Bawipa Dawtnak na Philh Sual Maw?
Nihin ni caah kan nu Bupi nih thazang lak ṭi dingin a kan timh piakmi cathiang hna cu (Jeremiah 14:17-22; Psalm 78; Matthai 13:36-43) hna hi an si. Nihin kan cathiang hna nih an kan cawnpiak duhmi cu kan lungthin, kan sining kha i check, i dah dingin a kan sawm, a kan cawnpiak duhmi cu a si.
Jeremiah chungah Israel miphun hna nih harsatnak an tonmi, fahnak an tonmi vialte hi ramkhel lei in le social buaibainak si loin Bawipa Pathian kha an kal tak, a hmai ah zumhtlak in an nun ti lo ruangah a cangmi theipar, fahnak, harnak a si kha profet pa nih a rak cawnpiak hna. Sihmanhsehlaw, Jeremiah cu a lung a rawk maw tiah cun a lung a rawk lo. Bawipa Pathian sinah zangfahnak hal in, Bawipa hmai ah zumh tlak tein an nun khawh ṭhannak hnga ding le Bawipa phunglam tu kha an zulh khawh ṭhannak hnga ding tu ah khan fakpi in thla a cam i a rak cawnpiak hna.
Hi kong hi nihin kan relmi Psalm chungah kan hmuh khawh ṭhan mi a si. Hi miphun hna cu, hi chan minung hna cu a lung a khong mi, philh a hmang mi, zumhnak a ngei lomi an si tiah Psalm chungah kan hmuh mi cu a si. Bawipa Pathian nih an caah thil lianngan a rak tuahpiak mi hna kha an hmuh an ton ko. Sihmanhsehlaw, rili sen in siseh, ral phun kip in a rak khamh hna nak zong kha an hmuh ko nain, an cung i ṭhatnak a rak tuah tu Bawipa kha an philh tikah, cu an philhnak, zumhtlak an si ti lonak nih khan nawl ngeih duh lonak, thlarau lei in mitcawtnak tiang kha a phanhter hna. Cu tikah Israel mi hna cu harsatnak an tong timi kha a langhter ve.
Thawngṭhabia chungah Jesuh Khrih nih fang kung, thlaici kong a kan cawnpiak. Thlaici cu vorh a si tikah hmunhma kip ah vorh an si tawn. An tlak nak hmun cio in an kheo cio hna. Sihmahsehlaw, hmanung bik ni, facang ṭuan caan a phak hlaan tiang kha Bawipa Pathian nih cun lungsau tein a hngah ko.
Kannih vialte hna zong hi vawlei pi ah thlaici vorh bantukin hmunhma kip ah kan phan ve hna. Pathian duh ning tein le a kan timhpiak mi hmun ah aa tlak tein kan phanh khawh nak hnga ding caah minung hna kan sual i ngeihchih ṭhan ding le Amah lei ah kan kir ṭhan ding kha Bawipa nih a kan cawnpiak duh mi cu a si.
Mithiang mi hna nunzia kan zoh tikah nifatin an nunnak ah mah zawn lawng kha ruat ti loin Bawipa an ton tikah Bawipa fial mi le Bawipa cawnpiak mi nunzia te kha nihin Khrihfa hna nih kan nun ve ding kha nihin thawngṭhabia nih a kan cawnpiak mi cu a si.
Mitampi nih Bawipa kan cung i a ṭhatnak kha philh riangmang in amah sinah thlacam duh ti lo, thlacam philh, cun lawmhnak biachim ding zong philh hna kan hman a si ahcun Isarel mi hna an ton mi harsatnak Jeremiah nih a chimmi kha kan cungah a tlung ve sual lai. Bawipa kan cung a ṭhatnak kha theih hngalh bu tein amah sin lunglawmhnak he a kan cawnpiakmi kha zulh khawh ding le, a kan timhpiakmi hmun kan phak tiang Bawipa cawnpiak mi ning tein khan nun khawh ding kha nihin thawngṭhabia nih a kan cawnpiak duhmi cu a si.
St. Victor puai kan tuah ni a si bangin, St. Victor cu African in a pakhat nak bik Pope a rak simi mithiang a si. Amah cu Khrihfa hna rak hrem lio le rak thah an rak si lio ah Bupi lutlai mithiang pakhat a rak si. Zeitluk hmanh in hremnak rak ing ko hna hmanhsehlaw a zumhnak thlau loin Jesuh Khrih cawnpiak nak cungah khan zumh fek tein a rak nung mi, Bawipa hnu a rak zul i tehte a rak khang mi mithiang a rak si.
Cucaah Bawipa Pathian nih kan cung i ṭhatnak a tuahmi kha philh lo ding in nihin kan cathiang hna nih ‘kan lungthin kha i check hlat ṭhan in Bawipa a ṭhatnak cungah lunglawmhnak bia chim ding, Bawipa sinah thlacam dingin’ a kan kawh nak cu a si.
Kannih hna zong St. Victor bantukin ralṭha ngai tein le zumhtlak nun, fel tein Khrihfa kan sinak ah hin nun khawh i zuam hna u sih. Kan herhmi thluachuah hna zong Pa Pathian sinah hal hna u sih. Hmanung bik tiang zumh tlak a simi hna cu Vancung Pennak ah ni ceu bantuk in an tlang lai ee a ti bangin kan nunnak ah ral ṭha tein Bawipa hnu zul ko hna u sih, a khamhnak thawngṭhabia kha tehte khang ko hna u sih. Vancung Pennak co khawh ding kha tinh buin Bawipa cawnpiak nak hna kha zul ko hna u sih. Bawipa kha zum ko hna u sih. Nan dihlak in Bawipa nih thlauchuah in pe ko hna seh. Amen
Thazang petu /- Fr. Fidelis Maung Sein