Thawngṭha CHIM dingin rianfial mi kan si

Nihin Bupi nih a kan timhpiakmi kan bible cathiang chungin thlarau thazaang i lak ṭi hna usih. Nihin cu mithiang Mary Magdalene puaini zong a si. A voikhatnak kan relmi bible cathiang cu (Jer. 1:1, 4-10; Jn. 20:1-2, 11:18) tiang a si. Kan Bawipa Jesuh Khrih thihnak in a thawh ṭhan hnuah “thawhṭhan thawngṭhabia” phuan dingin nihin puaini kan tuahmi mithiang Mary Magdadene rian a fial, a thlahnak nihin ni i kan hmuhmi kan bible cathiang cu a si. 

Nihin kan relmi kan cathiang nih a kan cawnpiakmi cu “zeitluk hmanh in thazaang der in kan um hmanh ah, ngaihchiat in kan um lio hmanh ah Bawipa nih amah pumpak in a kan kawh i amah nih rian a kan fialmi cungah ṭih hlah uh nanmah he a zungzal in kan um pi hna lai” timi cawnpiaknak a si. Cucaah Khrihfa pakhat sining in kan nunnak ah Bawipa nih, “ṭih hlah uh, nanmah he kan umpi zungzal ko hna lai” tiah a kan timi te kha theih zungzal ding a si. 

Jeremiah cu minote a si lioah Bawipa nih a kawh i rian a fial. (Jer. 1:4) “Cun Bawipa bia cu ka sinah a ra i, paw chung i kan ser hlan ah kan hngalh i na chuah hlan ah kan thianter cang. Nangmah cu miphun hna ca i Profet ah kan chiah cang” tiah a ti. “Annih cu ahohmanh ṭih hna hlah, zeicahtiah na sinah ka um i kan huhphenh lai” tiah Bawipa nih a ti. Bawipa nih Jeremiah cu a kawh i miphun hna caah khamhnak thawngṭha, Pathian bia phuan dingin, Profet bia phuan dingin Bawipa nih a thlah tikah, “ṭih hlah nangmah he kan um pi lai” tiah a ti. Dawtmi u le nau hna, nihin ni ah Khrihfa kan sinak ah sining phundang cio in, hmunhma dang cio ah kan umnak ah Khrihfa kan sinak hi kan ning kan i zahpi sual maw? (asiloah) ‘ka no tuk rih ko, ngakchiate ka si rih’ tiah Jeremiah bantuak in kan chim sual ve maw? Kan zumhnak, kan biaknak an kan hal tikah chim ngam loin dai tein kan um sual maw? 

Gospel thawngṭhabia chungah “Bawipa thihnak in a thawh ṭhan tikah Mary Magdalene sinah a langh e” tiah a ti. Bawipa nih Mary Magdalene sinah a langh hnuah zeitindah a ti tiah cun, “Jesuh nih cun ka tlai peng ko tuah hlah, zeicahtiah ka Pa sinah ka kir rih lo. Sihmanhsehlaw ka unau pawl sinah khan va kal law, ‘ka Pa le nan Pa, ka Pathian le nan Pathian’ a simi sinah khan ka kal lai a ti, tiah va chim hna” tiah a ti. 

Bawipa nih thihnak in thawhṭhan hnuah thlan ah ngaihchia lungkuai in a ummi Mary Magdalene sinah a rak lang i, “Ka Pa le nan Pa a simi, ka Pathian le nan Pathian a simi sinah khan ka kal lai” tiah zultu hna sinah khan va chim hna. Jesuh Khrih thihnak in thawh ṭhannak thawngṭhabia phuan dingah Mary Magdalene zong cu rian fial a si. Jeremiah, minote , tlangval note, nungak note hna hi kha zoh hna usih, “Khah nang kha thla vun cam hnik vun ti tikah, nang kha phung vun chim hnik tikah ah, ka thei lo, ka thiam rih lo upa an um ko cuta, tiah chim khawh si. 

Cu liote ah Bawipa nih Israel mi hna sinah amah aiawh in biachimtu dingah, siangpahrang hna hmaiah biachimtu dingah, bawi hna hmaiah bia chim dingin Jeremiah a thlah tikah, “ṭih hlah, nangmah sinah kan um pi lai” tiah Bawipa nih bia a kam. Mary Magdalene zong cuve ṭhiamṭhiam cu a si, “va kal law, thihnak in a tho ṭhan cang timi thawngṭhabia kha zultu hna sinah va chim hna” tiah a ti. 

Dawtmi u le nau hna, kannih Khrihfa kan sinak ah kan Khrihfa sinak i a muru te hi, Jesuh Khrih kan zumhnak kan biaknak hi kan ning zahpi hlah usih, ṭih hlah usih. Bawipa nih ‘nanmah a zungzal ka um lai’ tiah bia a kan kamh ve mi kan si. Pakhatnak bik ah, zeitluk hmanh in ngaihchia lungkuai in kan um hmanh ah kha ngaihchiatnak chungin khan muihnak pi, lungdong in kan um lio hmanh ah khan Bawipa cu a rak kan kawl i Mary Magdalene a thlah bantuk in thawngṭhabia va phuan ve dingin Bawipa nih a thlahmi a si, timi kha thei hna usih. Pahnihnak ah, Pathian he aa tongmi Mary Magdalene a nunnak a ningin aa thleng. 

Kannih hna zong thihnak in a tho ṭhanmi kan Bawipa Jesuh Khrih he aa tongmi kan si ahcun ngaihchiatnak hna chungin ruahchannak in hmailei caan ah midang hna caah, ka hawi Khrihfa hna caah (asiloah) ka hawi minung dang hna caah timi rian ṭha ṭuannak Pathian thawngṭhabia phuan dingin ruahchannak ṭha kannih zong nih a pe khotu kan si ve lai. 

Cun thihnak in a tho ṭhanmi kan Bawipa Jesuh Khrih a hmutu, a cohlangtu, a tongtu Mary Magdalene, dai tein a um kho lo. Rian a fial bantuk in a kal i zultu hna sinah a va chim taktak. A lunglawmhnak kha midang hna he a va hrawmh ve hna. Kannih hna zong Khrihfa (khamhmi) kan sinak lunglawmhnak kha, Khrih i a fanu fapa kan sinak (chungkhar sinak) lunglawmhnak kha midang hna sinah cheu ve hna usih, theihter ve hna usih. Kan umkalnak ah ṭih ding a um lo. Bawipa nih ‘nanmah he a zungzal, caan dongh tiang ka um lai” tiah zultu hna sin siseh bia a rak khamhnak kha theihbu tein nifatin kan nunnak ah ruahchannak lianpi he midang hna caah ṭhatnak tuahnak he dawtnak lungthin he nun khawh i zuam zungzal hna usih.  

Thazang petu /- Fr. Fidelis Maung Sein