Ram pumpi huap in “Sernak Ni” lawmhnak Thlacamnak “Missa pro custodia creationis”
“Sermi thil vialte Zohkhenhnak caah Vawleicung huap Thlacamnak Ni cu a hlan nakin biapi deuh in ruah a herh cang.” Pope Leo XIV (Creation Day 2025)
I. CAAN ṬHA
2015 kum thawk in Catholic bupi nih vawleicung pumpi huap in Ser a simi vialte hna caah thlacamnak ni cu September 1, asiloah a Zarhkhatnak Zarhpi ni ah tuah hram a rak thawk. Atu ah cun Missa thawinak chungah avoi(1) nak bik telh chih in (Creation Mass) tiin thlacamnak hna zong telh chih in tuah a si cang lai. Aa tinhnak hna cu:
1. Pathian mi hna nih a tu caan lio ah ton cuahmah mi kokek pawngkam harnak kongkau he pehtlai in biaknak lei hruaitu hna zong nih thazang chuah in telpi khawh deuh ding le “Laudato Si” nih a cawnpiak mi nunpi ding, cun timhcia tein cohlan thiam ding;
2. Sernak kong he pehtlai in Mino hna he Thawngtthabia chimphuannak in siseh, kokek pawngkam rawhral nak nih a chuahter mi harsatnak kongkau he pehtlai in fimchimhnak in siseh, biaknak lei cawnpiaknak le vawlei lei kap fimthiamnak (science) hna pehtlaihnak hngalh-theihter chinchin ding;
3. Pathian cu zeizong vialte Sertu a si timi cawnpiak ding le Pathian cu a kan tlanhtu-Khamhtu a si timi mi vialte nih an cohlan khawhnak- ruah khawhnak hna karhter chin ding(Benedict XVI nih a langhter bantukin);
4. Sernak biathli (mystery) nganpi ah Khrihfa zumhnak hrampi a simi Khrih i rianttuannak a thar in theihter-hmuhter ding (cf. Kolose 1:15-20)
5. Serhram thawk in hlanlio – a chanchan mi hna nih Pathian an rak biaknak hna kha sunsak thiam ding le sernak kongkau he pehtlai in thuk deuh in ruah tthan ding; tahchunhnak ah, Missa thawinak ah siseh, biaknak caan lio ah minung kut ttuan vawlei chungchuak hna Pathian sin pekchanh tthannak, cun Pathian thianghlim tein a sermi an si timi theih hngalh ding;
6. Khrihfabupi le biaknak dang hna naihniam deuh tein um ttuankhawh ttinak caantha a si timi tinhnak hna he thlacamnak cu tuah a si.
II. RUAHDING
“Sernak Ni” Thlacamnak ni ah “Sernak Massa thlacamnak” thar hmang in September thla a zarhkhatnak ah tuah dingin Bupi nih a forhfial.
Africa le Asia ram i episcopal conference 9 nih 2025 ah voikhat an rak tuah bal cang. Conferences 9 chungin ram 6 (Philipines, India, Nigeria, Ethiopia, Bangladesh, Namibia) nih September a zarhkhatnak an rak tuah. A dang 3 (Lesotho, South Africa, Ghana) ram hna nih September 1 nak ni ah an rak tuah cio hna. Khuaruahhar in theipar tampi zong an rak hmuh.
III. FIANTER NAK
Roman Missal i a tlangpi cawnpiaknak nih Bishop pawl a pekmi hna nawlngeihnak (#373-374) hmangin, ram pakhat episcopal conference nih ram pumpi huap in biakhiahnak tuah khawhnak nawl an ngei.
Ram pumpi thlacamnak ah “Mass for Special Needs” timi thlacamnak kha “Mass for Creation” thlacamnak caah hman khawh dingin nawl zong a pek.