Vancung Pennak Co khawh dingin Timhcia Na Si Cang Maw?

Dawtmi u le nau hna a tu cu zarhpi (17) nak kan phan ṭhan cang hna. Kan nunnak hi kan zoh tikah Pathian Pennak chungah a um mi kan si. Hi vawlei cung kan nun zongah hin Pathian Pennak chungah kan nun awk a si. Vancung Pennak kan ti tikah hi vawlei cung kan nun lio hrimhrim in hin kan nun awk a si. Cuticun vawlei kan nunnak a dih tikah vawlei kan nun lio Pennak Vancung Pennak kha Vancung ram nuam ah kan i luh pi lai. Cuasicaah, hi vawlei cung kan nun lio hrimhrim ah hin vancung Pennak kha kan i nun pi ding a si. 

Nihin zarhpi ni ah kan relmi cathiang hna cu 1Siangpahrang 3: 5,7-12; Psalm 118(119); Rom 8:28-30; Matthai 13:44-52 tiang hna hi an si. Voi-1 nak kan relmi cu Siangpahrang Solomon kong kha a si. Solomon cu Pathian nih Israel mi hna caah Siangpahrang si dingin a thim tikah Solomon nih Pathian sin in zeidah a hal tiah cun “Fimnak” a hal kha kan hmuh khawh. “Ka mi hna uk khawhnak caah a ṭha le a chia kha thleidan khawhnak, hngalhnak na sal pa hi ka lungthin chungah run ka pe tuah. Zeicah tiah aho nih dah na miphun ngan hi a uk khawh hnga” tiah a ti. Cu tikah Bawipa cu aa lawm. Solomon nih a hal mi hi Pathian nih a ka pek khawh timi zumhnak a ngei. Solomon nih rumnak, nun saunak, ral ṭhatnak le ral teinak te hna le, vawlei min thannak hna kha hal loin “Fimnak, hngalh thiamnak” kha a hal tikah Pathian cu aa lawm i ‘na ka hal mi nak in a hlei in thluachuah kan pek lai’ tiah a ti. Pathian duhmi Solomon nih a hal thiam tikah Pathian zong nih a pek taktak timi kha kan hmuh khawh. 

Rom cakuat chungah “Pathian nih hin amah a dawt mi hna caah le amah nih a timh mi ning in a kawl mi hna caah cun zeizong vialte hi a ṭha lei ah a serpiak ko hna ti kha kan hngalh” tiah a ti ve. Pathian nih a kawh mi hna, a thimmi hna caah cun a ṭha mi vialte kha a serpiak lengmang hna timi zong kha kan hmuh. Cucaah, Pathian he rem tein a um mi le ṭha tein a um ṭimi cu a Sunpar nak zong kha a hrawmh ve hna. Cucu Pathian duh ning tein a nung mi hna caah a simi thil an si. 

Cun nihin thawngṭhabia thiang kan zoh tikah “Vancung Pennak cu lo chung i thuh mi Ro thil bantuk a si; vancung Pennak cu lungvar bantuk a si; vancung Pennak cu rili chung i chehmi ‘Sur’ nga tampi a tlai mi sur bantuk a si” a ti. Vancung Pennak kong he pehtlai in cuticun Jesuh Khrih nih a kan cawnpiak. Zei ruangah tiah cun aman sung mi a si. Cucaah Ro thil kha lo chungah a hmuh tikah a ngeih mi thil vialte kha a zuar dih i cuticun lo cu a ning pi in a cawk dih a ti. Cun lungvar bantuk a si a ti fawn. Lungvar a hmu tu pa nih cun a ngeih mi thil vialte kha a zuar dih i a cawk a ti. 

Vancung Pennak cu hi vawlei kan nunnak ah hin kan timhcia dingmi, kan cawk dingmi, kan i ngeih ding mi a si zong kha hmuh a si. Hi vawlei chawva thilri hna nak in a man a sung deuh mi a si caah vawlei thilri hmang in, chiahtak in Vancung Pennak cu thlen ding, i ham ding le ngeih ding mi a si. 

Bupi chungah Pathian rian thiang a ṭuanmi Siangbawi te le Sister te hna nu zia hi kan zoh a si ahcun, vawlei nuamhnak chawva kal tak in mah nunnak kha Pathian sin ah a thlengmi, a ap mi an si. Cucaah anmah hna cu Khrih he aa ummi an si tiah an ti hna nak kha a si. Aman a sung tuk mi thil co khawhnak ding caah nunnak pek sian tiangin aa pe mi hna an si. Ro thil sung co khawh ding caah a si. 

Solomon nih Pathian sin in a hal mi Fimnak rosung kha a hal. Fimnak taktak cu Pathian kha a si. Pathian a ngei mi hna cu an sin in Pathian kha chuh khawh an si ti lo. Fimnak taktak Pathian kha kan co khawh nak hnga ding caah Pathian sin ah kan hal ve zungzal ding a si. 

Cuasicaah kan nunnak ah hin nun thiam kan herh i, kan herh taktak mi Pathian kha kan co khawh, kan ngeih khawh nak hnga ding caah i zuam zungzal hna u sih. Mirum tlangval pa nih Jesuh sin panh in “Bawipa, vancung Pennak ka co khawhnak hnga ding caah zeidah kan tuah lai tiin a ti tikah Jesuh nih a leh mi cu na ngeih mi chawva vialte kha va zuar hna law mi sifak kha va pe hna. Cun ka hnu ka zul a ti.” Sihmahsehlaw, tlangval pa nih cun Biatak nunnak caah, Vancung Pennak caah a ngeihchiah chawva kha hmang ngam loin, zuar ngam loin, Jesuh fial mi kha tuah ding a tlolh kha kan hmuh. Mirum tlangval pa bantuk kan si sual maw, asiloah Vancung Pennak caah vawlei thilri kha a thlah siang taktak mi kan si maw? 

Thazang petu /- Fr. Dominic Kung Tial