Lai Nunphung Cheukhat
Roco Phungphai
Hrilhfiahnak
Nuhrim fa nih ro co phung a si kan ti tikah minung pakhat ca lawng kan chim duhmi a si lo. Ro cotu pa a thih sual zongah tefa an ngeih ahcun a tefa nih co lengmang phung a si. Tefa a ngeih lo le nuhrim chungin a chuakmi a unau pakhatkhat nih an coṭhan lai. A biana ah ro cotu ding cu nuhrim fa an si caah cu nuhrim chungin aa sem i a chuakṭi unau le ṭafa hrinsor cotu dang ahohmanh an um ti lo, an dih lawngah a cunglei i kan ṭialmi number 2 in 7 tiang ah a kal ding a si.
Hi hna zong an i co ning cu Nuhrim chung i an i co phung tein a dotdot in an i co ve lai.
Kannih Lai miphun cu fanu ngeih ko zongah fapa ngeih lo ahcun fanu ro co khawh phung a si lo. Ro co khawh phung a si lonak cu ka pehṭhan te lai.
Rev. Solomon Van Hre nih a pehṭhan rih mi cu;
Nu le pa nih ngeihmi thilri, chawva a phunphun a ngei kho mi nihcun an dawtmi an fanu le hna kha an coter hna, an ṭhenh an pek ko hna. Cucu ti khawh a si lo. Kan Laiholh cun ‘kalh’ ti a si. An fanu an kalh ti tu in a si. Va a ngei lomi a si le kalh an ṭhenhpek ti tu a si.
Fanu nih an co khawh lomi ro thil hna cu pupa chan in an rak ngeih tawn mi vawlei innhmun, an ngeihmi hna lakah zuar chia tiin an ruahmi ṭhi lakah a ṭhabik, dar lakah a ṭhabik, le meithal timi hna khi an rak si. Cu thilri hna cu miphun dang sinah kal phung a si lo tiah an rak ruah. Hi hna hi fanu nih an laak an co khawh lomi thil le ro cu an rak si.
Hi bantuk pupa ro co he aa pehtlaimi thilri hna cu ro cotu fapa an ngeih lo caah aa naihbik u fa, nau fa nih co phung a si. Unau fa ti tikah aa tlak bik le aa naih bik nih an co phung a si. Ro cotu nih ro a co tiah hin a comi thil le chawva i laak, i co men tiang lawng khin a dihdongmi a rak si lo. Roco nih tampi ṭuanvo a rak ngei ve.
1-Ro a comi pa kha a nunchung vialte a chiatṭhatnak ah a fawi a harnak ah herh a si ahcun a herh ningin a theihhngalh pi lai.
2-Zeihmanh a ṭuan khawh ti lo a tar tik zongah a cawm lai, ṭha tein a zohkhenh a cawnghhramh lai, a thih tiang.
3-A thih hnu zongah kan Laiphung in a ruak a fim lai, ruakhngah, puantuam, thlanser, cun a herh ahcun sariahthawh, lungdonh, laamserhnak vialte ro cotu pa nih a tuahpiak dih lai, a liam dih lai. Ro a comi pa i a fanu kha amah a chuahpi a far taktak bantukin a zohkhenh a hramh lai. A va nih a mak sual zongah a thih hlan a paw a cawm lai. Kan Laiphung cun amah man zong a zulh dih hna lai. Nu zong nihkhan ṭa chuahpi bantuk ah aa serh lai. Zeizong caan kip ah ro cotu pa kha ṭuanvo a laakpiak tu a si zungzal lai.
HBC Khuahlun Biakinn pekchanhnak magazine i biaruahnak ah Professor Dr. Aye Aye Ngun nih a bialehmi chungah hitihin kan hmuh.
‘Kan i lo cio lo, Hakha le Falam ahhin thleidannak a tlawm deuh i Tidim ahhin thleidannak a tam deuh tiah ka ruah. Hakha phung roconak ah nutak fa lawng nih ro an co khawh i nuchun fa nih ro an co kho lo. Hi zawn ahcun nu hi an kan biapitter ngai. Cun ṭhitumh ah siseh, man kong ah siseh, ni le far zong kha a biapi ngai ah an kan chiah fawn. Cun fanule caah siseh, farle caah siseh, sunlawihnak a phunphun an kan tuahpiak. z.c. Puanparkai tbk. Cu nih a langhtermi cu Laiphung ah nu hi a biapi ah an kan chiah ko ti hi a si.’
Kan Laiphung ahcun nu ni ro co khawhnak lam a bituk i a um lo tiah kan ṭialmi cungah Nu ni ro co khawhnak lam a um ko tiah kan Laimi nih upadi thiam kan i ngeihmi Pi Sui Thluai Thang nih a tanglei bantukin a ṭial.