rianṭuanmi cu a sualmi taktak ah kan hmuh tawn hna. 

Jesuh Khrih cawnpiak ning le Jesuh Khrih tuahser ning hi zohṭhan hna usih. Bawipa nih Judah mi hna an phunglam kha pialkalh in dawtnak rian a ṭuan tikah kannih hna zong nih hi ni ahhin mi kan khamh ding a si lo maw? pakhat le pakhat caah kan i campiak ding a si lo maw? pakhat le pakhat kan i leen i thazaang kan i pek ve ding a si lo maw? inn ah um sawhsawh in um i pumh zong pumh lo, chiatnak ṭhatnak ni zongah chuah duh lo kan si sual maw? (စည်းမျဉ်း၊ ဉပဒေ) tu kha fekṭhup in i tlaih i mah nihkhan a kan ṭemtawn ahcun Bawipa duhning zia kan phan kho sual lai lo. Cucaah Jesuh Khrih nih a kan duhpiak mi, a kan cawnpiakmi nunzia cu kan lungthin Bawipa he, a thawngṭhabia he aa tawngh tikah, kan theih tikah, amah cawnpiaknak phunglam leiah i mer in Pathian mi hna kha bultawl thiam ve ding kha a kan duhpiakmi cu a si, Pakhat le pakhat i bawmh thiam ding, pakhat le pakhat thla i campiak ding, pakhat le pakhat thazaang i pek ding, i chanh ding kha Bawipa nih a kan duhpiakmi cu a si. 

Cucaah nihin Bupi nih a kan timhpiak mi kan Cathian hna chungin (စာနာတတ်သောနှလုံးသား၊ မေတ္တာတရားနှင့်ပြည့်ဝသောနှလုံးသား) dawtnak he a khatmi lungthin he Khrihfa pakhat le pakhat, innpa chakthlang hna cungah ṭhatnak a tuah khotu kan si khawh cionak hnga ding caah Bawipa nih a thar in thluachuahnak kan pe ko seh! Amen. 

Thazaang petu /- Fr. Fidelis Maung Sein