Middle East ah a dik a hmaanmi daihnak ser awk ah biaruahnak le i ceihmainak tharchuah ding in Pope nih nawlnak a tuah

Castel Gandolfo i Angelus thlacam a dih, Pope Leo XIV nih Holy Land le Middle East ah a cangmi tukdohnak le buainak hna ngol dingin a nawl hna i, hmaitonh biaruahnak le diplomacy in daihnak lam ser awk ah a forh hna. Hi buaibainak a karh chin lengmangmi kongah a lungretheihnak a langhter. West Bank le Gaza i a ummi mipi hna caah siseh, Holy Land (Israel) ah a cangmi buaibainak kong ah siseh ka lungre a thei tiah a chim. Nuhrin covo tlukruannak cungah hrambunh in ramkhel lei in thlennak chuahpi awk ah le Zumhnak le Biaknak hna i hmunthiang hna a hnorsuangtu thil hna kha hlawt awk le ngol ding ah forhfialnak a tuah.

 Ram khat le ram khat palai hna hmaitonh in biaruahṭinak le i ceihmainak tuah i daihnak lam ser awk ah atu le atu Pope nih forhfialnak a tuah. Hi buainak le ralkap cawlcanghnak ruang ah Midle East ram ah mipi tampi nunnak a liam pin ah dinti le electricity rawhralnak le harnak a chuak tiah a chim chap. Hriamtlai vialte nih an hriamnam an chiah i biaruahnak le i ceihmainak in mipi nih an herh tukmi daihnak an hmuh zau nak hnga kan nawl hna tiah a ti. Vawlei cung kakip ah raltuknak ruang ah harnak a tongmi caah thlacam awk ah forhfialnak le thazaang peknak a ngeih hna. Daihnak caah ṭuanvo ngeitu hna thinlung cu Bawipa nih tawng sehlaw, an thinlung cu ceuter sehlaw a rauh hlan ah daihnak ser hram ko hna seh tiah a chim.