Rian zong kan ṭuan lai, Thla zong kan cam lai

Khrih ah dawtmi u le nau hna, nihin July (29) ni ah Bupi nih Mithiang Marta puai a kan tuahpiak. Nihin kan relmi Gospel thawngṭha chungah kei nih ka lakmi cu (Lk. 10:38-42) i, kan Bawipa Jesuh Khrih Mary Marta hna sin i a va len tikah Mary nih kan Bawipa Jesuh Khrih cawnpiaknak kha a pawngte ah ṭhut in, a kehram te ah ṭhut in biatak tein Pathian cawnpiaknak kha a ngaih tikah a u Marta, cokaa ah buai ngaiin rian a ṭuan cuahmah lio, zaanlei ei ding si lai cu, timhtuahnak a ngeih lio ah a lungsau ti lo i, “Bawipa, Mary kha rak chim law rian rak ka bawm seh. Mah ti khan ṭhu sawh hlah seh, rak ka chimh piak tuah” tiah Bawipa sinah khan Marta nih a ti tikah, “Mary nih thilṭha aa thim cang e” tiah Mary tuahsernak cung khan Bawipa nih thangṭhatnak bia a chimnak kha kan hmuh. 

Hi zawn ah rianṭuannak hna hi santlai ti lo maw? A si lo rianṭuan timi hi kan herh zungzal i cun thlacam, Pathian bia ngaih timi zong hi a pahnih in a kal ṭi ding a si. Rian lawng kan ṭuan zungzal i thla kan cam ti lo, Pathian he pehtlaihnak kan ngeih ti lo a si ahcun mah khakha Bawipa nih ralrin a kan pekmi Pathian sinah kir ṭhan uh, Bawipa he pehtlaihnak tuah ṭhan uh, Mary bantuk tein khan Pathian bia ngai ṭhan uh, timi kha a kan cawnpiak duhmi cu a si. Kan rianṭuannak hna hi kan thlacamnak in thazaang lak in kan tuahser, kan ṭuan kawl hawlnak ah hin thlennak theipar ṭha a langhnak ding kha nihin i Bible thiang nih a kan cawnpiak duhmi cu a si. 

Profet Jeremiah a voikhat bible kan relnak ah Bawipa hnu a zulh ruangah, Bawipa cawnpiakmi a ngaih ruangah, cun Bawipa phunglam ningin a nun tikah mikip nih an hlawt. Hlawt a tonnak kha Jeremiah nih a langhternak kha nihin ah voikhat bible kan rel mi cu a si. (Jeremiah 15:10, 16-21) chung ta kha kan relmi cu a si. Sihmanhsehlaw Bawipa nih, “nangmah cu keimah rianṭuantu na si caah zeitik hmanhah kan hlaw lai lo e” a ti. Jeremiah zong Bawipa bia a ngaih i Bawipa he pehtlaihnak a ngei i a rianṭuannak ah Bawipa nih a hlaw lo, Bawipa nih a khamh, a um pi. 

Marta le Mary hna, kan thawngṭha chung i kan hmuhmi bantukin rian lawng hi maw rian kan ti lai (asiloah) thlacam lawng hi maw thlacam kan ti lai. Minung cu taksa he thlarau he a nungmi, a kalmi kan si caah rian kan ṭuan a herh bantukin thlarau lei ca zongah thlacam kan herh. Bawipa Pathian a kan sertu he pehtlaihnak kan ngeih a herh. Thla zong cam i taksa lei rian kan ṭuan lo a si ahcun mah zong cu thil a si kho lomi a si. Zeicahtiah Bawipa nih Eden dum chungah Adam le Eve a chiah hna tikah a sermi thil zohkhenh dingah nawl a pek hna. Cun rian a fialmi hna an si bantukin nihin nang le kei zong Bawipa nih a kan sermi amah i thlarau biakinn pi a simi kan pumsa ca zongah hin rian kan ṭuan a herh. Thiangtlim tein le dawh cah tein kan um nakhnga ca zongah, Pathian hmaiah co tlakmi kan si nakhnga ding ca zongah thla kan cam a herh. Kan tuahsernak tu ah hin kan thlacamnak i a theipar kha lang seh, timi kha nihin i kan cathiang hna chungin thazaang hrawm ṭi kan duhmi hna cu a si. 

Cu a si caah dawtmi u le nau hna, Marta bantukin sivang le kan tha a bat tikah rianṭuan loin a ummi kan hawile hna kan chungkhar hna siseh kan hmuh hna caan um ko lai. Sihmanhsehlaw Pathian kan i pehtlaihnak ah hin ta zeitindah kan nun, kan kal ve. Cun hi kan chungkhar hna, kan hawikom hna Pathian he an i pehtlaihnak cungah hnahchuahnak lungthin kan ngei sual maw? Ngei hlah usih. Bawipa nih a thiantermi, Bawipa nih a kan pekmi kan taksa kan pum zohkhenh ding hi kannih hna i kan rian a si caah hi riante hi kannih hna zong nih biatak tein tlinh khawh in Pathian hmaiah cotlakmi pumsa thlarau a si khawhnak ding caah thluachuah hal hna usih. 

Martha nunzia kan zoh ṭhan tikah Martha cu kan Bawipa Jesuh kha a zumh taktak. Cun a daw taktak tu a si timi zong kha (Jn. 11:21) chungah khan kan hmuh. An ṭapa Lazarus a thih tikah Bawipa nih a sinah hnemh dingah a va tlawn hna tikah Martha nih Bawipa a hmuh tikah, “Bawipa hika ah hin rak um law cu ka ṭa hi a thi hnga lo, sihmanhsehlaw atu zongah hin na halmi paoh cu Pathian nih an pek lai ti kha kan hngalh” tiah a ti. “Bawipa hika ah hin rak um law cu ka ṭa hi a thi hnga lo e” tiah Martha nih Bawipa cung i a dawtnak le a zumhnak le aa ruahchannak kha, aa bochannak kha a langhter.

 Cuasicaah taksa lei in rian a ṭuan pengmi, tiah Martha kha kannih hna nih mawhchiah loin Bawipa aa bochannak le Bawipa a dawtnak le Bawipa thilti khawhnak cungah zumhnak a ngeihmi kha kannih hna nih kan i cawn ding a si. Nifatin kan nunnak ah “Bawipa na ka umpi a si ahcun, Bawipa keimah he na kal a si ahcun teinak ka hmuh ko lai” tiah kannih zong nih thlacam usih. Israel mi hna Moses nih a hruai hna tikah Bawipa sinah thla a cammi cu, “Bawipa nangmah nih na kan kalpi lo a si ahcun zei ti hmanh in varal lei kan phan kho lai lo e” tiah a ti bantukin kannih zong kan nunnak ah vancung ramnuam tiang kan phak khawh nak ding caah “Bawipa nangmah nih khual rak kan tlawnpi law kan umpi ko” timi thlacamnak te he nihin ni ah thazaang pek kan duh hna. Nan dihlak in Bawipa nih thluachuah in pe ko hna seh. Amen…  

Thazang petu /- Fr. Fidelis Maung Sein