Dawtnak lungthin he Remnak tuah

August 12, cacawn nithum ni caah Pathian biathiang in thazaang laa ṭi hna usih! Pakhat le pakhat dawtnak lungthin he i remh, i cawnpiak hna usih timi biatlangpi in thazaang hrawmh kan duh hna. 

Ezekial 9:1-7,10:18-22 le Mt 18:15-20 chungin nihin kan relmi Cathiang hna cu an si. Pakhat le pakhat i cawnpiaknak, i remhnak, cun toidornak lungthin he Pathian sinah ngaihchihnak lungthin he vun kirṭhannak, cun pakhat le pakhat lungthin khat tein thlacam ṭi in, Pathian biakṭi nak timi kong hna hi nihin kan hmuh khawh mi cu a si. Ezekial chungah Pathian miphun hna zumhtlak an sinak ah Bawipa nih thlua a chuah hna i a zumlotu le Pathian cawnpiak ningin a nung lomi hna dantat an sinak kha kan hmuh. 

Bawipa Pathian cu lenglei lawng siloin chunglei kan nunning, kan zeizong vialte a kan hmu kho dih tu a si timi kha a langhter duh mi cu a si. Pathian hmai ah zei thil hmanh kan thuh khawh mi a um lo, cun Pathian nih amah sinah kan palh tik caan zongah amah sinah ngaihchihnak lungthin he rak kirṭhan zungzal ding kha a kan duhpiak mi a si. Thawngṭhabia kan zoh tikah minu mipa pakhatkhat, kan cungah palhnak an tuah tikah siseh, palhnak a um tikah an kong chia kha an hnu in chim ceih si loin anmah sinah va kal i pahnih te lawngin ‘aaa, hihi cu na palh, Pathian duh ning si lo, kei zong ka ngaih a chia, ka ca zongah a ṭha lo’ timi pakhat le pakhat hmaitonh tein i dawtnak lungthin he i remh ding kha a langhter mi a si. 

Cucaah Jesuh Khrih nih a kan cawnpiak mi ah; pakhatkhat an thazaang dernak kan hmuh tikah an kong chia ceih ding kha a hmangmi kan si ti kha Bawipa nih a theih caah hmaitonh tein, lungthiang tein, dawtnak lungthin te he pakhat le pakhat zuamnak ngeih loin lungthiang tein pakhat le pakhat kan i remh ding kha a kan cawnpiak mi cu a si. Mah zawnte zongah khan vun zohṭhan usihlaw; i remh kan tinak ah pakhat le pakhat cungah i upatnak lungthin ngeih loin kan um a si ahcun kan hawinu kan hawipa kha kan va remh kho lo. Cun kan dawt hna lo a si zongah kan hawinu kan hawipa hna kha kan remh kho ve hna lo, kan cawnpiak kho hna lo. Hi cawnpiak kan tinak zongah, remhpiak kan tinak ah pakhatnak bik ah kanmah le kanmah zong kha i chek i dah kan hau hmasa ve. A cawnpiaktu ah kaa tlak taktak maw? A remhtu taktak ah kaa tlak maw? Kei hi tah zeibantuk nunzia in a nungmi dah ka si? timi te zong kha i zoh ve a hau. 

A caan caan ah kan dawt hna ruangah chimhhrin a um bantukin pakhat le pakhat karah ‘anih cu a palh e, kei cu ka hmaan e’ timi langhter duhnak lungthin mi cheukhat, midang nu, kan hawikom hna kha a cawnpiaktu kan um tawn. Cu tikah kha nih khan zeidah a chuahter; remnak a chuahter lo, i huatnak le i ṭhencheunak tu lawng kha a chuahter. Cu a si caah mi kong chia ceihnak nihhin zeitik hmanh ah funtomnak siloin cheunak le ṭhennak lawngte kha a chuahter caah Bawipa nih pakhat le pakhat cungah nan palh, ka palh e ti nan theih tikah va kal law mah na hawinu na hawipa, minu mipa he cun direct in nanmah te lawng kha palhnak kha i remh ulaw a kan timi a si. Mah zawnte zongah i remh kan tinak zong ahhin tangdornak lungthin kan ngeih a hau. A puarmi nih zeitik hmanh ah ka palh ee tiah aa phuang bal lo, an cohlang kho lo. Tangdornak lungthin a ngeimi lawng nih a palh tikah ‘aww, ka palh tit ah, kai remh a hau’ timi cohlan thiamnak lungthin kha ngeih tawn a si. Mah kha Jesuh nih Pathian nih a kan duh piak mi, a kan cawnpiak mi cu a si. 

Ezekial chungah an palh tikah amah sinah Pathian sinah ngaihchihnak thinlung he vun kirṭhan ulaw a timi cu nihin Thawngṭhabia chung he kan pehtonh tikah mah kha a si. Cun Bupi chungah rianṭuannak zongah, Pathian rian kan ṭuan kan ti, asiloah Bupi chungah Khrihfa upa rian kan ṭuan kan ti, asiloah Bupi chungah member kan sinak ah a thazaang dermi, palhnak pakhatkhat vawlei mithmuh in kan hmuhmi ah palhnak pakhatkhat a tuahmi nu, a tuahmi pa kha dawtnak lungthin he a remhtu maw kan si; asiloah a hnulei in a thangchiat tu maw kan si; a chiatnak a chimtu, a phozaam tu maw kan si timi te zong kha ruatṭhan hna usih. Jesuh Khrih nih i remh kan tinak ahhin dawtnak lungthin le upatnak lungthin te he kan i remh ding hi a kan cawnpiak mi cu a si. 

Cun thawngṭha Matt 18:19,20 lei kan zoh tikah ‘thlacam tikah keimah min in pahnih pathum um in thla nan cam tikah nan lakah ka um e’ tiah Bawipa nih a ti. Khrihfa kan sinak ahhin Pathian a zummi hna lawng a bu dang tein um kha siloin kha kan umnak zawn ahkhan dawtnak lungthin he khual a tlawngṭi mi kan si i mah zawnte ahcun Jesuh Khrih hrimhrim kha kan lakah khual a tlawng ve, a um ve timi kha kan hngalh ding a si. Jesuh Khrih hnuzul sinak, Jesuh Khrih a cohlangmi kan sinak ah Jesuh Khrih kha kan thawn, kan telh lo a si ahcun a palhmi, a pial sualmi zumhnak a si lai. Khrihfa kan si sual lai. 

Cucaah pakhat le pakhat cungah palh sualnak te, chim sualnak te um tikah Jesuh Khrih telh buin dawtnak lungthin he i remh hna usih. Pahnih pathum keimah min in thla nan camnak ah Bawipa nih kan umpi hna lai, nan lakah ka um e a timi zong kha theih buin kannih cu Jesuh Khrih he ṭhen khawh lomi, Jesuh Khrih he a kal zungzal dingmi, kan umnak kipah Bawipa Jesuh Khrih min in thla kan camnak ah Bawipa kan sinah a um e timi te kha thei in pakhat le pakhat dawtnak lungthin te he i cohlang thiam hna usih, i kilveng thiam hna usih. A ngaitu nan dihlak cungah Bawipa nih thluahchuah in pe ko hna seh!   

Thazang petu /- Fr. Fidelis Maung Sein