Dawtnak Lungthin he Pakhat le Pakhat kan i Cawnpiak Ding a si

Zarhkel (23) nak Zarhpi Ni kan phan ṭhan cang hna. Nihin kan relmi cathiang hna nih a kan cawnpiak duh mi cu “Pakhat le pakhat cungah ngeih ding mi dawtnak lungthin” kong a si. Pathian bia nih kih ah kih, lum ah lum ding, a lai-a kar lak ah um lo ding in a kan cawnpiak. Pakhat khat biatak kal tak in a pial sual tik ah um sawh lo ding, a palhnak le a dik lomi a tuah nak in aa mer ṭhan dingin chimh ding le cawnpiak dingin rian kan ngeihnak kong a si.

Voi(1) Bible relnak ah (Ezekiel 33:7-9): “Mipa, nangmah cu Israel mi hna caah ralvengtu ah kan ser” tiah a ti. A sual a palh mi hna cawnpiak ding le Pathian phunglam an zulh ṭhannak hnga ding caah rian fial a sinak kha kan hmuh. 

Voi(2) Bible relnak zongah (Rom 13:8-10): “Ahohmanh lei i ba hlah u – nan i batmi cu pakhat le pakhat i dawt lawng kha si ko seh. A minung hawi a dawmi paoh nih cun Nawlbia kha a zulh a si ko” tiah a ti. Dawtnak timi cu midang pakhat khat a ṭhatnak hnga ding caah lam kawl piak le chimhrin kha a si ko. A caan ah chimh a harmi zong an um tawn i ral bantukin hmuh si caan zong a um tawn. Sihmahsehlaw, Khrihfa mi hna nih kan tuah hnga ding a simi cu a sual a palh minu mipa kha Pathian sin a kir ṭhan nak hnga ding caah, lam hmaan a zulh khawh ṭhan nak hnga ding caah bawmh ding rian kan ngei timi kha a si ko. 

Thawngṭhabia (Mat 18:15-20) chungah: “Na unau pakhatkhat nih na cungah sualnak a tuah ahcun, amah sinah cun va kal law a sualnak cu va chim” tiah a ti. Khrih nih a hnu zultu a simi kanmah vialte kha rian a kan pek asi. A hnu zultu Khrihfa kan si taktak a si ahcun pakhat le pakhat kan i bawmh, kan i remh piak ding a si. Hramhram in a ning zak seh, a maul pho seh timi lungthin he kan chim ding a si lo. 

Dawtnak lungthin he i chimhrin nak ah hin lungsau a herh. Caan pek zong a herh. Khrih nih a nawl a zulmi hna, Khrihfa nunzia in a nung mi hna caah bia a kan kamh mi cu “Cun hi zong hi kan chimh hna: hi vawlei cungah hin, nan halmi thil kong ah, pahnih nan lung aa khah ahcun, nan halmi thil cu vancung i a ummi ka Pa nih an pek hna lai. Zeicahtiah ka min in pahnih pathum nan i pumhnak ah kei zong nan sinah ka um ve” tiah a ti. 

Kan hal mi thlacamnak kan leh hna lai a kan ti. Cun Jesuh hrimhrim nih nan sin ah ka um lai tiah a ti. Jesuh kan sin a um a si ahcun Thluachuah nganbik kan sinah a um tinak zong a si. Cun Jesuh hrimhrim cu thluachuah a kan petu zong a si caah a si. 

Dawtmi u le nau hna, dawtnak lungthin he Pathian Jesuh cawnpiak nak kha zul ko hna u sih. Pathian nih a kan hleng bal lo. A chim bangin a kan tuah piak taktak ko. Kanmah lei in a cawnpiak nak le a phunglam tu kha zulh khawh dingin kan i zuam ding a si. 

Thazaang petu /- Fr. Fidelis Maung Sein