Aluancia kum hra chungah, Ireland Catholic Bupi chungah tipil ingmi 30% hrawng a zor

Iona Institute nih hlathlainak a tuahmi ah, 2015  in 2025 kar (kum hra chung) ah Ireland ram ah Catholic Bupi chung ah tipil ingmi 29.6% a zor tiah EWTN News nih August 21 ah an thanh i  Crux  nih August 18 ah a thanh ve. Ireland ram, Catholic Bupi chung ah tipil ingmi an zornak a ruang pahnih langhter asi i a pakhatnak ahcun fahringmi an tlawm, an zor ruangah asi i, a pahnihnak a ruang cu biaknak a ngeilomi an karh caah a si tiah an langhter. Iona Institute data ning in, Ireland ram ah fahrin (birth rate) cu kum hra chung ah 18.8% a tla i tipil inngmi milu 60% hrawng a zornak cu nau ngei (fahringmi an zornak) pehtlaihnak a ngei tiah an ti. A taangmi ṭumchuknak a ruang cu biaknak ngeilo mi an karhchin lengmang caah asi tiah an langhter.

Hi ṭumchuknak zatuak cu pengkulh ning cio in i dannak hmuh khawh asi. Tahchunhnak ah, Kum hra chung ah, Dublin Archdiocese ah tipil ingmi 40% hrawng in a tla, Kerry Diocese ah 22.3% a zor. Down le Connor Diocese ah 37.9% le Meath Diocese ah 40.8% a zor tiah data latu nih an langhter. Sihmanhsehlaw, Ireland ram ah Catholic zumhnak a tlau  cang tinak a si lo. Iona Institute nih milu relnak cazin ning i a chimmi ahcun Ireland ram Catholic Bupi cu a um rih ko i ngakchia tipil peknak a um ko. Cun Irish Catholic Bupi chungah tipil in an duhmi mino zong an um i tipil in ding in timhtuahnak a ngeimi upa an karh ngaingai tiah Irish Catholic Bishops’ Conference nih 2025 ah an thanh. A tawinak in chim ahcun, Ireland ram ah Catholic Bupi chungah tipil ingmi milu an zornak a ruang cu fa hrinnak a zornak lawng si loin biaknak ngeilo an karhnak he zong aa pehtlai tiah hlathlainak nih a langhter. Sihmanhsehlaw, Catholic ka si tiah zumhnak fek tein a um i ngakchia tipil peknak phunglam cu a hmun peng, cun Catholic Bupi chungah luh dingin timhtuahnak a ngeimi upa zong an um ko ti hmuh khawh asi.