PATHIAN FAPA NGEIHCHUN
Bible Hlun chungah “Pathian Fa” timi cu; vanmi hna, thimmi miphun, Israel fale hna le an siangpahrang hna kha pekmi min a si. (Deut. 14:1, 32:8, Job. 1:6, Ec. 4:12, Hos. 2:1, Jer. 3:19, Sir. 36:1, Fim. 18:13, IISam. 7:14, Ps. 82:6). Mah nih hin minung le Pathian karlak ah aa naih ngaingai mi pehtlaihnak kha a langhter. Biakamhmi Messiah Siangpahrang kha “Pathian Fapa” tiah an auh tikah minung nakin a sang deuh ti a si lem lo. Jesuh kha Israel mi Messiah a si tiin “Pathian Fapa” tiah a timi hna nih sullam thuk deuh in a ti hlei lo. (IChan. 17:13, Ps. 2:7, Mt. 27:54, Lk. 23:47).
Simon Peter nih Bawi Jesuh kha, “A nungmi Pathian Fapa, Khrih” a vun ti tikah Jesuh nih biatak ngain a chim, “Thi le sa nih mah kong hi nangmah sinah a phuan a si lo, vancung i a ummi ka Pa nih an phuanter mi a si,” tiah a ti. (Mt. 16:16-17). Cu bantukin Paul zong nih Damaskas lei a kal lioah lungthlennak kong kha hi bangin a ṭial, “Ka chuah hlanin a dang tein a ka thleidan i a vel thawngin a ka auhmi nih a Fapa kha ka sinah phuan a duh; cucu amah kong kha Jentel mi hna sinah ka phuannak hnga ding caah a si. (Gal. 1:15-16). Cun pumhnak inn ah khan Jesuh cu, “Pathian Fapa a si,” tiah a chim cawlh. (Lam. 9:20). A hramthawk in Khrih Pathian Fapa a sinak theihthiamnak cu lamkaltu hna zumhnak hram a rak si, Peter nih a phuan hmasabik. (IThes. 1:10, Jn. 20:31, Mt. 16:18).
Peter nih Jesuh cu Pathian Fapa Messiah a si, ti a theihmi Jesuh nih cu bantuk cun ka hngal seh tiah nawl a pek caah a si. Sanhedrin biaceihtu hna hmai ah sual a puhtu hna hna nih, “Asiahcun Pathian Fap ana si maw? tiah an hal tikah Jesuh nih, “Ka si” ti cu nanmah nih nan chim,” tiah a leh hna. (Lk. 22:70, Mt. 26:64, Mk. 14:61-62). Mah hlanah Jesuh nih a miphun sinah Pathian nih a rak thlahmi a sal dang hna he aa dangin Pathian kha a hngalmi Fapa ka si, tiah a chimcang i vanmi hnanak hmanh in a sang deuh in aa chim. (Mt. 11:27, 21:34-38, 24:36). Pa Pathian kha “Kan Pa” a ti lo, Ka Pa” tiah a ti. Fapa a sinak kha a langhter. Thlacam a cawnpiak tik hna ah, “Kan Pa” a titer hna nak cu “ka Pa le nan Pa” a simi a ti duhnak kha a si. (Mt. 5:48, 6:8-9, 7:21, Lk. 11:13, Jn. 20:17).
Thawngṭhabia nih tipil a in caan le a muihmel aa thlen caan lio hna ah Jesuh kha Pa nih “Ka dawt bik Ka Fapa” a tinak kong an chim. (Mt. 3:17, 17:5). Jesuh nih amah le amah kha, “Pathian Fapa Ngeihchun” aa ti i mah min cu zungzal in a rak um ciami a sinak kha a fehter. (Jn. 3:16, 10:36). Amah nih, “Pathian Fapa Ngeihchuh” tiin zumh kha a duh. (Jn. 3:18). Rom ralbawipa nih, “Mah pa hi cu Pathian Fapa taktak a si,” a timi ah Khrihfa zumhnak phuannak cu theih a sic ang. (Mk. 15:39). Lanhtak biathuk chung lawngah a zummi nih, “Pathian Fapa” min kha a sullam tlingin a pek khawh.
A thawhṭhan hnuah Jesuh Pathian Fapa a sinak cu thangṭhat a si i a minung sinak i ṭhawnnak ah a lang. Amah cu mithi sinin a thawhṭhannak in thiannak thlarau ṭhawnnak thawngin “Pathian Fapa” tiah zumh a si. (Rom. 1:3, Lam. 13:33). Lamkaltu hna nih, “Kannih nih a sunparnak kha kan zoh, Pa chungin Fapa ngeihchun lawng nih a ngeihmi sunparnak, vel le biatak he a khatmi a si,” a ti. (Jn. 1:14).