Sawmmi kan si

Caanṭha caan sunglawi a kan petu kan biakmi kan Pathian a min thangṭhat in um ko seh! Hakha service RVA a ngaitu nan dihlak cungah Bawipa nih a thar in thuachuahnak in pe ko hna seh! Tutan ah kan nu Bupi nih a kan timhpiak mi Matt thawngṭhabia 22:1-14 chungah zeidah kan hmuh ti a si ahcun; dal 14 nak kha kan rel lai. ‘Zeicahtiah sawmmi cu an tam nain, thimmi cu an tlawm’ tiah a ti. Sawmi cu an tam nain, thimmi cu an tlawm timi tlangtar in thazaang pek le ruahṭi kan duh hna. 

Nihin kan nu Bupi nih Mithiang Bernard puai a kan tuahpiak ni a si. Hi Mithiang Bernard hi kan zoh tikah; France ram ah a chuakmi a si. Chungkhar sang mi chungin a chuakmi a si i, thla a cam lioah ‘situation timi monk ah luh dingin Pathian nih aw a vun chimh mi, Pathian aw a theimi pakhat a si i, a hawi le kom, a chungkhar, a unau cheukhat he cu zateik sianginn chung ahcun an lut i, kumthum a rauh hnu ah zateik sianginn pakhat an dirh i, sianginn uktu pakhat ah a rak cang. Cun, thianhlimnak nun a ngeih caah a pa telh in a hawi le kom 130 zong kha lam dingah a hruai kho mi pakhat a si. 

Nikhat cu taksa duhnak vialte tei khawhnak dingah amah le amah kha ai hrem i, a kik ngaimi ti chungah thisa duhnak vialte tei khawhnak dingah a pum ai hrem mi, thianhlimnak nun a cawngmi, cuve bantukin khual riahnak inn i a um lioah hlawhhlangnu pakhat nih a taklawng in a rat hnawh i, umṭi dingah a rat hnawh nain khakha a hmuh bakin a kaltaak i, a zaamtaak i, a nun ah thianhlimnak nun kha a duhmi Mithiang pakhat ah a cang. Cuve bantukin amah thlacampiak nak thawngin khuaruahharnak, hmelchunhnak tampi kha a langhtermi Mithiang pakhat a si. 

Mithiang Bernard cu a thi dengmang mi tarpa pakhat khi a sual a palhnak vialte thlah khawhnak caanṭha a hmuhnak dingah bia a chimter kho i, khakha tarpa pakhat sinah bia chim khawhnak, ṭhawnnak, khuaruahhar hmelchunhnak kha a langhter ti hi Mithiang Bernard kong kan zoh tikah kan hmuh khawh mi a si. Mithiang Bernard a nunzia kan zoh tikah cawn awktlak, zohchunh awk a tlak ngaingai mi a si. Mithiang Bernard nih zeitin a chim ti si ahcun tuahnak ai tel lomi thlacamnak hna cu thawtnak a ngei lomi bantuk a si a ti. Tuahsernak ai tel lomi thlacamnak cu nunnak a ngei lomi thlarau bantuk a si e a ti. Cuve bantukin a chim rih mi cu zeitin; midang kha bia na ceih hlan ah nangmah le nangmah kha i chek hmasa a ti. Zeicah ti si ahcun midang nakin nangmah na sualnak zong kha a ngan deuh kho mi a si, a tam deuh kho mi a si. 

Cun a chim rih mi cu; ‘Death the get of life-Thihnak kan timi cu nunnak kutka chung luhnak a si e’ tiah a ti. Hi a chimmi hi ka tlaihchan ngaimi a si. Thihnak kan ton lo a si ahcun nunnak chungah kan lut kho lai lo a ti. Thihnak kan ton mi cu nunnak chungah luhnak kutka a si. Mithiang Bernard nih a chimmi ka tlaihchan ngaingai mi bia pakhat a si. Nang le kei nih a nunnak cawn awktlak ngai a simi cu thianhlimnak nun a cawngmi hi Mithiang Bernard kong ah kan hmuh khawh mi a si. 

Voikhatnak Bible kan relmi Ezekial 36:23-28 chungah zeidah kan hmuh ti si ahcun; Lungthin thar kan pek hna lai, thlarau thar nan chungah ka khumh hna lai, nan pum chung i lung bantukin a hak mi kha ka laak lai i, titsa bantukin a nemmi lung kha kan pek hna lai. Ka thlarau cu nan chungah ka khumh lai i ka nawlbia he aa tlak ningin kan umter hna lai. Lungthin thar, thlarau thar nan chungah ka khumh hna lai. Profet Ezekial nih Judah mi hna Babylon sal an taan lioah a rak ṭialmi a si ti hi nihin ni ah kan hmuh khawh mi a si. Harnak kong a chimmi tampi a um, ruahchannak a chimmi zong tampi a um. Nihin Bible hi kan zoh tikah Isarel mi hna lungthin thar le thlarau thar pek an hauhnak hi; an lung a khawng tuk mi an si ruangah a si timi cu ai fiang ngaingai mi a si. 

Cucaah zei ruangah dah a si ti ahcun Baal pathian hna an bia, serchom mi pathian hna an bia, thlaikheu ṭhatnak pathian hna an bia, a phunphun in a kan sertu Pathian kha bia loin pathian dang kha Isarel miphun hna nih an biak caah an lung a hak i, kha vialte kha Pathian nih Profet Ezekial hmangin ka thlen dih hna lai a ti. Ruahchannak thar a pekmi hna kha kan hmuh khawh. Kannih zong nifa kan nunnak ah lungthin thar le ruahnak thar kan ngeih khawh kha a herh ve. Pathian nih nang le kei a kan cawnpiak mi, tuah hna seh a kan timi hi pakhat a si. 

Nihin ah lungthin thar, thlarau thar he amah sinah thianhlimnak nun in panh ding le nun ding kha nihin kan relmi voikhatnak Bible nih a kan forhmi, thazaang a kan pekmi hi kan hmuh khawh. Cuve bantukin thawngṭhabia chungah zeidah kan hmuh ti a si ahcun; nupiṭhit rawldanghnak puai ah kan Bawipa Jesuh Khrih nih Vancung Pennak cu a fapa caah nupiṭhit rawldanghnak puai kha Siangpahrang nih a tuahpiak mi he aa lo tiin tahchunhnak bianabia a hman mi a donghnak leiah zeidah a chim; sawmmi cu an tam nain thimmi cu an tlawm e a ti. 

Siangpahrang pakhat rawldanghnak puai cu sunglawi ngaiin a tuah i, cu rawldanghnak ahcun mi vialte kha a va sawm hna. A va sawm hna tikah rawl ei a cu cang, zeizong vialte tlam a tling dih cang a ti hnu ah a sal hna kha a thlah hna i sawmmi hna kha a va auhter hna tikah sawmmi hna nihcun anmah le rian cioah an buainak kong, an i manh lonak kong, a phunphun in an rian kongah tampi in an lehnak bia kha a theih tikah Siangpahrang pa cu a thin a hung i, kha vialte kha, a ṭha, a si ahcun va kal ulaw zatlang lam ah nan hmuh mi paohpaoh kha va sawm hna u a ti. Zatlang lam ah a kalter mi a sal hna nihcun an hmuh mi paohpaoh kha an va sawm hna, rawldanghnak kha an khat dih. Cu liote ah nupi ṭhitnak thuam hruk loin puai chung i a ra lutmi pa kha a hmuh tikah; kawi, zeicahdah hi puai ahhin nupiṭhit thuam loin na lut zia a si e tiah a hal. Khakha a hmuh tikah cu pa zong nihcun zeihmanh a chim lo, chim ding um lo. 

Siangpahrang pa nih a chimmi cu; a sal hna kha, a kut le ke kha hri in ṭemu law khua leng mui lakah khan va hlonh uh. Khaka ahkhan va ṭap sehlaw a hacang va rial seh tiah a ti. Cuka ahcun an hlonh. Cucaah kan Bawipa Jesuh Khrih nih, sawmmi cu an tam nain thimmi cu an tlawm a ti. Nihin ah nang le kei, Khrihfa si dingah kan Bawipa nih a kan auh, a kan sawm, Khrihfa kan si hnu ah mi vialte a ho paoh nih Pathian kawhauhnak, sawmnak chungah aa tel dih mi kan si. Khakha nang le kei nih kan cohlan ding a si. Kha sawmnak aw, kawhauhnak aw kha nang le kei nih kan theih ciomi a si. Kha kan tonmi a kan sawmnak te kha nang le kei nih zeitindah kan cohlan, kan lehrulh timi kha a biapi ngaimi a si. Nihin ah nang le kei sawmmi kan si, a khamhnak chung luh dingah sawmmi kan si. Zeitindah nang le kei nih kan cohlan? Mi cheukhat nih a phunphun in an rianṭuannak kong ah kan i manh lo, kan ra manh lai lo an ti. Zatlang lam ummi vialte kha an va sawm dih hna. Sawmmi lakah pakhat te cu ai tel ve i, nupi ṭhitnak thuam in aa hruk lo kha an hmuh tikah leng ah hlonh a si ṭhan timi kha kan hmuh khawh. 

Cucaah kan nu Bupi nih hi kong ah zeidah a kan cawnpiak ti a si ahcun nang le kei tipil kan in lioah puan rangte kan lu cungah khuh in, hi puan rang nih thianhlimnak kha nan nunchung na thih hlan tiang naa ken lai tiah Tlangbawi hna nih sathau thiang a kan thuh hnu ah kan lu cungah puan rangte a kan khuhnak a si. Cu nihcun zeidah a langhter; kan thih tiangin Mithiang Bernard bantukin thianhlimnak nun te khi, dinnnak te khi, Pathian duh mi nunnak te khi kannih nih kan i ken dingmi a si, taksa duhnak vialte kha tei in thianhlimnak nun ngei tein, zumh awktlak tein Pathian fanu fapa ṭha bantukin kan nun thiam ding kha kha nih khan a langhter mi a si. Hi mipa pakhat hi nupi ṭhitnak thuam ai hruk lo caah lengah hlonh a si ṭhan timi kan hmuh. 

Nang le kei zong kan thih hlan tiang thianhlimnak ngei loin, Pathian khamhnak kan co lo a si ahcun kan nun a si ahcun, nang le kei zong lengah hlonh ṭhan kan si lai. Cucaah sawmnak chungah cun kan i tel ko lai nain, thimmi chungah ai tel taktak mi zumtu Khrihfa kan sinak hi a biapi ngaingai mi a si. Thimnak chungah kan i tel lo a si ahcun zeitluk in Khrihfa kan si zongah cucu san a tlai lomi a si. Cucaah Khrihfa u le nau hna, nang le kei zong; sawmnak chungah kan i tel ko lai, thimnak taktak chungah aa telmi, nupi ṭhitnak thuam ai hrukmi, nun thiannak, dinfelnak, zumh awktlak sinak ai hrukmi, a khamhnak a tingco mi, thimnak chungah aa tel mi fanu fapa kan si cionak lai, a bawmhnak kha hal usih. Pathian sinah zaangfahnak hal usih, thianhlimnak nun thimnak chungah aa telmi fanu fapa ṭha kan sinak dingah Hakha service RVA a ngaitu nan dihlak cungah Bawipa nih a thar in thluachuahnak in pe ko hna seh. Amen.                 

Thazang petu /- Saya William