Kan Zeizong vialte hi Bawipa ta an si
Nihin July thla (25) cu mithiang James puaini a si bantukin mithiang James min a lami vialte Happy Feastday tiah nan kut kan in tlaih hna. Nihin a voikhatnak kan relmi (2Cor. 4:7-15) tiang, thawngṭhabia (Mt. 20:20-28) chungin a thawinak in kan langhter lai, “Nan lak i pakhat khat nih ngan a duh ahcun nan sinum a si awk a si. Ahohmanh pakhatnak si a duhmi cu nan sal a si awk a si, cuticun pei Mi Fapa hi a si cu, rianṭuan piak dingah ka rat ṭung lo. Mi tampi an rian ṭuanpiak awk le annih tlanhnak ca i ka nunnak pek awk ah pei ka rat cu” tiah a ti hna.
Nihin July thla (25) cu mithiang James puaini a si. (Mt. 4:19-22) chungah, “James cu a pa Zebedi he tiva ah an kal i lawng chungah an sur an timhtuah lioah khan Jesuh a hun kawh i, a pa le a sur, a lawng cu a kaltak i Jesuh kha a zulh”. (Mk. 3:17) ah, “Jesuh nih min a pek hna. Zebedi fapa (James le Johan) cu, khuari fa tiah min a pek hna”. (Lk. 9:54) ah, “Samaria mi hna nih Jesuh kha tluninn an onh duh lo. Cucaah James le Johan nih, Bawipa hi mi hna hi hrawh awkah vancung in mei run hlah law kan duh” an ti. (Mt. 17:1) ah, “Jesuh muihmai thlennak Tabaw tlangah Peter, James, Johan kha a kalpi hna”. Mithiang James cu zultu (12) hna chungin Jesuh ruangah a hmasabik thahnak a ingmi a si i (AD – 44) Herod Siangpahrang nih a thah.
(Lam. 12:2) ah, James cu Spain ram tiang Pathian bia phuangtu a si. Nihin Spain mi vialte hi Mithiang James thlaici an si i Pupa cawnpiaknak ah kan hmuh. Nihin a voikhatnak kan relmi (2Cor. 4:7-15) chungah, thilti khawhnak ṭhawnnak hi kanmah ta a si lo, Pathian ta a si. “Keimah ka ṭhawnnak” timi hi tlaknak hramthawknak a si. (Dal. 4:30-33) chungah, “A liannganmi Babilon, keimah nih siangpahrang uknak caah keimah ṭhawnnak a nganmi le keimah upatnak langhternak caah ka sermi a si lo maw? tiah a au. Vancuung aw pakhat a rung i, “Maw Nebukhadnezzar Siangpahrang, na pennak cu chuh na si cang, minung bu chungin ṭhawl na si cang a ti i, Nebukhadnezzar Siangpahrang cu cawtum ah a cang.”
Kan ngeihmi a dihlak hi Bawipa thluachuah a si. Bawipa pekmi lawng a si. Zeizong vialte hi Bawipa kut chung lawnglawng ah a ummi a si. Zeizong vialte cungah Bawipa cu nawlngeitu a si. Cucaah porhlaw ruamkai in um hlah. Zungzal a hmunmi thil a um lo. ‘Sui le ngun, tangka tampi ka ngei ko’ tiin i pawrhlaw hlah, sizung na phak tikah na tangka cu catlap bantukin a si lai. ‘Inn ṭha, lo ṭha, mawtor tampi ka ngei ko’ tiin i pawrhlaw hlah, na thih tikah na kaltak lai i midang sin a phan te lai. Nihin naa porhlawt khawhmi cu na ngandamnak lawngte hi a si. Damnak cu sui le ngun nih a cawk khawhmi a si lo. Thilti khawhnak hi kanmah ta a si lo timi hi nihin a voikhatnak kan relmi Pathian bia nih thazaang a kan pek.
Thawngṭhabia chungah, Pathian caah cun hmunhma timi cu sal sinak kha a si ko timi kha kan hmuh. A nu nih a hal piak hna, “Siangpahrang na si tikah, ka fapa hna hi na orhlei ah pakhat, na kehlei ah pakhat ṭhutnak nawl na pek nakhnga ka duh” tiah a ti. A nu nih a duh piakmi cu ṭhutdan sang kha a si. Nang tah na fale hna caah zeidah na duh piak hna? Pathian caah cun ṭhutdan sang, rian sang timi cu sal sinak kha a si. Ahohmanh pakhat si a duhmi cu nan sal a si awk a si, mi ngan sinak cu sal sinak ah a um. Cuticun pei Mi Fapa hi a si, rian ṭuanpiak ding ka rat ṭung lo,mi tampi an rian ṭuanpiak awkah ka ra, a ti hna. (Jn. 15:16) ah, “nannih nih nan ka ṭhim lo, keimah nih kan thim hna. A hmun dingmi thei tampi va tlai tuah u.”
Nihin cu Mithiang James puaini a si bantukin, mithiang James bantukin nun in thawngṭha phuangtu thei tampi a tlaimi kan si khawh nakhnga mithiang James sinah thlacam bawmhnak hal usih. Thazang petu /- Saya Francis Khua Pheng