Pathian ṭhawnnak cungah Bochannak Ngeih

Dawtmi u le nau hna, August (31) ni caah thlarau thazaang i lak ṭi ṭhan hna usih. August (31) caah kan rel hnga dingmi kan bible cathiang hna hi (1Kor. 2:1-5, Lk. 4:16-30) chungin a si. 

A voikhatnak bible kan relnak ah Paul nih minung thiamsannak in si loin Pathian ṭhawnnak, Pathian thlarau bochan in nan sinah thawngṭhabia kan chim, tiin cakuat chungah a langhter bantukin Pathian cungah zumhnak hmual kong kha a voikhat bible chungah kan hmuhmi a si. 

Thawngṭhabia chungah kan Bawipa Jesuh Khrih Nazareth khua ah a kal i, pumhnak inn ah thawngṭhabia a chimh hna. Ca a rel tikah, “Isaiah cazual kha an pek. Cazual cu a vun samh i, “Bawipa thlarau cu ka cungah a um, sifakmi hna sinah thawngṭha chim awkah chiti a ka thuh i saltanmi hna sin i luatnak thanh awkah a ka thlah. Mitcaw mi hna sin i khua hmuh ṭhannak pek awk le hremmi hna luatter dingah a ka thlah. Bawipa nih a mi hna a khamh hna lai ding kum cu va thanh awkah a ka thlah” tiah timi bible ca kha rel in thawngṭha a chimh hna. Mah tikah mi hna nih ruahchannak nganpi he Bawipa Jesuh Khrih sinin, “zeidah a chim hnga” timi an i ruahchan chuahmah lioah “nihin nan theihmi, nan hngalhmi cathiang a tling cang e” tiah a ti hna. 

U le nau hna, a caan ah Pathian bia, Pathian thawngṭha ka ngaih tikah kanmah siaremnak in maw kan ngaih (asiloah) kanmah kan i ruahchannak in maw kan ngaih (asiloah) Bawipa i a kan cawnpiak duh ningin maw kan ngaih timi zong hi ruah ṭhan hna usih. Biachim thiammi, bia dawhdawh a hmang thiammi hna bia ngaih cu a nuam ngaingai. Asinain thil hmaan, thil dik ning tein bia a chimmi hna, kan palh tikah kan palhnak in khan kan i thlennak hnga ding caah a kan cawnpiakmi bia hmaan te theih kha a caan ah a har ngaimi a si. Hika ah hin Paul nih Korin khuami hna sin ca a kuat hna tikah, “Minung biafang dawhdawh hmang in, minung hna theih hngalh duhmi biafang hna hmang in nan sinah ka ra lo. Thihnak in a tho ṭhanmi kan Bawipa Jesuh Khrih kong kha chim dingah nan sinah ka ra” tiah a ti hna tikah zeitindah kha lio caan zongah khan an rak ruah ning kha a si ve hnga. 

Paul nih bia a chimmi ah hin minung taksa sining in cun, ruah ningin cun cohlan ding hi a fawi lo. Paul zong nih a ṭih ve lo, Pathian ṭhawnnak bochan buin, Pathian fimnak bochan in nan sinah ka rak ra. “Jesuh Khrih, thihnak in a tho ṭhanmi Pathian Fapa kong kha chim dingah ka ra” tiah a ti. Thawngṭhabia chung zongah Bawipa nih, “atu i nan theih hngalhmi, cathiang chungin nan hngalhmi vialte hi nihin ah a tling cang, keimah cungah hin a tling cang” tiah a ti hna tikah a pummi vialte hna an khuaruah a har. “Mah thil hi cu a si kho lo. Joseph fapa, Mary fapa, kan pawngte ah a ummi, a sining vialte kan hngalh dih ko cu tah! Zeitindah hi pa cungah hin Pathian program vialte cu a tlin khawh dih lai. 

Mitcaw hna sin khua hmuh ṭhannak nawl zeitindah a cungah a tlin khawh lai. Sal tangmi hna luat ter dingah zeitindah a tlin khawh lai. Sifakmi hna sin thawngṭha chim awkah amah cu chiti thiang thuh a si khawh lai” tiin khuaruatmi tampi an um ko lai. Nihin ni ah thawngṭha kan ngeih tikah, Pathian bia kan ngaih tikah kanmah duh ningin maw kan ngaih (asiloah) Bawipa nih a kan cawnpiak ningte khan maw cohlan thiam dingin, kan lung i ṭhumh in Bawipa bia kha kan ngaih, timi te kha i ruat ṭhan hna usih. Jesuh Khrih nih a cawnpiak hna tikah a cawnpiaknak a cohlang duh lomi nih an kaltak, timi kan hmuh. 

Cu nihin ni zongah Bawipa bia a cohlang kho lomi Nazareth khuami hna zong nih Bawipa kha lungpang cungin thlak dingin an timh. An cohlang kho maw? an cohlang kho lo. Anmah duh ning tein Pathian bia kha hung kan chim seh, kanmah diriamnak dingin bia dawhdawh hmang sehlaw rak kan chim seh, ti ruahnak in Pathian bia kha ngaih khawh a si lo. Cucaah Bawipa nih a hmaan ning tein kan sin a rak langh i, a kan cawnpiak tikah cohlan thiamnak lungthin ngei hna usih. 

Jesuh Khrih Pathian Fapa minung taksa sining in a mi hna sinah a kal tikah an cohlang kho lo. Nihin ni ah nang le kei zong kan pawngah Bawipa nih a thlahmi, Bawipa muisam a kengmi hna kan sinah kan i ruahchan ninglo piin an rat tikah kan cohlang thiam ve hna maw. Kan hrial sual hna maw. Harnak a tongmi nu/pa zong kha kannih hna nih zeirel loin kan um sual maw. Bawipa nih a ti, “Sifakmi hna sinah thawngṭha chim awkah chiti a ka thuh i, saltangmi hna lunt nakhnga ding caah a ka thlah” tiah a ti. 

Saltannak, sualnak sal tannak in luatnak ding caah pakhat le pakhat thazaang kan i pe maw, pakhat le pakhat kan i bawm maw. Sifah harnak in kan luat nakhnga ding caah, tei khawhnak hnga ding caah pakhat le pakhat thazaang kan i pe maw, kan i bawm maw. Mitcaw mi hna a theih hngalhnak leiah siseh, ruahnak leiah a tlawmmi hna nih an theih hngalh lonak in, an ruahnak tlawmnak in an palh lo nakhnga ding caah kan bawm hna maw, pakhat le pakhat kan i umpi hna maw timi te zong kha nihin thawngṭha chungin thazaang i lak ṭhan hna usih. 

Minung cu mah ca lawngah khua a ruat tawnmi kan si, sihmanhsehlaw Bawipa nih a kan khamhnak ah hin Israel mi hna ca’h lawngah khan boundary te kha chiah si loin nihin ni ah mi vialte caah khamhnak thawngṭha a tlinnak a si, tiah a ti hna bantukin kannih hna zong kanmah umhmun te lawngah khan zoh loin pawngkam le mi vialte caah bawmhnak lungthin, Khrihfa lungthin, Bawipa duhmi lungthin a kheng khawh ciomi kan sinak hnga ding caah Bawipa nih a thar in thluachuahnak kan pe cio hram ko seh. Amen. 

Thazang petu /- Fr. Fidelis Maung Sein