Jesuh sin a rami hna cu Kutlawngin an kir bal lo

Nihin cu zarhkel (18)nak zarhpi ni a si. Jesuh Khrih nih mithiang Johan thah a si nak kong a theih hnu ah mipi hmai ah lang ngai in thawngṭhabia phuan ding le cawnpiak ding aa harh ngai ko lai. Sihmanhsehlaw, Bawipa nih a kal tak hna lo. 

Mipi zong nih Bawipa bia theih ding le a cawnpiaknak ngaih dingin zaanlei pi tiang a hnu zulh in an um kha kan hmuh khawh. Zultu hna zong nih mipi nih hitin an zulh pengnak kong le le mipi an rawl a ṭam cang lai timi an thieh tikah Jesuh cu “mipi kha kal ter cang hna” tiin an ti. Sihmahsehlaw Bible thiang ah kan hmuh bangin Jesuh nih changreu le nga a karhter i mipi a dangh hna kha kan hmuh. 

Jesuh nih cu thil tlawmte kan ngeih mi chungin khan thil lianngan a tuah khawh timi kha kan theih ding a si. Ngakchia pa te nih a ngeih mi rawl tlawm te khan mipi cu a cawm ko hna. Cun kan theih rih ding a simi cu Johan thah a tonnak zong hi ‘rawl dumnak puai ah a si’ timi kha a si. Mi thong nga Bawipa nih rawl a dangh hna nak le Herod nih a hawi theih hngal mi rawl a dangh hna nak sining hi aa dang tuk hringhran kha kan hmuh khawh. 

Herod rawl danghnak puai ah a rami hna cu nawl ngeihnak hmang in midang cungah an thil ti khawhnak a langhter tu an si. Mi thah hmang le mah zawn lawng ruahnak a ngei mi hna an si. 

Jesuh rawl danghnak tu cu ‘damter nak, siannak le dawtnak rawl danghnak’ a si. Cun pakhat le pakhat nawl i ngeih in pakhat le pakhat i theihthiamnak, i zangfah nak hmun ah a si. Cun Bawipa rawl danghnak hmun zong cu “Amah thisa” i cawmnak(Missa thawinak) a langhter tu a si. 

Cuasicaah, Missa thawinak kan tuahnak hmun paoh cu Vancung rawl danghnak, dawtnak rawl danghnak, kan sinah Vancung Pennak a langhter tu rawl danghnak a si timi kha kan theih ding a si. Missa thawinak ah kan rat fatin te vawlei thil sining hna le ruah ning hna in kan rat a si lo. Mah zawn lawng ruahnak timi lungthin kaltak in Bawipa dawtnak hmun ah kan rat a si. Bawipa dawtnak le a zangfahnak cungah kan i apnak hmun a si. 

Nihin thawngṭhabia chungah zultu hna nih rawl ṭam in a um mi mibupi kha kalter dingin an timh tikah Bawipa nih a thloh hna timi kha kan hmuh khawh fawn. “An ei hnga ding mi nanmah nih pe hna u” tiah a ti hna. 

Dawtmi u le nau hna, nihin biakinn pi ah kan rat hi Pathian sinin thluachuah kan hmuh khawhnak hnga ding caah a si. Thlarau rawl in kan khimnak hnga ding caah a si. Biakinn kan panh hi a sawhsawh a si lo. Pathian dawtnak ah ruahchannak he a ra mi hna zong kha kut lawngin kan kal-kir ter hna ding a si lo. Thlarau lei in an herh taktak mi kha an cohlaan khawh i ‘Thlarau rawl’ in khim tein inn lei kan kir ter hna ding a si. 

Na pawng kam ah Pathian thlarua ti-rawl a haal taktak mi le a ṭam taktak mi hna kha zeitin na bultawl tawn hna? An herh mi kha pek loin kut lawng in na kir ter sual tawn ve hna maw? Pathian Biakinn cu dawtnak le zangfahnak, thlarau rawl dumnak hmun a si kha thei zungzal ko. Jesuh sin a rami hna cu Jesuh nih kut lawngin a kir ter hna lo.  

Thazang petu /- Fr. Fidelis Maung Sein