THIANG THLARAU ṬHAWNNAK IN A PAWI
Mary sin thawngthanhnak nih, “Can a tlinnak” (Gal. 4:4) kha a phuan. Pathian biakamnak le tinhnak a tlinnak a si. Mary cu “Pathian sinak tling” kha “a pum in” pawi awkah kawh a si. (Col. 2:9). Pa hngalh lo cun zeitindah a si khawh lai? a vun ti tikah, “Thiang Thlarau cu na cungah a rung ṭum lai,” tiah a leh. (Lk. 1:34-35). Thiang Thlarau thlahnak cu Fapa thlahnak he hmunkhat in a kal ṭi zungzal. (Jn. 16:14-15). Bawipa le nunnak petu Thiang Thlarau cu Mary pum kha thianter awk le Fa pawi ter awkah thlah a si i cuticun zungzal a hmunmi Pathian Fapa cu Mary chungin minung sinak kha a lak.
Ngaknu thiang Mary nih minung in a pawimi Pathian Fapa cu; “Khrih” a si. Cucu minung a si cangka in Thiang Thlarau nih chiti a thuhmi tinak a si. Cu bantukin chiti thuh a sinak cu duhsah tein a lang lengmang. Tukhal hna sinah; mifim hna sinah; tipil petu Johan sin ah le a zultu hna sinah a lang. (Mt. 1:20, 2:2-12, Lk. 1:35, 2:8-20, Jn. 1:31-34, 2:11). Cuticun Jesuh Khrih a nunnak dihlak ah, “Zeitindah Pathian nih Nazareth khua mi Jesuh kha Thiang Thlarau le ṭhawnnak in chiti a thuh ti cu a langh” (Lam. 10:38).
Ngaknu Thiang Nih A Hrin
Catholic Bupi nih Mary kong a zumhmi cu Khrih kong a zumhmi cungah a dir i, Mary kong a cawnpiakmi nih Khrih ah a zumhnak kha a cer ter ve, tiah a ti.
Mary Khaukhihnak
Pathian nih a Fapa kha a rak thlah; sihmanhsehlaw a caah pum kha a thimh piak. Pathian nih a sermi i lungtho tein ṭuanṭinak kha a duh caah a si. Cuasicaah zungzal hmunmi Pathian nih a Fapa caah Israel fanu kha a Nu caah a thim piak. Galilee peng Nazareth khua ah a chuak i amin cu Joseph nih a hammi Mary a si. (Lk. 1:26-27).
Biakam Hlun chungah a thiangmi nu hna nih Mary kong timhnak kha an rak tuah. A hramthawk hrimhrim ah EVE kha a si. Amah cu bia a ngai lo nain ṭhatlonak kha a tei hngami fa ngeih awkah bia a rak kam i minung vialte Nu si awk ca zong bia a rak kamh ṭhiamṭhiam. (Gen. 3:15, 20). Mah biakamnak ruangah cun Sarah nih a tar hnuah fa a pawi. (Gen. 18:10-14, 21:1-2). Minung ruahchannak in si loin Pathian nih thazaang a ngei lomi le a derthawmmi hna kha a biakam zumhtlak a sinak kong hmuhsak awkah a thim hna. Hannah, Samuel nu, Deborah, Ruth, Judith, Esther le nu dang tampi hna an si (ICor. 1:17, ISam. 1). Mary cu Bawipa i a misifak le a mitawidor hna lakah a lang khun. Amah nih zumhnak tak he ruahchan i khamhnak kha a hmuh taktak. Can saupi tiang an rak hngah hnuah Mar cungah a can cu a rak tling.